Azərbaycan beynəlxalq aləmdə idman ölkəsi kimi tanınır

Bakı:

0 °C

86 %

2 m/s

Əlaqə

AZ RU EN

Ana səhifə / YAP xəbərləri / Azərbaycan beynəlxalq aləmdə idman ölkəsi kimi tanınır

Azərbaycan beynəlxalq aləmdə idman ölkəsi kimi tanınır

29.12.2025 [22:21]

2025-ci ilin idman yekunlarına həsr olunan mərasim Azərbaycan idman ictimaiyyəti üçün əlamətdar hadisələrdən biri olmuşdur. Tədbirdə çıxış edən Azərbaycan Respublikasının Prezidenti cənab İlham Əliyev ölkəmizdə idmanın inkişafına göstərilən dövlət qayğısını, əldə olunan nailiyyətləri və qarşıda duran əsas vəzifələri geniş şəkildə təhlil etmişdir. Prezidentin çıxışı Azərbaycanın idman strategiyasının ardıcıl və məqsədyönlü xarakter daşıdığını bir daha nümayiş etdirmişdir.

Dövlət başçısı çıxışında qeyd etmişdir ki, idman sahəsində qazanılan uğurlar təsadüfi deyil və bu nailiyyətlər uzun illər ərzində həyata keçirilən düşünülmüş siyasətin nəticəsidir. Azərbaycanda müasir idman infrastrukturu yaradılmış, bölgələrdə Olimpiya İdman Kompleksləri inşa olunmuş, gənclərin idmana cəlb edilməsi üçün geniş imkanlar formalaşdırılmışdır. Cənab İlham Əliyev bu amillərin beynəlxalq arenada əldə olunan yüksək nəticələrə birbaşa təsir göstərdiyini vurğulamışdır.

Çıxışda Azərbaycan idmançılarının 2025-ci il ərzində beynəlxalq yarışlarda göstərdikləri uğurlara xüsusi diqqət yetirilmişdir. Dövlət başçısı idmançıların, məşqçilərin və federasiya rəhbərlərinin zəhmətini yüksək qiymətləndirərək onların ölkəmizi layiqincə təmsil etdiklərini bildirmişdir. Cənab Prezident həmçinin qeyd etmişdir ki, qazanılan medallar və titullar Azərbaycanın beynəlxalq nüfuzunun artmasına xidmət edir və dövlət bayrağının mötəbər idman arenalarında dalğalanması hər bir azərbaycanlı üçün qürur mənbəyidir.

Cənab İlham Əliyev çıxışında gənc nəslin fiziki və mənəvi tərbiyəsində idmanın rolunu xüsusi vurğulamışdır. O bildirmişdir ki, sağlam həyat tərzinin təbliği, gənclərin zərərli vərdişlərdən uzaqlaşdırılması və vətənpərvərlik ruhunda yetişdirilməsi baxımından idman mühüm vasitədir. Bu baxımdan dövlət tərəfindən idman məktəblərinin və uşaq-gənclər idman proqramlarının inkişafı daim diqqət mərkəzində saxlanılır.

Sonda möhtərəm Prezident cənab İlham Əliyev qarşıdakı illər üçün əsas prioritetlərə toxunaraq idmanın maddi-texniki bazasının daha da gücləndiriləcəyini, idmançılara sosial dəstəyin artırılacağını və beynəlxalq yarışlara hazırlığın yüksək səviyyədə davam etdiriləcəyini qeyd etmişdir. Onun çıxışı Azərbaycan idmanının gələcəyinə olan inamı artırmış və yeni uğurlar üçün möhkəm zəmin yaratmışdır.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 204 dəfə