Azərbaycan–Tacikistan münasibətləri strateji tərəfdaşlıq nümunəsidir

Bakı:

19 °C

82 %

1 m/s

Əlaqə

AZ RU EN

Ana səhifə / YAP xəbərləri / Azərbaycan–Tacikistan münasibətləri strateji tərəfdaşlıq nümunəsidir

Azərbaycan–Tacikistan münasibətləri strateji tərəfdaşlıq nümunəsidir

16.10.2025 [22:16]

Azərbaycanın açıq və çoxşaxəli xarici siyasətinin uğurları davamlılığı ilə diqqət çəkir. Həm qarşılıqlı səfərlər, həm də dövlət başçısı İlham Əliyevin iştirak etdiyi beynəlxalq və regional tədbirlər bu siyasətin dinamikliyini göstərir. Bunun üçün təkcə son aylarda atılan addımlara diqqət yetirmək kifayətdir. Prezident İlham Əliyevin oktyabrın 9-da MDB Dövlət Başçıları Şurasının iclasında iştirak etmək üçün Tacikistan Prezidenti Emoməli Rəhmonun dəvəti ilə Düşənbəyə səfəri də bu istiqamətdə atılmış növbəti addımlardan biridir.
Oktyabrın 10-da Tacikistanın paytaxtı Düşənbədə keçirilmiş MDB Dövlət Başçıları Şurasının məhdud tərkibdə iclasında Azərbaycan Respublikasının Prezidenti İlham Əliyev çıxış edərək həm MDB çərçivəsində, həm də ikitərəfli səviyyədə Azərbaycan–Tacikistan münasibətlərinə geniş toxundu. Prezident vurğuladı ki, Düşənbədə dəfələrlə səfərdə olmuş, şəhərin sürətlə inkişaf etdiyini, yeni binaların tikildiyini və infrastrukturun müasirləşdirildiyini öz gözləri ilə gördüyünü xüsusi qeyd edir. Bu inkişaf Tacikistanın müstəqil dövlət kimi əldə etdiyi uğurların və ölkələrimiz arasında tərəfdaşlıq imkanlarının real göstəricisidir.

Cənab Prezident çıxışında Azərbaycan ilə Tacikistan arasındakı ikitərəfli münasibətlərin ardıcıl inkişaf etdiyini vurğuladı. Bu münasibətlər yalnız siyasi və diplomatik sahələrlə məhdudlaşmır, həm də iqtisadi, humanitar, mədəni və təhsil sahələrində davamlı əməkdaşlıqla müşayiət olunur. Dövlət başçısı bildirdi ki, bu əməkdaşlıq qardaşlıq, dostluq və qarşılıqlı dəstək prinsiplərinə əsaslanır və böyük inkişaf potensialına malikdir.

Son illər Azərbaycanın Mərkəzi Asiya ölkələri ilə münasibətlərində ciddi canlanma müşahidə olunur. Bu kontekstdə Tacikistanla əlaqələr xüsusilə strateji önəm daşıyır. İkitərəfli diplomatik münasibətlər 1992-ci ildə qurulub və 2007-ci ildə Azərbaycanın Tacikistanda səfirliyi, bir il sonra Tacikistanın Azərbaycanda səfirliyi fəaliyyətə başlayıb. Bu illər ərzində iki ölkə arasında 60-dan çox sənəd imzalanıb. Onlardan ən əhəmiyyətlisi 2007-ci ildə bağlanmış “Azərbaycan Respublikası və Tacikistan Respublikası arasında dostluq və əməkdaşlıq haqqında Müqavilə”dir. Bu sənəd iki ölkə arasında siyasi dialoqun və strateji əməkdaşlığın hüquqi əsaslarını müəyyən edib.

İkitərəfli münasibətlərin digər mühüm tərəfi iqtisadi əməkdaşlıqdır. Azərbaycan və Tacikistan arasında ticarət, enerji, sənaye, kənd təsərrüfatı, nəqliyyat və informasiya texnologiyaları sahələrində böyük potensial mövcuddur. İki ölkənin hökumətləri tərəfindən yaradılan qarşılıqlı hökumətlərarası komissiyalar iqtisadi əlaqələrin genişlənməsini təmin edir və regional əməkdaşlığı gücləndirir. Prezident İlham Əliyev qeyd etdi ki, bu əməkdaşlıq həmçinin MDB çərçivəsində, eləcə də regional iqtisadi təşəbbüslərdə qarşılıqlı dəstək rolunu oynayır.

Mədəni və humanitar əməkdaşlıq da Azərbaycan–Tacikistan münasibətlərində xüsusi yer tutur. Ölkələr arasında keçirilən qarşılıqlı mədəniyyət günləri, kino həftələri, sərgilər və digər tədbirlər xalqlar arasında dostluğun möhkəmlənməsinə xidmət edir. Elm və təhsil sahəsində həyata keçirilən layihələr, gənclərin təcrübə mübadiləsi proqramları və birgə təhsil təşəbbüsləri iki ölkə arasında uzunmüddətli əməkdaşlığın bünövrəsini təşkil edir. Bu proqramlar həmçinin MDB məkanında gənclərin bir-birini tanıması və qarşılıqlı hörmətin artırılması üçün əhəmiyyətlidir.

Azərbaycan və Tacikistan həmçinin beynəlxalq və regional təşkilatlar, xüsusilə İqtisadi Əməkdaşlıq Təşkilatı (İƏT) çərçivəsində sıx əməkdaşlıq edir, bölgədə sabitliyin və iqtisadi inteqrasiyanın güclənməsinə töhfə verir. Prezident İlham Əliyev çıxışında MDB Oyunları kimi regional tədbirlərin də ölkələr arasında dostluq və əməkdaşlığı möhkəmləndirdiyini vurğuladı. Bu cür təşəbbüslər təkcə Birlik daxilində deyil, həm də ondan kənarda qarşılıqlı etimadı artırır və xalqlar arasında daha sıx əlaqələrin qurulmasına xidmət edir.
Düşənbə görüşü bir daha sübut etdi ki, Azərbaycan–Tacikistan münasibətləri MDB məkanında uğurlu tərəfdaşlığın parlaq nümunəsidir. Dövlət başçılarının ardıcıl səyləri nəticəsində bu əməkdaşlıq yalnız siyasi dialoqla məhdudlaşmır, həm də xalqlar arasında mənəvi birliyin, humanitar əlaqələrin və qarşılıqlı etimadın möhkəmlənməsinə xidmət edir. İki ölkənin strateji əməkdaşlığı regional sabitlik, inkişaf və qarşılıqlı dəstək üçün böyük perspektiv və imkanlar yaradır.

Bir sözlə, Azərbaycan–Tacikistan münasibətləri ardıcıl inkişaf edən, hər sahədə tərəfdaşlığı genişləndirən, həm Birlik daxilində, həm də beynəlxalq müstəvidə nümunəvi əməkdaşlıq modelinə çevrilmişdir. Prezident İlham Əliyevin çıxışı bu əlaqələrin gələcəkdə daha da möhkəmlənəcəyinə və MDB məkanında stabil, qarşılıqlı faydalı tərəfdaşlıq mühitinin yaradılmasına xidmət edəcəyini bir daha təsdiqlədi.

Şövqi Həsənov,
YAP Şəmkir rayon Təşkilatı Aparatının əməkdaşı

Paylaş:

Baxılıb: 604 dəfə