“Vaksinlər xəstəliyə yoluxma zamanı ağırlaşma və ölüm hallarının qarşısını alan təhlükəsiz vasitədir”

Bakı:

18 °C

88 %

3 m/s

AZ RU EN

Ana səhifə / Sosial / “Vaksinlər xəstəliyə yoluxma zamanı ağırlaşma və ölüm hallarının qarşısını alan təhlükəsiz vasitədir”

“Vaksinlər xəstəliyə yoluxma zamanı ağırlaşma və ölüm hallarının qarşısını alan təhlükəsiz vasitədir”

02.07.2021 [10:27]

Son aylar Azərbaycanda COVID-19 infeksiyasına yoluxma sayında ciddi azalma və ümumi epidemioloji vəziyyətin müsbətə doğru dəyişməsi qeydə alınıb ki, bu da həyata keçirilən effektiv tədbirlərin nəticəsidir. Yoluxma sayının kəskin sürətdə azalması, həmçinin vaksinasiya dozasının 3 milyonu keçməsi, öz növbəsində, bir çox məhdudiyyətlərin aradan qaldırılmasına təkan verib.
Bildiyimiz kimi, 1 ildən artıq müddətdir ki, ölkəmizdə COVID-19 səbəbindən toy, nişan və digər el şənliklərinin keçirilməsi ilə bağlı məhdudiyyətlər var idi. Lakin, iyulun 1-dən etibarən Azərbaycan ərazisində şənlik mərasimlərinin, o cümlədən toyların keçirilməsinə icazə verildi. Beləliklə, Azərbaycanda məhdudiyyətlər aradan qaldırılır, ölkə əvvəlki həyatına qayıdır. Amma təhlükə qalmaqdadır. Bu səbəbdən də vaksinasiyaya və Operativ Qərargahın qaydalarına əməl etmək hər birimiz üçün vacibdir.
Məsələ ilə bağlı həkim-infeksionist Əli Babayev qəzetimizə açıqlamasında bildirib ki, məhdudiyyətlərin aradan qaldırılmasına baxmayaraq, virus yox olmayıb. Bu səbəbdən, xüsusən təşkil olunacaq el şənliklərində qaydalara ciddi nəzarət etmək vacibdir. Onun sözlərinə görə, hazırda bəşəriyyət indiyədək üz-üzə gəldiyi ən qorxunc xəstəliklərdən biri ilə mübarizə aparır. Bu halda da yalnız kütləvi vaksinasiya pandemiyanın kökünü kəsə bilər: “Hazırda bütün dünyada kütləvi vaksinasiya aparılır. Birmənalı olaraq qəbul olunmalıdır ki, vaksin etdirmək insanı və ətrafındakıları qorumaq üçün ən effektiv üsuldur. Bu, dünyanın bütün aparıcı səhiyyə müəssisələri tərəfindən təsdiq olunmuş faktdır. Vaksinlər xəstəliyə yoluxma zamanı ağırlaşma və ölüm hallarının qarşısını alan təhlükəsiz vasitədir. İmmun sistemi vaksini antigen kimi qəbul edir və ona qarşı anticisimlər yaradır”.
“Unutmayaq ki, tibbi maska taxmaq, sosial məsafə saxlamaq, gigiyena və s. kimi tədbirlər görmək virusa məruz qalmaq və ya başqalarına yoluxdurmaq riskini azaldır. Sağlam qidalanmaq, idmanla məşğul olmaq və sağlamlıq müayinələrindən keçmək kimi tədbirlər də insanların sağlam olmasında mühüm rol oynayır. Lakin bu tədbirlər kifayət etmir. Yalnız peyvəndlər immun sistemimizi virusla mübarizə aparmağa hazır edir”, - deyə mütəxəssis vurğulayıb.
MÜŞFİQƏ

Paylaş:

Baxılıb: 601 dəfə