Milli birliyin və dövlətçilik ideyasının təcəssümü

Bakı:

20 °C

94 %

6 m/s

Əlaqə

AZ RU EN

Ana səhifə / YAP xəbərləri / Milli birliyin və dövlətçilik ideyasının təcəssümü

Milli birliyin və dövlətçilik ideyasının təcəssümü

29.12.2025 [21:54]

Dünya Azərbaycanlılarının Həmrəyliyi Günü hər il 31 dekabr tarixində qeyd olunaraq, dünyanın müxtəlif ölkələrində yaşayan azərbaycanlıların milli kimliyini, tarixi yaddaşını və ortaq dəyərlərini bir daha ön plana çıxarır. Bu əlamətdar gün milli birliyin, mənəvi bağlılığın və vətənə sədaqətin rəmzi kimi böyük əhəmiyyət daşıyır. Harada yaşamasından asılı olmayaraq, azərbaycanlıları birləşdirən əsas amillər dil, mədəniyyət, tarix və milli maraqlardır. Məhz bu dəyərlər Dünya Azərbaycanlılarının Həmrəyliyi Gününün ideya əsasını təşkil edir.

Azərbaycan xalqının tarixi inkişaf yolu nəticəsində milyonlarla soydaşımız dünyanın müxtəlif guşələrində məskunlaşıb. Onlar yaşadıqları ölkələrdə milli-mənəvi dəyərlərimizi qoruyub saxlayaraq Azərbaycanı layiqincə təmsil ediblər. Bu baxımdan həmrəylik anlayışı sadəcə etnik mənsubiyyəti deyil, eyni zamanda milli maraqlar ətrafında birləşməyi, Vətənlə mənəvi bağları daim canlı saxlamağı ifadə edir. Dünya Azərbaycanlılarının Həmrəyliyi Günü bu birliyin rəsmi və mənəvi təcəssümüdür.

Bu günün dövlət səviyyəsində təsis olunması və milli təqvimimizdə xüsusi yer tutması müasir Azərbaycan dövlətçiliyinin banisi, ümummilli lider Heydər Əliyevin adı ilə bağlıdır. Məhz onun uzaqgörən siyasəti nəticəsində dünya azərbaycanlılarının təşkilatlanması, diaspor fəaliyyətinin gücləndirilməsi və milli ideya ətrafında birləşməsi əsas prioritetlərdən birinə çevrildi. Heydər Əliyev həmrəyliyi xalqımızın güc mənbəyi kimi dəyərləndirir və dünya azərbaycanlılarının birliyini dövlətin strateji maraqları baxımından olduqca vacib hesab edirdi.

Bu siyasi xətt bu gün Azərbaycan Respublikasının Prezidenti İlham Əliyev tərəfindən uğurla davam etdirilir. Prezident İlham Əliyevin rəhbərliyi altında diaspor siyasəti yeni mərhələyə qədəm qoyub, dünya azərbaycanlılarının fəaliyyəti daha koordinasiyalı və məqsədyönlü xarakter alıb. Xaricdə yaşayan soydaşlarımızın milli maraqların müdafiəsində fəal iştirakı, Azərbaycan həqiqətlərinin beynəlxalq ictimaiyyətə çatdırılması dövlət tərəfindən daim dəstəklənir. Xüsusilə son illərdə əldə olunan siyasi və hərbi uğurlar fonunda dünya azərbaycanlılarının nümayiş etdirdiyi birlik Prezident İlham Əliyevin apardığı siyasətin xalq tərəfindən dəstəkləndiyini göstərir.

Müasir dövrdə informasiya texnologiyalarının inkişafı dünya azərbaycanlıları arasında əlaqələrin daha da möhkəmlənməsinə şərait yaradıb. Sosial şəbəkələr, diaspor təşkilatları və mədəni layihələr vasitəsilə milli dəyərlər təbliğ olunur, Azərbaycanla bağlı həqiqətlər dünya ictimaiyyətinə çatdırılır. Bu prosesdə həmrəylik ideyası xüsusi rol oynayır və azərbaycanlıların vahid mövqedən çıxış etməsinə imkan yaradır.

Dünya Azərbaycanlılarının Həmrəyliyi Günü gənc nəslin milli ruhda formalaşmasında da mühüm əhəmiyyət kəsb edir. Bu gün gənclərə öz köklərini unutmamağı, milli kimliyini qorumağı və harada yaşamasından asılı olmayaraq Azərbaycanla bağlılığını daim saxlamağı xatırladır. Güclü dövlətin təməlində güclü milli birlik dayanır və bu birliyin qorunması hər bir azərbaycanlının məsuliyyətidir.

Beləliklə, Dünya Azərbaycanlılarının Həmrəyliyi Günü xalqımızın milli ruhunu, tarixi yaddaşını və gələcəyə olan inamını özündə birləşdirən əlamətdar gündür. Bu gün Heydər Əliyevin əsasını qoyduğu və İlham Əliyevin uğurla davam etdirdiyi milli birlik siyasətinin təntənəsidir. Azərbaycanlı olmağın qürurunu yaşadan bu gün bizi daha sıx birləşdirir və ortaq gələcəyimiz naminə həmrəyliyin vacibliyini bir daha nümayiş etdirir.

Leyla Məhərrəmova

YAP Ağcabədi rayon təşkilatının gənc fəalı

Paylaş:

Baxılıb: 593 dəfə