Milli mətbuatımızın müasir çağırışlara cavab verməsi üçün davamlı addımlar atılır

Bakı:

26 °C

59 %

3 m/s

Əlaqə

AZ RU EN

Ana səhifə / Sosial / Milli mətbuatımızın müasir çağırışlara cavab verməsi üçün davamlı addımlar atılır

Milli mətbuatımızın müasir çağırışlara cavab verməsi üçün davamlı addımlar atılır

15.01.2021 [09:17]

Ekspertlərin fikrincə, “Azərbaycan Respublikasının Medianın İnkişafı Agentliyi”nin yaradılması media sahəsində qarşıdakı dövr üçün nəzərdə tutulan hədəflərin gerçəkləşməsində stimulverici amil olacaq
Ölkəmizdə bütün sahələr üzrə aparılan davamlı islahatlar çoxşaxəli inkişafımızı təmin etməklə yanaşı, demokratik prinsiplərə sadiqliyi də özündə əks etdirir. Bu mənada, Azərbaycan Respublikasının Prezidenti İlham Əliyevin “Media sahəsində islahatların dərinləşdirilməsi haqqında” Fərmanı mühüm əhəmiyyətə malikdir. Qeyd edək ki, Fərmana əsasən, Azərbaycan Respublikasında medianın inkişafının dəstəklənməsi, bu sahədə institusional quruculuq işlərinin davam etdirilməsi, yeni informasiya-kommunikasiya texnologiyalarının və innovasiyaların tətbiqinin stimullaşdırılması məqsədilə Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun əsasında “Azərbaycan Respublikasının Medianın İnkişafı Agentliyi” publik hüquqi şəxs yaradılıb.
Məsələ ilə bağlı fikirlərini bölüşən “İki sahil” qəzetinin baş redaktoru Vüqar Rəhimzadə bildirib ki, Prezident İlham Əliyev hər zaman mətbuatın inkişafını öz diqqətində saxlayıb və müasir cəmiyyət quruculuğu prosesindəki rolunu nəzərə alaraq mütəmadi olaraq bu sahənin təkmilləşdirilməsi istiqamətində əsaslı addımlar atıb. Yeni texnologiyaların inkişaf etdiyi müasir dövrdə də bu təkmilləşmə öz aktuallığını qorumaqdadır. V.Rəhimzadə onu da vurğulayıb ki, bu mənada, dövlət başçısının 12 yanvar 2021-ci il tarixli “Azərbaycan Respublikasında media sahəsində islahatların dərinləşdirilməsi haqqında” Fərmanının əhəmiyyəti xüsusi vurğulanmalıdır: “İmzalanan Fərmana uyğun olaraq “Azərbaycan Respublikasının Medianın İnkişafı Agentliyi”nin yaradılması media sahəsində qarşıdakı dövr üçün nəzərdə tutulan hədəflərin gerçəkləşməsində stimulverici amil olacaq. Birmənalı qeyd etmək olar ki, bu addım Azərbaycan mətbuatının inkişafında yeni mərhələnin başlanğıcıdır. Çünki yeni texnologiyaların inkişafı və tətbiqi sahəsinin genişləndirilməsi mətbuatın da bu imkanlardan bəhrələnməsinə yol açır. Bu diqqət və qayğı öz növbəsində, jurnalist məsuliyyəti və peşəkarlığı məsələsini daha da aktuallaşdırır. Bu baxımdan, internet resurslarının sürətlə inkişaf etdiyi müasir dövrdə qarşıda dayanan əsas vəzifələrdən biri məlumatın obyektivliyinin, qərəzsizliyinin qorunmasıdır”.
“525-ci qəzet”in baş redaktoru Rəşad Məcid isə qeyd edib ki, yeni yaranan agentliyin “online” media, agentliklər, adi vizual media, jurnalistlərin xaricdə təhsil alması və hansısa qanunun pozulması ilə bağlı hüquq-mühafizə orqanlarına müraciət kimi genişləndirilmiş səlahiyyətləri mövcuddur: “Yeni agentliyin yaranmasını çox yüksək qiymətləndiririk. Bu, Azərbaycan Prezidentinin mediaya diqqətinin növbəti bir sübutudur. Son dövrlərdə informasiya texnologiyası və kommunikasiyalarının inkişafı, bunların medianın qarşısına yeni tələblər qoyması və medianın yeni formalarının yaranması ilə bağlı müzakirələr aparılırdı. Yeni qurum mətbuatın inkişafının dərinləşdirilməsi ilə yanaşı, daha geniş spektri əhatə edəcək. Eyni zamanda, media haqqında qanunun iki ay ərzində hazırlanması nəzərdə tutulur. Hesab edirəm ki, ölkədə gedən sürətli inkişaf prosesi mediaya da şamil olunur. Media bu işlərdən kənarda qalmamalıdır, müasir çağırışlara cavab verməli və proseslərlə ayaqlaşmalıdır”.
Pərviz SADAYOĞLU

Paylaş:

Baxılıb: 661 dəfə