Azərbaycan-Gürcüstan əlaqələri: unikal tərəfdaşlıq nümunəsi

Bakı:

21 °C

64 %

9 m/s

Əlaqə

AZ RU EN

Ana səhifə / YAP xəbərləri / Azərbaycan-Gürcüstan əlaqələri: unikal tərəfdaşlıq nümunəsi

Azərbaycan-Gürcüstan əlaqələri: unikal tərəfdaşlıq nümunəsi

10.04.2026 [09:30]

Azərbaycan Respublikasının Prezidenti İlham Əliyevin aprelin 6-da Gürcüstana həyata keçirdiyi rəsmi səfər, təkcə iki dost və qonşu dövlət arasında münasibətlərin növbəti təsdiqi deyil, eyni zamanda regionun gələcək inkişaf trayektoriyasını müəyyən edən mühüm siyasi hadisə kimi tarixə düşdü. Səfər çərçivəsində dövlət başçısının mətbuata verdiyi bəyanat isə Azərbaycan–Gürcüstan münasibətlərinin mahiyyətini, dərinliyini və perspektivlərini aydın şəkildə ortaya qoydu. Bu bəyanat sadəcə diplomatik ritorika deyil, real siyasi iradənin, qarşılıqlı etimadın və ortaq strateji maraqların ifadəsidir.

Prezident İlham Əliyev çıxışında iki ölkə arasında münasibətlərin yüksək səviyyədə olduğunu vurğulamaqla yanaşı, bu əlaqələrin artıq regional sabitliyin əsas sütunlarından birinə çevrildiyini xüsusi qeyd etdi. Doğrudan da, Azərbaycan və Gürcüstan arasında qurulmuş əməkdaşlıq modeli Cənubi Qafqaz üçün nümunəvi tərəfdaşlıq formatıdır. Azərbaycan–Gürcüstan münasibətlərinin əsasında dayanan əsas amillərdən biri qarşılıqlı hörmət və daxili işlərə qarışmamaq prinsipidir. Bu yanaşma sayəsində iki ölkə uzun illərdir ki, etibarlı tərəfdaş kimi çıxış edir. Prezident İlham Əliyevin bəyanatında da bu məqam xüsusi vurğulandı və bildirildi ki, münasibətlərimiz sınaqlardan uğurla çıxaraq daha da möhkəmlənib. Səfərin diqqətçəkən məqamlarından biri iqtisadi əməkdaşlığın genişləndirilməsi ilə bağlı səsləndirilən fikirlər oldu.

Azərbaycan və Gürcüstan birgə həyata keçirdikləri enerji və nəqliyyat layihələri ilə artıq təkcə regionun deyil, daha geniş coğrafiyanın enerji təhlükəsizliyində mühüm rol oynayırlar. Xüsusilə Cənub Qaz Dəhlizi, Bakı–Tbilisi–Ceyhan və Bakı–Tbilisi–Qars kimi layihələr iki ölkənin strateji əməkdaşlığının konkret nəticələridir. Prezident İlham Əliyev bəyanatında bu layihələrin uğurla davam etdirildiyini və gələcəkdə yeni təşəbbüslərin də həyata keçiriləcəyini diqqətə çatdırdı. Bu baxımdan, Azərbaycan–Gürcüstan əməkdaşlığı təkcə iqtisadi deyil, həm də geosiyasi əhəmiyyət daşıyır. Regionda sabitliyin qorunması, sülh mühitinin möhkəmləndirilməsi və yeni əməkdaşlıq platformalarının yaradılması məhz bu tərəfdaşlığın sayəsində mümkün olur. Prezidentin çıxışında səsləndirdiyi fikirlər göstərir ki, Azərbaycan bölgədə konstruktiv və məsuliyyətli aktor kimi çıxış etməyə davam edir.

Səfər zamanı humanitar və mədəni sahələrdə əməkdaşlığın inkişafı da diqqətdən kənarda qalmadı. İki xalq arasında tarixi dostluq münasibətləri, ortaq dəyərlər və qarşılıqlı hörmət bu əlaqələrin daha da genişlənməsi üçün möhkəm zəmin yaradır. Prezident İlham Əliyev bu sahədə əməkdaşlığın dərinləşdirilməsinin vacibliyini qeyd etməklə yanaşı, xalqlar arasında əlaqələrin dövlətlərarası münasibətlərin əsas dayağı olduğunu vurğuladı. Eyni zamanda, səfər çərçivəsində regional təhlükəsizlik məsələlərinə də toxunuldu. Prezident İlham Əliyev bölgədə sülh və sabitliyin təmin olunmasının prioritet olduğunu bildirərək, Azərbaycan tərəfinin bu istiqamətdə ardıcıl siyasət apardığını diqqətə çatdırdı. Bu yanaşma, xüsusilə postmünaqişə dövründə yeni reallıqların formalaşdığı bir vaxtda böyük əhəmiyyət kəsb edir. Bu səfər və verilən bəyanat Azərbaycan dövlətinin ardıcıl, praqmatik və uzaqgörən siyasətinin bariz nümunəsidir. Prezident İlham Əliyevin rəhbərliyi ilə həyata keçirilən xarici siyasət kursu ölkəmizin beynəlxalq mövqelərini daha da gücləndirir, regionda nüfuzunu artırır və strateji tərəfdaşlıqları möhkəmləndirir.

Nəticə etibarilə, 2026-cı il aprelin 6-da Gürcüstana edilən səfər və mətbuata verilən bəyanat Azərbaycan–Gürcüstan münasibətlərində yeni mərhələnin başlanğıcı kimi qiymətləndirilə bilər. Bu səfər bir daha sübut etdi ki, iki ölkə arasında əməkdaşlıq yalnız bu günün deyil, həm də gələcəyin uğurlu inkişaf modelidir. Qarşılıqlı etimada, dostluğa və ortaq maraqlara əsaslanan bu münasibətlər regionda sülhün, sabitliyin və tərəqqinin əsas təminatçılarından biri olaraq qalacaq.

Səfa Ağayev

YAP İmişli rayon təşkilatının sədri

Paylaş:

Baxılıb: 481 dəfə