Dövlət imtahanı ləğv edilsin? - Ekspert “HƏ” deyir...

Bakı:

26 °C

48 %

3 m/s

Əlaqə

AZ RU EN

Ana səhifə / Sosial / Dövlət imtahanı ləğv edilsin? - Ekspert “HƏ” deyir...

Dövlət imtahanı ləğv edilsin? - Ekspert “HƏ” deyir...

02.06.2022 [10:40]

Yeganə Bayramova

Son zamanlar ölkəmizdəki ali məktəblərdə dövlət imtahanının ləğvi məsələsi gündəmdədir. Ali məktəblərin sonuncu kurs tələbələri dövlət imtahanının ləğv olunmasını tələb edirlər. Sosial şəbəkələrdə 30 mindən çox tələbə də bu çağırışa qoşulub. Səbəb isə dərslərin 3 semestr distant, bir semestr isə hibrid formada keçirilməsidir.

Tələbələr bildiriblər ki, pandemiya səbəbindən dərslər distant və hibrid formada keçirilib. Buna baxmayaraq, onlar dövlət imtahanı verməlidirlər. Bu isə düzgün qərar deyil.

Təhsil Nazirliyi məsələ ilə bağlı açıqlama yayıb. Qurumun İctimaiyyətlə əlaqələr sektorunun müdiri Cəsarət Valehov bildirib ki, “Ali təhsil pilləsinin dövlət standartı və proqramı” Nazirlər Kabinetinin 2010-cu il 23 aprel tarixli, 75 nömrəli qərarı ilə təsdiq edilib: “Bu sənədə əsasən (bənd 7.4) ali təhsil proqramları təhsilalanların dövlət attestasiyası ilə yekunlaşır. Dövlət attestasiyası bütün təhsilalanlar üçün məcburidir. Bu sənədin qüvvədə olma müddəti 6 ildir. Lakin yeni sənəd qəbul edilənə qədər qeyd olunan sənəd qüvvədədir.

Belə ki, hazırda da bu sənəd Ədliyyə Nazirliyinin Hüquqi aktların vahid elektron bazasında qüvvədə olan sənəd kimi yerləşdirilib.

Bununla yanaşı, Nazirlər Kabinetinin 2010-cu il 24 iyun tarixli 117 nömrəli qərarı ilə təsdiq edilmiş “Bakalavriat (əsas (baza ali) tibb təhsili) təhsilinin məzmunu və təşkili QAYDALARI”nda da (bənd 2.13, 2.15, 2.16) qeyd olunub ki, “2.13. Bakalavriat səviyyəsində ixtisaslar üzrə təhsil proqramları təhsilalanların dövlət attestasiyası ilə yekunlaşır”.

Eyni zamanda həmin sənədə əsasən, “2.15. Yekun attestasiya bütün təhsilalanlar üçün məcburidir, onun hazırlanmasına və təşkilinə ayrılan müddət 6 həftədir. 2.16. Yekun attestasiya ixtisas üzrə buraxılış yekun dövlət imtahanı (fənlərarası) və ya buraxılış işinin müdafiəsindən ibarətdir”.

Təhsil eksperti Kamran Əsədov “Yeni Azərbaycan”a açıqlamasında dövlət imtahanlarının ləğv edilməsi ilə bağlı çağırışların düzgün olduğunu söyləyib.

Onun sözlərinə görə, dərslər 2021-ci ilin sentyabr ayına qədər onlayn formada keçirilirdi. Bu da tələbələrin müəyyən fənləri mənimsəməsi ilə bağlı ciddi problem yaradıb: “Nəzərə alsaq ki, bütün tələbələr hər fəndən semestr imtahanı verirlər və növbəti kursa keçid edirlər, semestr tam başa çatandan sonra tələbələrin təkrar olaraq 4-cü kursda dövlət imtahanına cəlb edilməsinin heç bir mənası yoxdur. Yəni eyni tələbələr iki dəfə yoxlanmış olur, bu da normal deyil”.

Dünya təcrübəsi nə deyir?

K.Əsədov qeyd edib ki, dünyada qəbul edilmiş təcrübəyə görə tələbələr orta müvəfəqiyyət göstəricilərinə əsasən diplom alırlar:

“Düzdür, Azərbaycanda ali təhsil müəssisələrinin yekun attestasiya qaydaları dəyişib və indi 2-ci kursda oxuyan tələbələr nə dövlət, nə də buraxılış imtahanı verəcəklər. Ancaq hazırda 4-cü kursda oxuyanlar imtahanlara cəlb edilirlər. Ölkəmizdə pandemiyanın tamamilə başa çatmadığını, ali təhsil müəssisələrində tələbələrin təhsili ilə bağlı müəyyən məhdudiyyətlərin olduğunu nəzərə alsaq, ümumi orta müvəfəqiyyət göstəricisini əsas götürməliyik. Təhsil əlçatan olmalıdır. Tələbələrə ümumi göstəriciləri əsasında diplomun verilməsi yeganə çıxış yoludur”.

Paylaş:

Baxılıb: 839 dəfə