"Ən yaxşı müəllim" və "Ən yaxşı ümumtəhsil məktəbi" müsabiqələri başa çatdı

Bakı:

13 °C

82 %

7 m/s

Əlaqə

AZ RU EN

Ana səhifə / Sosial / "Ən yaxşı müəllim" və "Ən yaxşı ümumtəhsil məktəbi" müsabiqələri başa çatdı

"Ən yaxşı müəllim" və "Ən yaxşı ümumtəhsil məktəbi" müsabiqələri başa çatdı

03.09.2009 [01:28]

Prezident İlham Əliyevin Sərəncamı ilə müsabiqənin qalibi olan 50 məktəb və 100 müəllim mükafatlandırılıb
Prezident İlham Əliyevin növbəti Sərəncamı ilə 50 məktəb və 100 müəllim fərqləndirilib. 2008/2009-cu tədris ilində keçirilən “Ən yaxşı müəllim” müsabiqəsində müvəffəqiyyət qazandıqlarına görə müəllimlər 5000 (beş min) manat, “Ən yaxşı ümumtəhsil məktəbi” müsabiqəsində ən yüksək bal toplayan məktəblər isə 10000 (on min) manat məbləğində birdəfəlik pul mükafatı ilə mükafatlandırılıb.
Təhsili davamlı inkişafın əsas amillərindən sayan ölkə Prezidenti İlham Əliyev bu sahənin dünya standartlarına uyğunlaşdırılmasına, beynəlxalq təhsil sisteminə inteqrasiyasına və dünyanın qabaqcıl ölkələrindəki təhsil səviyyəsinə yüksəlməsinə çalışır. Bu cəhdlərin nəticəsidir ki, təhsil dövlətin humanitar sahədə həyata keçirdiyi siyasətin mərkəzində durur. Bu siyasətin əsas mahiyyəti isə ondan ibarətdir ki, təhsilin ayrı-ayrı sahələri deyil, bütövlükdə kompleks şəkildə inkişafı təmin edilsin.Təkcə onu göstərmək kifayətdir ki, təhsilin müxtəlif sahə və pillələrinin inkişafı üçün 15-dən artıq proqram işlənib hazırlanaraq qəbul edilib. Məhz bu proqramların həyata keçirilməsinin nəticəsində yeni məktəblər tikilir, mövcud olanlar təmir edilərək müasir standartlara cavab verən məktəblərə çevrilir. Hər bir məktəb müasir avadanlıqlarla təchiz edilir, kompyuterləşdirilir, yeni dərsliklər hazırlanır və şagirdlərə pulsuz paylanır. İldən-ilə təhsil işçilərinin əməkhaqqı artırılır. Prezident təhsillə bağlı tədbirlərə qatılır, məktəblərin açılışında və təməlqoyma mərasimlərində iştirak edir. Prezident atdığı addımları ilə bu sahədəki inkişafı stimullaşdırır. Müsabiqələrin təşkili və təhsil sahəsində çalışanlara yüksək məbləğdə mükafatların verilməsi də məhz bu inkişafa xidmət edir. Artıq ikinci ildir ki, tətbiq edilən mükafatlandırma təhsil ocaqlarını və bu sahədə çalışanları daha keyfiyyətli və peşəkarcasına çalışmağa sövq edir.
Təhsil Nazirliyi Kənd rayonları üzrə ümumtəhsil şöbəsinin baş məsləhətçisi Əhliyət Adıgözəlov hesab edir ki, “Ən yaxşı ümumtəhsil məktəbi” müsabiqəsi məktəblərin inkişaf prosesinin sürətləndirilməsində əvəzsiz rol oynayır: “Prezidentin bu addımı ən yüksək qayğıdır. Müsabiqə müəllimlər və məktəblər arasında sağlam rəqabəti təmin edir. Məktəblər yarışır və yarışın qalibləri müəyyənləşir. Müxtəlif nominasiyalarda ən yüksək nəticə göstərənlər fərqləndirilir. 17 göstərici üzrə 3 mərhələdən keçən məktəblərin ümumi balları toplanır. Məsələn, bu mərhələlərdə məktəblərin və müəllimlərin fəallığı, iştirak etdiyi layihələr, şagirdlərin olimpiadalarda, beynəlxalq yarışlarda tutduqları yer, ali məktəblərə qəbul səviyyəsi nəzərə alınır. Sənədlərin ekspertizasından sonra məktəb direktorlarının 10 dəqiqəlik təqdimatı olur. Bu mərhələlərin sonunda reytinq cədvəli üzrə ən yüksək nəticə göstərən məktəblər 50-liyə salınır”.
Xatırladaq ki, 50 məktəb arasından 3-nü Naxçıvan Muxtar Respublikasının Təhsil Nazirliyi müəyyənləşdirib.
Builki müsabiqənin də yekunları göstərib ki, keyfiyyət göstəricilərinə görə, Bakı məktəbləri yenə də öndədir. ölkə üzrə ən yüksək nəticəni “Ankara məktəbi” məktəb-liseyi, Bakı şəhəri Humanitar fənlər gimnaziyası, Bakı şəhəri “İstedad” Beynəlxalq Təhsil Kompleksi göstərib. Lakin bir sıra rayon məktəbləri də paytaxtdan geri qalmayıb. İsmayıllı rayonundan 3 məktəb müsabiqəyə qatılıb və hər 3 məktəb qaliblər sırasındadır. Sumqayıt şəhərindən də iştirak edən məktəblər yüksək nəticə göstərərək qaliblər sırasına düşüb.
Ə.Adıgözəlovun sözlərinə görə, müsabiqənin məktəblərin fəallığına təsiri iştirakçıların sayından da görünür: “ötən il müsabiqəyə 126 məktəb qatılmışdısa, bu il bu rəqəm 139 olub”.
Baş məsləhətçinin fikrincə, “Ən yaxşı müəllim” müsabiqəsi innovasiyalarla işləyən müəllimlərin yarışıdır və yenilikləri stimullaşdırır. 16 göstərici üzrə yüksək bal toplayan müəllimlər 100-lüyə daxil olur. Baş məsləhətçinin sözlərinə görə, istər iştirakçı müəllimlərin sayının artması, istərsə də şərtlərdə bəzi təkmilləşdirmənin aparılması müsabiqənin uğurundan xəbər verir: “ötən il 393 müəllim müsabiqəyə qatılmışdısa, bu il ən yaxşı müəllim olmaq istəyənlərin sayı 446 nəfərə çatıb. 8 müəllim sonradan fikrini dəyişib yarışı yarımçıq qoysa da, 209 nəfər sonadək mübarizə aparıb. 5 müəllim Naxçıvan Təhsil Nazirliyinin müəyyənləşdirdiyi kadr olmaqla, 100 müəllim seçilib. Hesab edirəm ki, kurikkulumun tətbiqi baxımından bu müsabiqə davamlı olmalıdır”.
RUHİYYƏ

Paylaş:

Baxılıb: 1601 dəfə