Azərbaycanın beynəlxalq enerji siyasətində mühüm rola malikdir

Bakı:

25 °C

55 %

3 m/s

Əlaqə

AZ RU EN

Ana səhifə / YAP xəbərləri / Azərbaycanın beynəlxalq enerji siyasətində mühüm rola malikdir

Azərbaycanın beynəlxalq enerji siyasətində mühüm rola malikdir

05.03.2026 [14:56]

Bayram Aslanov,

YAP İdarə Heyətinin üzvü, YAP Gəncə şəhər təşkilatının sədri

Müasir dövrdə enerji təhlükəsizliyi dövlətlərin iqtisadi və siyasi sabitliyinin əsas amillərindən biri hesab olunur. Enerji resurslarının səmərəli istifadəsi, onların təhlükəsiz və dayanıqlı şəkildə dünya bazarlarına çatdırılması beynəlxalq əməkdaşlığın mühüm istiqamətlərindən biridir. Bu baxımdan Azərbaycan mühüm enerji tərəfdaşı kimi regionda və Avropada xüsusi rol oynayır. Mart ayının 3-də Bakı şəhərində keçirilən Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclasları enerji sahəsində beynəlxalq əməkdaşlığın inkişafı baxımından mühüm hadisə oldu.

Müxtəlif ölkələrin nazirlərinin, beynəlxalq təşkilatların nümayəndələrinin və enerji şirkətlərinin rəhbərlərinin, ümumilikdə 27 ölkənin, 11 beynəlxalq maliyyə institutunun, həmçinin 49 enerji şirkətinin nümayəndələrinin qatıldığı tədbirdə ölkəmizin Prezidenti cənab İlham Əliyev geniş məzmunlu çıxış edərək, müstəqil Azərbaycanın enerji strategiyası, regional əməkdaşlıq və yaşıl enerji sahəsində görülən işlər haqqında ətraflı danışıb. Cənub Qaz Dəhlizinin əhəmiyyətini xüsusi ilə diqqətə çatdıran Prezident İlham Əliyev qeyd edib ki, Cənub Qaz Dəhlizi layihəsi XXI əsrin ən mühüm enerji layihələrindən biridir. Bu layihə Azərbaycanın zəngin təbii qaz ehtiyatlarının beynəlxalq bazarlara çıxarılmasını təmin etməklə yanaşı, Avropa ölkələrinin enerji təhlükəsizliyinin möhkəmləndirilməsində də mühüm rol oynayır.

Uzun illər davam edən beynəlxalq əməkdaşlığın və böyük investisiyaların nəticəsi olan Cənub Qaz Dəhlizi vasitəsilə Azərbaycan qazı region ölkələrindən keçərək Avropa bazarına çatdırılır. Layihənin həyata keçirilməsi nəticəsində enerji mənbələrinin şaxələndirilməsi təmin edilir və enerji bazarında sabitlik artır.

Azərbaycanın enerji siyasətinin əsas məqsədi enerji resurslarının səmərəli istifadəsi, yeni ixrac marşrutlarının yaradılması və beynəlxalq əməkdaşlığın genişləndirilməsidir. Bu istiqamətdə həyata keçirilən layihələr region ölkələrinin iqtisadi inkişafına və enerji təhlükəsizliyinə mühüm töhfə verir. Tədbirdə ölkəmizin enerji siyasətinin əsas istiqamətlərindən də bəhs edən Prezident İlham Əliyev bildirib ki, Azərbaycan uzun illərdir ki, etibarlı enerji tərəfdaşı kimi tanınır və beynəlxalq enerji layihələrinin həyata keçirilməsində fəal iştirak edir. Sevindirici haldır ki, enerji sahəsində əldə olunan uğurlar ölkəmizin iqtisadi inkişafına müsbət təsir göstərir. Enerji sektoruna qoyulan investisiyalar yeni iş yerlərinin yaradılmasına, infrastrukturun inkişafına və iqtisadi sabitliyin güclənməsinə şərait yaradır.

Eyni zamanda, son illərdə dünya miqyasında enerji keçidi və bərpaolunan enerji mənbələrinin inkişafı prioritet istiqamətlərdən birinə çevrilib. Bu baxımdan Azərbaycan da yaşıl enerji sahəsində mühüm addımlar atır. Böyük bərpaolunan enerji potensialına malik Azərbaycanda günəş və külək enerjisi sahəsində geniş imkanlar mövcuddur. Belə ki, bu sahənin inkişafı üçün ölkəmiz bir sıra beynəlxalq enerji şirkətləri ilə əməkdaşlıq edilir və yeni layihələr həyata keçirilir.

Dövlətimizin başçısı onu da qeyd edib ki, Azərbaycanın bəzi bölgələrində, xüsusilə işğaldan azad edilmiş ərazilərdə “yaşıl enerji zonası” konsepsiyası həyata keçirilir. Bu təşəbbüs həmin ərazilərin ekoloji cəhətdən təmiz enerji ilə təmin olunmasını və dayanıqlı inkişafın təmin edilməsini nəzərdə tutur.

Enerji təhlükəsizliyinin qlobal səviyyədə böyük əhəmiyyət daşıdığını vurğulayan Prezident İlham Əliyev bildirib ki, enerji bazarında baş verən dəyişikliklər və yeni çağırışlar ölkələr arasında daha sıx əməkdaşlığı zəruri edir. Azərbaycan bu sahədə etibarlı tərəfdaş kimi çıxış edərək regionda enerji sabitliyinin təmin olunmasına mühüm töhfə verir. Ölkənin həyata keçirdiyi enerji layihələri həm region ölkələrinin, həm də Avropa dövlətlərinin enerji ehtiyaclarının qarşılanmasına xidmət edir.

Bakıda reallaşan, beynəlxalq enerji dialoqunun inkişafına xidmət edən mötəbər həm də beynəlxalq enerji dialoqunun inkişafı üçün mühüm platforma rolunu oynadı. Tədbirdə iştirak edən ölkələrin nümayəndələri enerji layihələrinin gələcək inkişafı, investisiya imkanları və bərpaolunan enerji sahəsində əməkdaşlıq məsələlərini müzakirə ediblər. Bu görüş ölkələr arasında qarşılıqlı etimadın möhkəmlənməsinə və yeni əməkdaşlıq imkanlarının yaranmasına şərait yaratdı. Eyni zamanda tədbir enerji sahəsində yeni təşəbbüslərin irəli sürülməsi və təcrübə mübadiləsinin aparılması baxımından da böyük əhəmiyyət kəsb etdi.

Cənub Qaz Dəhlizi və Yaşıl Enerji Məşvərət Şurasının iclası Azərbaycanın beynəlxalq enerji siyasətində mühüm rol oynadığını bir daha nümayiş etdirdi.

Paylaş:

Baxılıb: 458 dəfə