ÜST çağırış etdi

Bakı:

22 °C

60 %

3 m/s

Əlaqə

AZ RU EN

Ana səhifə / Sosial / ÜST çağırış etdi

ÜST çağırış etdi

15.07.2022 [10:16]

Ekspert: Qapalı məkanlarda maskadan istifadə məcburi ola bilər

Son günlərdə Avropa regionunda koronavirusun yeni ştammlarına yoluxma hallarının artması müşahidə olunur. Xatırladaq ki, təxminən may ayının ortalarından başlayaraq qrip simptomları ilə müşayiət olunan xəstəlik yayılmışdı. Hazırda götürülən testlərin sayı artdıqca koronavirusa yoluxmada da artımlar qeydə alınır. Koronavirusun “omikron” ştammının yeni mutasiyaları isə bütün dünyada yayılmağa davam edir.

G.QABİLQIZI

Ötən gün Ümumdünya Səhiyyə Təşkilatı (ÜST) ölkələri pandemiya ilə mübarizə üçün maska rejiminə qayıtmağa çağırıb. ÜST-ün baş direktoru Tedros Adhanom Qebreyesus COVID-19 infeksiyasına yoluxma sayının artmaqda davam etməsindən narahatlığını dilə gətirib. Bildirib ki, yeni infeksiya epidemiyası onsuz da bu sahə ilə məşğul olan səhiyyə sistemlərinə və tibb işçilərinə əlavə təzyiq göstərir.

Sağlamlığa Xidmət İctimai Birliyinin icraçı direktoru, ictimai səhiyyə üzrə ekspert Pərvanə Vəliyeva “Yeni Azərbaycan”a açıqlamasında bildirib ki, bir çox qonşu ölkələr qapalı məkanlarda hələ də maskadan istifadəni ləğv etməyib: “İndi istirahət mövsümüdür, turizmin qızğın vaxtıdır, insanlar səyahət edirlər, ölkədaxili və ölkəxarici çox sayda yerdəyişmə qeydə alınır. Bu səbəbdən COVID-19 virusunun yayılması üçün münbit şərait yaranır. Virus yükünün nisbətən yüksək olduğu ölkələrdən ölkəmizə çoxsaylı səyahətlər olur”.

Ekspertin sözlərinə görə, ÜST bir müddət öncə pandemiyanın yeni mərhələsinin başladığını elan etmişdi: “O zaman da yoluxma hallarının sayının tədricən artacağı və 4-cü doza vaksinlərin gündəmə gələcəyini bildirmişdi. Proqnozlar deyəsən özünü doğruldur. Maskadan istifadə təbii ki, vətəndaşların xeyrinədir. Qapalı, insanların kütləvi olduğu ictimai məkanlarda maskadan istifadə etmək bizim üçün yararlı olar. Çünki bu, hava, damcı yolu ilə keçən bir virusdur, immuniteti zəif olan insanlar dərhal yoluxa bilir.

Qeyd etmək istərdim ki, tibb müəssisələrində maskadan istifadə məcburi hala gətirilməlidir. Necə ki, baxıl geyinmək bir çox yerdə məcburidir. Baxıl mikrob, virus, bakteriyaların müəssisə daxilində yayılmasının qarşısını alır, maska da içəri daxil olan insanların bir-birini yoluxdurmasının qarşısını alır. Əksər hallarda müşahidə edirəm ki, sağlıq ocaqlarında sıxlıq var, ancaq heç kim maska taxmır. Maska taxmaq xüsusilə risk qrupu olan insanların - hamilələr, süd verən analar, yaşlılar, şəkərli diabet, ürək-damar problemi olanlar, kəskin immun çatışmazlığı, xroniki xəstəlikləri olanların xeyrinədir”.

P.Vəliyeva qeyd edib ki, hər kəs özünü qorusa, maskadan istifadəni davam etdirsə, xəstəlik bu dərəcədə yayılmaz: “Əks halda yoluxma artarsa, karantin qaçılmazdır. Operativ Qərargahda maskadan istifadə məsələsi yenidən gündəmə gətirilə bilər. İlkin mərhələdə isə maskanın qapalı məkanlarda istifadəsinin məcburi olması ehtimalı var”.

Paylaş:

Baxılıb: 702 dəfə