İsrailin müdafiə nazirinin Türkiyə səfəri

Bakı:

30 °C

40 %

3 m/s

Əlaqə

AZ RU EN

Ana səhifə / Xarici siyasət / İsrailin müdafiə nazirinin Türkiyə səfəri

İsrailin müdafiə nazirinin Türkiyə səfəri

28.10.2022 [10:56]

İki ölkə arasında dondurulmuş çoxşaxəli sazişlər aktivləşdirilir

Türkiyə ilə İsrail arasında münasibətlərin normallaşması istiqamətində əhəmiyyətli irəliləyiş əldə olunmaqdadır. Ard-arda reallaşan qarşılıqlı səfərlər iki ölkə arasında münasibətlərin müsbət inkişafına zəmin yaradır. Yeri gəlmişkən, İsrailin müdafiə naziri Benni Qantz dünən Türkiyəyə səfər edib və Türkiyənin milli müdafiə naziri Hülusi Akarla görüşüb. Türkiyə mətbuatının yazdığına görə, görüşdə 1994 və 1996-cı illərdə imzalanmış sazişlərə əsasən, təhlükəsizlik və müdafiə sənayesi sahəsində əməkdaşlıq məsələlərinin aktuallaşdırılmasına diqqət yetirilib. Eləcə də, iki nazirin görüşündə Ukrayna, Suriya və Cənubi Qafqazdakı hadisələr də müzakirə obyekti olub.

Qeyd edək ki, 2010-cu ildə Mavi Mərmərə böhranından sonra İsrail ilə Türkiyə arasında təhlükəsizlik, kəşfiyyat və müdafiə sənayesi sahəsində əməkdaşlıq dayandırılmışdı. Son 12 ildə İsrailin müdafiə nazirləri Türkiyəyə səfər etməyib. Bu mənada, son səfər İsrail müdafiə naziri Ehud Barakın 2010-cu ildə Ankaraya etdiyi səfər sayılır. Qantzın səfərindən öncə İsrail müdaifə nazirliyinin yaydığı məlumatda da bildirilib ki, səfər zamanı 12 ilə yaxın dondurulmuş hərbi, təhlükəsizlik və müdafiə sənayesi sahələrində əməkdaşlığın canlandırılması, yenilənməsi və yenilənməsi üçün yaradılacaq yol xəritəsinin müzakirə olunacağı gözlənilir.

Türkiyə ilə İsrail arasında diplomatik münasibətlərin normallaşması istiqamətində ilk addım İsrail prezidenti İsaak Hersoqun mart ayında Ankaraya səfəri ilə gerçəkləşmişdi. Daha sonra Türkiyənin xarici işlər naziri Mövlud Çavuşoğlunun mayın 25-də İsrailə səfəri bu əlaqələrin daha da möhkəmlənməsinə xidmət edib. İki ölkə arasında səfirliklərin bərpası məsələsi də artıq həll edilib. Ankara səfirliyinin müvəqqəti işlər vəkili İrit Lillian İsrailin Ankaradakı yeni səfiri təyin edilib. Daha əvvəl Qüds Baş Konsulluğu vəzifəsində çalışmış səfir Şakir Özkan Torunlar isə Türkiyənin İsraildəki səfirliyinə gətirilib.

Bu iki ölkə arasındakı əlaqələrin müsbət dinamika ilə inkişafı böyük bir coğrafiyada - Aralıq dənizi və Orta Şərq regionunda yeni inkişaf mərhələsi yaradır. Diplomatik əlaqələrin ardınca milli müdafiə və hərbi sahədə də əməkdaşlığın yaradılması çoxşaxəli əlaqələrin inkişafına yeni impuls gətirə bilər. İsrail ilə Türkiyə arasında münasibətlərin inkişafı isə regionda yeni iqtisadi reallıqlar yaratmaqla yanaşı, siyasi mənzərəyə də mühüm çalarlar əlavə edə bilər. Azərbaycanın strateji müttəfiqi olan Türkiyə ilə yaxın əməkdaşımız İsrail arasında münasibətlərin inkişafı bölgənin təhlükəsizliyi ilə bağlı yeni mərhələ formalaşdırır. Başqa sözlə, bu yaxınlaşma sözügedən regionda yeni siyasi-hərbi əməkdaşlıq konfiqurasiyasının əsasını qoyur. Nəzərə alınmalıdır ki, müasir çağırışlar regional əməkdaşlıqların inkişafını vacib şərt olaraq müəyyənləşdirməkdədir. Bu mənada, iki dövlət arasında əlaqələrin yenidən möhkəmlənməsi Azərbaycan üçün də mühüm perspektivlər yaradır. Bu ayın əvvəlində İsrailin və Türkiyənin müdafiə nazirlərinin Bakıya səfər etməsi də bu faktı təsdiqləyir.

Mövzu ilə bağlı “Yeni Azərbaycan”a danışan Milli Məclisin Azərbaycan-Türkiyə parlamentlərarası əlaqələr üzrə işçi qrupunun üzvü Ramil Həsən bildirib ki, regionda yaranan yeni reallıqlar qlobal siyasi mənzərəyə də mühüm çalarlar əlavə etməkdədir. Azərbaycanın yaxın tərəfdaşı olan Türkiyə ilə İsrail arasında münasibətlərin genişlənməsi bölgənin təhlükəsizliyi və inkişafı ilə bağlı yeni çağırışlar formalaşdırır. Nəzərə alsaq ki, İsrail də Azərbaycanın mühüm tərəfdaşlarından sayılır, ölkələr arasındakı qarşılıqlı səfərlər olduqca böyük maraqla izlənir: “Bir neçə ay öncə İsrailin prezidenti İsaak Hersoq 15 illik fasilədən sonra Türkiyəyə səfər etmişdi. Bu tarixi səfər Türkiyə-İsrail münasibətlərində yeni bir dönüş nöqtəsi hesab olundu. Hər iki dövlətin başçısı ikitərəfli əlaqələrin inkişafında ortaq maraqlara əsaslanan siyasi dialoqun canlandırılmasını əsas məqam kimi diqqətə çatdırmışdılar. Türkiyə-İsrail əlaqələrinin hərbi sferada da inkişafı və güclənməsi regional sabitlik və sülh üçün böyük əhəmiyyət daşıyır. Hər iki dövlət hərbi sənaye sferasında mühüm yol qət ediblər”.

Millət vəkilinin fikrincə, bu iki dövlət arasında vaxtilə yaşanan problemlərin həlli üçün də dialoq mühitinin formalaşdırılması əsas şərtdir. Bu mənada, İsrail müdafiə nazirinin Türkiyəyə səfəri olduqca əhəmiyyətlidir. Hazırda qlobal siyasətdə olduqca ciddi proseslər getməkdədir. Hətta yeni dünya nizamının formalaşması aktuallıq kəsb edir. “Türkiyə artıq nəinki regionda, böyük bir coğrafiyada mühüm güc mərkəzi statusu qazanıb. İki ölkənin müdafiə nazirlərinin görüşü bölgədə sülhün və əməkdaşlığın inkişafına böyük töhfələr vəd edir. Türkiyə Azərbaycanın strateji müttəfiqi, İsrail isə bizə dost ölkədir. Onların arasında isti münasibətlərin formalaşması bizim üçün də müsbət perspektivlər yaradır. İnanıram ki, bu görüş çoxşaxəli əlaqələrin inkişafına yeni impuls gətirəcək,” - deyən R.Həsən bildirib.

Paylaş:

Baxılıb: 1127 dəfə