10 milyon 157 min 406 nəfərik!

Bakı:

26 °C

46 %

6 m/s

Əlaqə

AZ RU EN

Ana səhifə / Sosial / 10 milyon 157 min 406 nəfərik!

10 milyon 157 min 406 nəfərik!

15.09.2023 [11:00]

Əhalinin artımı sosial rifahın yüksək olması ilə birbaşa bağlıdır

Günel ABBAS

Əhalinin dinamik vəziyyətdə artması iqtisadiyyat qarşısında yeni vəzifələr qoyur. Əhali çoxalırsa, yeni uşaq bağçalarının, məktəblərin tikilməsi lazım gəlir, iş yerlərinin sayını artırmaq, ərzaq təhlükəsizliyini gücləndirmək zərurətə çevrilir, enerjidaşıyıcılarına tələbat yüksəlir. Bir sözlə, demoqrafik artım müsbət hal olmaqla yanaşı, həm də kompleks vəzifələrin həllini gündəmə gətirir. Prezident İlham Əliyev mütəmadi olaraq öz çıxışlarında bu məsələyə toxunur. Dövlət başçısı mühüm əhəmiyyətli tədbirlərdə Azərbaycanda demoqrafik vəziyyətin müsbət olduğunu vurğulayaraq bununla bağlı ortaya çıxan vəzifələri qeyd edir.

Demoqrafik proseslər həm də bir ölkədə həyat standartlarının hansı səviyyədə olmasından xəbər verir. Ona görə də müvafiq qurumlar tərəfindən bu məsələlər nəzarətdə saxlanılır və məlumatlar ictimaiyyətlə paylaşılır. Dövlət Statistika Komitəsinin 2023-cü il 1 avqust tarixinin vəziyyətinə hesablanmış məlumatına əsasən əhalinin sayı 10 milyon 157 min 406 nəfər təşkil edib. Məlumatda qeyd edilib ki, əhalinin ümumi sayında şəhər əhalisinin xüsusi çəkisi 54,6 faiz, kənd əhalisinin xüsusi çəkisi 45,4 faiz, kişilərin xüsusi çəkisi 49,8 faiz, qadınların xüsusi çəkisi isə 50,2 faiz olub.

Milli Məclisin deputatı Ramin Məmmədovun sözlərinə görə, Azərbaycanda əhalinin sayı dinamik olaraq artmaqdadır: “Bu, bütövlükdə milli strateji maraqlar kontekstində mühüm bir hadisədir. Bu məsələlər, ilk növbədə, Azərbaycanda mövcud olan iqtisadi inkişaf və sosial siyasətlə bağlıdır. Çünki rifah olmayan ölkədə əhalinin artımını təmin etmək mümkün deyil. Ona görə də, cənab Prezident haqlı olaraq ölkəmizdə əhalinin artımının birbaşa sosial vəziyyətlə bağlı olduğunu vurğulayır”.

Onun sözlərinə görə, Azərbaycan əhalisinin sayının 10 milyonu keçməsi onu göstərir ki, ölkədə münbit şərait yaradılıb, insanlar yaşamaq üçün daha çox Azərbaycana üstünlük verir: “Azərbaycandan xaricə gedənlərin sayında kifayət qədər azalma müşahidə olunur, ölkəmizdə yaşamaq istəyənlərin sayı daha çoxdur. Əhalinin artması dövlət siyasətinin müsbət göstəricisi kimi qəbul oluna bilər. Hansı ölkədə iqtisadi vəziyyət normaldırsa, dövlət qayğı göstərirsə, orada əhalinin artımı baş verir. Azərbaycan da belə ölkələrdəndir, son 10-15 il ərzində əhalimizin sayı 2.5-3 milyon artıb. Bu, bizim uğurumuzdur. Dövlət başçısının apardığı siyasətin təməlində Azərbaycan vətəndaşı dayanır. Şərait var ki, əhalinin sayı artır.

Hər bir ölkənin demoqrafiyası onun sosial-iqtisadi vəziyyətinin güzgüsüdür. Doğumun və ölümün səviyyəsinin göstəriciləri, miqrasiyanın saldosunun müsbət, yaxud mənfi olması sıradan bir fakt deyil. Bunlar şərhə ehtiyacı olmayan dəlil-sübutdur. Azərbaycanda demoqrafik vəziyyət müsbət olaraq qalır, əhalimiz getdikcə artır və dövlətimiz buna paralel olaraq öz iqtisadiyyatını inkişaf etdirir”.

Paylaş:

Baxılıb: 626 dəfə