Bu şanlı tarix bizimlə əbədi olacaq

Bakı:

26 °C

44 %

4 m/s

Əlaqə

AZ RU EN

Ana səhifə / YAP xəbərləri / Bu şanlı tarix bizimlə əbədi olacaq

Bu şanlı tarix bizimlə əbədi olacaq

04.11.2025 [19:07]

Toğrul Zeynalov

YAP Ağdam rayon təşkilatının əməkdaşı

8 Noyabr – Zəfər Günü mənim üçün sadəcə bir tarix, bir bayram deyil, bu torpağın ruhuna, qanına, yaddaşına yazılmış müqəddəs and yeridir. Mən bir Qarabağ qazisi kimi bu Qələbənin dəyərini hər kəsdən daha dərindən anlayıram, çünki bu Qələbənin hər anı, hər nəfəsi mənim üçün döyüş meydanının tozu, şəhid yoldaşlarımın baxışları, səngərdəki səssiz dualar deməkdir. O günlərdə biz təkcə torpaq uğrunda deyil, Vətənin ləyaqəti, millətin namusu, xalqın gələcəyi uğrunda vuruşurduq. Hər addımda, hər atəşdə bir inam var idi – biz haqq yolundaydıq, çünki bu torpaq bizim idi. Prezident İlham Əliyevin “Biz bu Qələbəni birliklə qazandıq” sözləri bu mübarizənin mahiyyətini tam ifadə edir. Biz döyüş meydanında silahla, xalqımız isə dualarla, əməyilə, sədaqəti ilə bizim yanımızda idi. Ordumuzun gücü təkcə texnikada deyil, Vətənə olan sevgidə idi. Hər bir əsgərin ürəyində bir Şuşa həsrəti, bir Laçın arzusu, bir Ağdam nisgili vardı. Biz o arzuları gerçəkləşdirdik, çünki xalqla dövlət, ordu ilə Prezident bir amal uğrunda birləşmişdi.

Bu Qələbə Azərbaycan xalqının yüzillik həsrətinə son qoydu, 30 illik işğalın yaralarını sağaltdı. Biz illərlə baxıb həsrətlə xatırladığımız o torpaqlara yenidən qayıtdıq, azad edilmiş şəhərlərimizdə üçrəngli bayrağımız yenidən dalğalandı. Mən bu gün Qarabağ torpaqlarına baxanda, orada şəhid yoldaşlarımın ruhunu, xalqımızın əzmini, dövlətimizin qüdrətini görürəm. Hər qarış torpaqda bir qəhrəmanın izi, bir igidin nəfəsi var. Biz bu torpaqları yalnız azad etmədik, həm də onu gələcəyə əmanət etdik. Zəfər Günü bizə təkcə sevinc yox, həm də məsuliyyət gətirir – bu Qələbəni qorumaq, onun mənəvi dəyərini gələcək nəsillərə ötürmək bizim borcumuzdur. Hər bir azərbaycanlı bu torpağın azadlığı uğrunda döyüşən şəhidin ruhuna borcludur. Onlar Vətən uğrunda can verdilər, biz isə onların ruhunu yaşatmaqla, azadlığı qorumaqla müqəddəs bir vəzifəni yerinə yetirməliyik.

8 Noyabr – xalqımızın ləyaqətinin, dövlətimizin qüdrətinin, Ali Baş Komandanın dəmir iradəsinin və Azərbaycan əsgərinin igidliyinin təntənəsidir. Bu gün azad Şuşada səslənən musiqi, azan səsi, uşaqların gülüşü, dalğalanan bayraq – hamısı bu Qələbənin canlı simvollarıdır. Mən fəxr edirəm ki, bu tarixdə payım var, bu Qələbənin bir parçasıyam. Qazilik mənim üçün həm qürur, həm də borcdur – çünki mənim və yoldaşlarımın qazandığı Qələbə xalqımızın gələcəyi üçün bir təməl, bir inam mənbəyidir. Biz bu torpaqlarda şəhidlərimizin ruhuna səcdə edərək, Vətənə sədaqət andı içmişik. Qoy bu Zəfər əbədi olsun, qoy bir daha bu torpaq işğal kəlməsini eşitməsin.

8 Noyabr mənim üçün həyatımın ən uca zirvəsidir – həm döyüş meydanında qazandığım şərəf, həm də xalqımın taleyinə yazılan əbədi Qələbədir. Allah bütün Şəhidlərimizə rəhmət etsin, qazilərimizə şəfa versin, mərd və igid döyüşçülərimizi qorusun.

Paylaş:

Baxılıb: 611 dəfə