Sentyabrın 1-dən...

Bakı:

18 °C

68 %

3 m/s

Əlaqə

AZ RU EN

Ana səhifə / Sosial / Sentyabrın 1-dən...

Sentyabrın 1-dən...

09.06.2023 [11:05]

Cərimələr artırılacaq?

Yeganə BAYAMOVA

Bu günlərdə yol hərəkəti qaydalarının pozulması ilə bağlı bəzi cərimələr artırılıb. Təbii ki, cərimələrin artırılmasını zəruri edən bir neçə amil var. Son zamanlar yol nəqliyyat hadisələri, ölüm və xəsarət halları çoxalıb. Bu hadisələrin təhlili nəticəsində ortaya çıxan səbəblərdən biri sürət həddinin aşılması, narkotik maddələrin təsiri altında avtomobilin idarə edilməsidir. Bir çox qayda pozuntuları var ki, burada sürücülər məsuliyyət daşıyır və qaydaları pozurlar. Nəticədə tez-tez qəzalar baş verir. Həmin qəzaların nəticəsində hər gün insanlarımızı itiririk. Bunun qarşısının alınması metodlarından biri də qanunvericiliyin sərtləşdirilməsidir.

Yol hərəkət qaydalarının pozulması ilə bağlı İnzibati Xətalar Məcəlləsinə cərimələrin artırılması ilə bağlı bəzi dəyişikliklər təklif edilib. Milli Məclis sözügedən dəyişiklikləri iyunun 6-da keçirilən növbədənkənar iclasda birinci oxunuşda qəbul edib.

600 manat cərimə və ya...

Dəyişikliyə əsasən, sürücü narkotik vasitələrdən və psixotrop maddələrdən istifadə etdikdən sonra nəqliyyat vasitəsini sərxoş vəziyyətdə idarə etdiyinə görə, 600 manat cərimə edilir. Yaxud da belə sürücülərin nəqliyyat vasitəsini idarə etmək hüququ 6 aydan 1 ilədək müddətə məhdudlaşdırılacaq.

15 gündən 1 ayadək həbs

İnzibati Xətalar Məcəlləsinə edilən digər dəyişikliyə görə, nəqliyyat vasitəsini idarə etmək hüququ olmayan şəxs narkotik vasitə qəbul edib avtomobili idarə edirsə, 800 məbləğində cərimə edilir. Eyni zamanda, pozuntunu törədənin şəxsiyyəti nəzərə alınmaqla 15 gündən 1 ayadək müddətə inzibati həbs tətbiq olunacaq.

Sürət həddi 61 km/saat və daha artıq olduqda

Yolda müəyyən edilmiş hərəkət sürətini 61 km/saat və daha artıq aşmağa görə də cərimələr artırılıb. Dəyişikliyə əsasən, yolda müəyyən edilmiş hərəkət sürətini 61 km/saat və daha artıq aşmağa görə sürücülər 300 manat məbləğində cərimə ediləcək. Qüvvədə olan qanuna görə, bu xətanın cəriməsi hazırda 250 manat məbləğindədir. Həmçinin layihəyə əsasən, yolda müəyyən edilmiş hərəkət sürətini 41-60 km/saat həddində aşmağa görə cərimələrin 150 manatdan 200 manata qaldırılması təklif edilir.

Birtərəfli yollarda əksinə hərəkət

Birtərəfli hərəkət yollarında müəyyən edilmiş hərəkət istiqamətinin əksinə hərəkət etməyə görə də cərimə artırılıb. Layihəyə əsasən, sürücülər birtərəfli hərəkət yollarında müəyyən edilmiş hərəkət istiqamətinin əksinə hərəkət etməyə görə 150 manat məbləğində cərimə ediləcək. Hazırda bu cərimə 100 manat məbləğindədir.

Avtomobili idarə etmək hüququ yoxdursa...

Nəqliyyat vasitəsini idarə etmək hüququ məhdudlaşdırılmış şəxs tərəfindən nəqliyyat vasitəsinin idarə edilməsinə görə cərimə 300 manat olub. Qüvvədə olan Məcəlləyə əsasən, bu cərimə əvvəl 200 manat idi.

Yüngül xəsarət olduqda

Sürücülərin yolda müəyyən edilmiş hərəkət sürəti həddini aşma və piyadaya yol verilməməsi nəticəsində zərər çəkmiş şəxsin sağlamlığına yüngül bədən xəsarətinin yetirilməsinə görə 300 manat məbləğində cərimə edilir. Yaxud belə sürücülərin nəqliyyat vasitəsini idarə etmək hüququ 6 aydan 1 ilədək müddətə məhdudlaşdırılacaq.

Bu şəxslər 5000 manat cərimələnəcək

Nəqliyyat vasitəsinin utilizasiyaya verilməsi barədə təsdiqedici sənəd əsasında yeni istehsal olunmuş avtomobilə güzəştin tətbiqindən nəqliyyat vasitələrinin satıcısı tərəfindən imtina edilməsinə görə 4000 manat məbləğində cərimə ediləcək. Bundan başqa, utilizator tərəfindən “Tullantılar haqqında” qanunda nəzərdə tutulan qaydada vəzifəli şəxslər 3000 manat məbləğində, hüquqi şəxslər 5000 manat məbləğində cərimə ediləcəklər.

Qeyd edək ki, “Yol hərəkəti haqqında” qanun layihəsi üçüncü oxunuşda qəbul ediləcəyi halda bu müddəalar 2024-cü il sentyabrın 1-dən qüvvəyə minəcək.

Paylaş:

Baxılıb: 568 dəfə