Vardanyan beynəlxalq axtarışda

Bakı:

15 °C

77 %

4 m/s

Əlaqə

AZ RU EN

Ana səhifə / Xarici siyasət / Vardanyan beynəlxalq axtarışda

Vardanyan beynəlxalq axtarışda

21.06.2023 [11:00]

Politoloq: Ukraynanın erməni milyarder haqqında qərarı tamamilə düzgündür

N.BAYRAMLI

Məlum olduğu kimi, Ukrayna erməni milyarder, Qarabağdakı erməni separatçılarının keçmiş “dövlət naziri” Ruben Vardanyana qarşı sanksiya tətbiq edərək onu axtarışa verib. Vardanyan bu ölkənin hüquq-mühafizə orqanları tərəfindən “dərhal saxlanılaraq Ukrayna və NATO ölkələrinin hüquq-mühafizə orqanlarına təhvil verilməli” şəxs kimi qeyd edilib. Bu barədə yayılan xəbərlərdə erməni iş adamının Ukraynanın milli təhlükəsizliyinə, sülhə, insan təhlükəsizliyinə və beynəlxalq düzənə qarşı fəaliyyət göstərdiyi, habelə digər qanun pozuntuları törətdiyi qeyd olunub.

Qeyd edək ki, Avropada da R.Vardanyan artıq bir cinayətkar kimi “ad çıxarmağa” başlayıb. Belə ki, Belçikanın nüfuzlu dövri nəşrlərindən biri olan “EUReporter”də dərc olunan məqalədə separatçıların keçmiş “dövlət naziri, erməni milyarder “ Ruben Vardanyan Avropa İttifaqı və bütün Qərb üçün təhlükə adlandırılıb. Məqalədə qeyd edilir ki, ABŞ bu yaxınlarda Moldovada dövlət çevrilişinə cəhddə iştirak edən və Rusiya kəşfiyyatı ilə əlaqəsi olan qrupun yeddi aparıcı üzvünə qarşı sanksiyalar tətbiq edib. Məqalədə Ruben Vardanyan da daxil olmaqla, bu siyahının tamamlanmasına çağırış yer alıb.

“EUReporter”in məlumatına görə, Moskvanın “yaxın fiquru” sayılan Vardanyan “dövlət naziri” vəzifəsindən uzaqlaşdırılsa da, Cənubi Qafqazda sabitliyin bərqərar olmasına mane olmağa çalışır. Qəzet Ukrayna kəşfiyyatına istinadən Rusiyadakı müəyyən qüvvələrin Qarabağdakı separatçıları silahlarla təmin etməsi məlumatına da toxunub. “Onlardan təxribatlar üçün, məsələn, Bakı ilə İrəvan arasında sülh danışıqlarını sabotaj etmək və ya Qərbə qaz nəqlinin qarşısını almaqla regionda yeni müharibəyə başlamaq üçün istifadə oluna bilər. Bu təhlükənin qarşısını almaq vaxtıdır. Vardanyana qarşı nəinki sanksiya tətbiq edilməli, o, həm də İnterpol və digər Qərb kəşfiyyat orqanları tərəfindən istintaqa cəlb edilməlidir” - “EUReporter” qeyd edib.

Mövzu ilə bağlı qəzetimizə açıqlama verən politoloq İlyas Hüseynov bildirib ki, Vardanyanın Ukrayna tərəfindən beynəlxalq axtarışa verilməsi Moskvanın “xüsusi missiyasını” yerinə yetirən bu adamın həm də rəsmi Kiyevin qəzəbinə tuş gəldiyini göstərir. Digər tərəfdən, Rusiya sülhməramlı kontingentinin məsuliyyət zonasında olan ərazilərimizdəki qondarma qurumun “dövlət naziri vəzfəsi”ndən uzaqlaşdırılsa da, erməni milyarder Vardanyan hələ də guya hansısa “hərəkat” yaratması ilə bağlı müxtəlif açıqlamalar verir. Onun sözlərinə görə, Vardanyanın Ukrayna tərəfindən axtarışa verilməsinin, sanksiyalara məruz qalmasının ciddi səbəbləri var: “Məlumatda deyilir ki, Vardanyan dərhal saxlanılaraq Ukrayna və NATO ölkələrinin hüquq-mühafizə orqanlarına təhvil verilməlidir. Bu o deməkdir ki, erməni milyarderin Ukraynaya qarşı hərbi təcavüzdə müəyyən formada iştirakı var. O, çirkli pulların yuyulması ilə məşhurdur. Verilən məlumatlara görə, Rusiyanın Ukraynada hərbi mövcudluğunun artırılması üçün Vardanyanın şirkətlərindən də istifadə olunub. Bütün bunlara görə, o, məsuliyyətə cəlb olunmalıdır. Bu baxımdan, Ukraynanın erməni milyarder haqqında qərarı tamamilə düzgündür”.

Politoloqun fikrincə, Vardanyan Qarabağ klanının əvvəlki nümayəndələrinin vaxtilə keçdiyi yol ilə getmək istəyirdi: “O, Qarabağda separatçı fəaliyyətindən bir müddət sonra Ermənistanda hakimiyyətə gəlməyi qarşısına məqsəd qoymuşdu. Bütövlükdə, bu şəxs böyük region üçün təhlükə mənbəyidir, erməni milyarder separatizmin genişlənməsinə çalışır. Bu səbəblərdən də, Vardanyan törətdiyi cinayətlərə görə saxlanılmalı və öz cəzasını almalıdır”.

Paylaş:

Baxılıb: 1207 dəfə