Qarabağa köçən şəxslərə ŞAD xəbər!

Bakı:

23 °C

56 %

5 m/s

Əlaqə

AZ RU EN

Ana səhifə / Sosial / Qarabağa köçən şəxslərə ŞAD xəbər!

Qarabağa köçən şəxslərə ŞAD xəbər!

30.07.2022 [10:18]

Yeganə BAYRAMOVA

İyulun 19-dan etibarən Şərqi Zəngəzur iqtisadi rayonuna daxil olan Zəngilan rayonunun Ağalı kəndindən olan keçmiş məcburi köçkünlər doğma yurdlarına qayıdırlar. Qayıdış prosesinin ilk mərhələsi 19-25 iyul tarixlərində icra olunub. Belə ki, Zəngilan rayonunun Ağalı kəndinə 41 ailə - 201 nəfər qayıdıb. Prosesin ikinci mərhələsinə yaxın günlərdə start veriləcək.

Prezident, Müzəffər Ali Baş Komandan İlham Əliyevin rəhbərliyi ilə rəşadətli ordumuzun 44 günlük Vətən müharibəsində qazandığı Zəfər 30 ilə yaxın doğma yurdun həsrətini çəkən məcburi köçkün həmvətənlərimizin işğaldan azad edilmiş ərazilərdəki doğma yurda qayıdışına imkan yaradıb. Məcburi köçkün həyatı yaşadıqları dövrdə onlar daim dövlətimizin diqqət və qayğısı ilə əhatə olunublar. Bu sahədə ulu öndər Heydər Əliyevin müəyyən etdiyi və Prezident İlham Əliyevin davam etdirdiyi strateji xətt məcburi köçkünlərin yaşayış şəraitinin yaxşılaşdırılmasına, sosial müdafiəsinin, məşğulluğunun təmin olunmasına istiqamətlənib. Birinci vitse-prezident Mehriban xanım Əliyeva da məcburi köçkünlərlə bağlı məsələlərə xüsusi həssaslıqla yanaşır, onların problemlərinin həllinə kömək göstərir.

Ağalı kəndinə əhalinin köçürülməsi “Böyük Qayıdış”ın ilk qədəmləridir.

Qeyd edək ki, işğala qədər bu inzibati ərazi 3 kəndi birləşdirib. Yeni Ağalı kəndinə birinci mərhələdə 41 ailə köçürülüb. İlkin köçürülən ailələr əsasən, müvəqqəti məskunlaşma yerlərində ən ağır şəraitdə yaşayanlar arasından seçilib və bu zaman köçürülmə üçün təqdim edilən yaşayış sahələrinin həcmi nəzərə alınıb. Köçürülənlər arasında 1-ci, 2-ci və 3-cü Ağalı kəndlərinin hər birinin sakinləri var.

Ötən günlərdə isə Qaçqınların və məcburi köçkünlərin işləri üzrə dövlət komitəsinin sədr müavini Fuad Hüseynov bildirib ki, işğaldan azad olunan ərazilərdə yaşayanlarla bağlı yeni qanun layihəsi hazırlanır. F.Hüseynov qeyd edib ki, yaxın gələcəkdə növbəti köçün Füzuli rayonunun Dövlətyarlı kəndində baş tutması gözlənilir.

Dövlət Komitəsinin rəsmisi Fuad Hüseynov “Yeni Azərbaycan”a açıqlamasında bildirib ki, məcburi köçkünlər daimi yaşayış yerlərinə qayıtdıqdan sonra 3 il müddətində dövlətin onlar üçün müəyyən etdiyi sosial müdafiə tədbirlərindən yararlana biləcəklər: “Mövcud qanunvericiliyə əsasən, “Məcburi köçkünlərin və onlara bərabər tutulan şəxslərin sosial müdafiəsi haqqında” qanunun 4-cü maddəsində göstərildiyi kimi məcburi köçkünlər üçün nəzərdə tutulmuş sosial müdafiə tədbirləri dedikdə-müvəqqəti yaşayış sahəsi ilə təmin edilməsi, məşğulluqla təmin edilməsi, sosial təminat, tibbi təminat, təhsil hüququnun təmin edilməsi, nəqliyyat və mənzil-kommunal və digər güzəştlər və vergi güzəştləri nəzərdə tutulur. Həmçinin qeyd edilib ki, Azərbaycan Respublikasının qanunvericiliyi ilə məcburi köçkünlərə digər sosial müdafiə tədbirləri də müəyyən edilə bilər.

Onu da qeyd edim ki, Ağalıda evlərin bölgüsü məcburi köçkünlərə yeni yaşayış sahələrinin verilməsinin hazırda qüvvədə olan qaydaları əsasında, şəffaflıq və ədalətlilik prinsipləri ilə püşkatma aparılıb. Püşkatma bir müddət bundan əvvəl Dövlət Komitəsinin Repatriasiya Departamentində keçirilib.

Köçürülən 41 ailədən hərəsinin bir üzvünə iş təklif olunub və təkliflər qəbul edilib. Təklifi qəbul etmiş şəxslər köçülmədən sonra iş yerlərində rəsmi şəkildə qeydiyyata alınıb fəaliyyətə başlayacaqlar. Ağalıya köçürülən ilk sakinlər arasında təqaüdçü, tələbə, evdar qadınlar olmaqla yanaşı, mühəndis, satıcı-kassir, gözətçi, bağban, aqronom, müəllim, həkim, kiçik sahibkarlıq fəaliyyəti ilə məşğul olan şəxslər və s. xidmət, səhiyyə və təhsil sahələri üzrə ixtisaslaşmış kadrlar vardır”.

Paylaş:

Baxılıb: 608 dəfə