Arxayınlıq və ehtiyatsızlıq yoluxmaların sayının artmasına yol aça bilər

Bakı:

24 °C

47 %

1 m/s

Əlaqə

AZ RU EN

Ana səhifə / Sosial / Arxayınlıq və ehtiyatsızlıq yoluxmaların sayının artmasına yol aça bilər

Arxayınlıq və ehtiyatsızlıq yoluxmaların sayının artmasına yol aça bilər

17.09.2020 [09:41]

Ekspertlər hesab edirlər ki, vətəndaşlar yumşalmaları pandemiyanın bitməsi kimi qəbul etməməlidirlər
Payızda dünya miqyasında koronavirus pandemiyasının yenidən aktivləşəcəyi barədə səslənən proqnozlar artıq təsdiqlənməkdədir. Belə ki, hətta yoluxmanın az olduğu ölkələrdə belə statistik rəqəmlər artır və bu da həmin dövlətlərin yeni növ koronavirus (COVID-19) infeksiyası ilə mübarizə çərçivəsində yeni sərt tədbirlər görməsinə yol açır. Məsələn, Gürcüstanda pandemiyanın “ikinci dalğası” elan olunub. İsraildə COVİD-19-a yoluxmada rekord rəqəmlər qeydə alınmaqdadır. Avstriyada isə pandemiyanın ikinci dalğasının başladığını rəsmən bəyan edilib. Bundan əlavə Türkiyə, Rusiya və digər ölkələrdə yoluxma hallarının artması yeni məhdudiyyətlərin tətbiqini qaçılmaz edib.
Bu məqamları nəzərə alan bir sıra tibbi ekspertlər bildirirlər ki, ölkəmizdə də Nazirlər Kabinetinin yenidən bir sıra yumşalmalarla bağlı verdiyi qərar arxayınlıq yaratmamalıdır. Vətəndaşlar sanitar-gigiyenik qaydalara daha çox riayət etməlidir. Əks halda, payız-qış mövsümündə respirator xəstəliklərlə paralel olaraq COVID-19-a yoluxmanın sayında yenidən artım yarana bilər.
Öz növbəsində Milli Məclisin Səhiyyə komitəsinin üzvü Müşfiq Məmmədli bildirib ki, ölkəmizdə COVİD-19 infeksiyasının yayılmasının qarşısının alınması istiqamətində aparılan uğurlu fəaliyyət karantin qaydalarının yumşalması ilə bağlı addımların atılmasına yol açıb. Onun sözlərinə görə, bir sıra sərt qadağaların yumşaldılması istiqamətində addımlar atılsa da, Operativ Qərargah tərəfindən hazırlanan təlimatlara riayət olunması mütləq şərtdir: “Təbii ki, hər bir halda yumşalmalar risklərə də yol açır. Məlum olduğu kimi, digər ölkələrdə artıq ikinci dalğa özünü büruzə verir. Azərbaycanda da bu halın yaşanması mümkündür. Bu baxımdan, sosial məsafənin qorunması, gigiyenik qaydalara əməl etmə və tibbi qoruyucu vasitələrdən istifadə qaydalarına ciddi əməl olunmalıdır. Koronavirusun daha geniş yayılmamasının qarşısının alınması istiqamətində dövlətin müvafiq strukturlarının fəaliyyəti ilə yanaşı, vətəndaş məsuliyyəti də olduqca mühüm əhəmiyyət kəsb edir. Tibbi ekspertlər statistik məlumatların təhlili əsasında dünya üzrə daha riskli halın oktyabrın ortaları ilə noyabrın ortaları arasında müşahidə ediləcəyini bildirirlər. Bu mənada, insanlar qaydalara riayət etməklə həm özlərini, həm də yaxınlarını maksimum şəkildə infeksiyadan qorumuş olarlar”.
Pediatrik Kardiologiya və Revmatologiya İctimai Birliyinin sədri Sveta Rəfiyeva isə qeyd edib ki, ölkəmizdə yoluxmanın dinamikasında müəyyən stabilliyin yaranması xüsusi karantin rejimində növbəti yumşalmaların edilməsinə əsas yaratdı. Onun sözlərinə görə, vətəndaşlar yumşalma tədbirini hər şeyin bitməsi kimi qəbul etməməlidir: “Karantin rejimində yumşalmalar tətbiq edilən bir sıra ölkələrdə yoluxmaların artması halları baş verdiyindən həmin ölkələrdə yenidən qaydalar sərtləşdirilir. Məsələn, Almaniya, Fransa, Çexiya, İsrail, Gürcüstan və bir sıra digər ölkələrdə yenidən məhdudiyyətlərin tətbiq olunmasına başlanılıb”.
S.Rəviyeva əlavə edib ki, vətəndaşlar mütləq şəkildə sanitar-gigiyenik qaydalara riayət etməlidirlər. Onun sözlərinə görə, həyatın normal məcraya qayıtması üçün hətta yumşalma tədbirlərindən sonra da karantin qaydalarına uyğun yaşamaq lazımdır: “QHT rəhbəri bildirib ki, ikinci dalğanın baş verib-verməsi və yaxud baş verdiyi təqdirdə daha az itkilərlə sovuşması yenə də bizim hər birimizdən asılıdır”.
Pərviz SADAYOĞLU

Paylaş:

Baxılıb: 510 dəfə