Nur paylayan ömür yolu - Akademik Zərifə xanım Əliyeva

Bakı:

20 °C

64 %

4 m/s

Əlaqə

AZ RU EN

Ana səhifə / YAP xəbərləri / Nur paylayan ömür yolu - Akademik Zərifə xanım Əliyeva

Nur paylayan ömür yolu - Akademik Zərifə xanım Əliyeva

15.04.2026 [19:17]

Azərbaycanın elm və ictimai fikir tarixində elə şəxsiyyətlər var ki, onların fəaliyyəti təkcə bir sahəni deyil, bütöv bir millətin mənəviyyatını və humanizm idealarını əks etdirir. Bu gün ölkəmizin hər yerində böyük ehtiramla anılan belə şəxsiyyətlərdən biri də görkəmli oftalmoloq-alim, akademik Zərifə xanım Əliyevadır. Aprel ayı onun həm anım, həm də doğum günü ərəfəsi olması ilə xalqımızın yaddaşında xüsusi bir ehtiram ayı kimi qalır.

Zərifə xanım Əliyevanın həyat yolu əsl ziyalılıq və xalqa xidmət nümunəsidir. O, görkəmli dövlət xadimi Əziz Əliyevin ailəsində dünyaya göz açmış, uşaqlıqdan zəhmətsevərlik və vətənpərvərlik ruhunda tərbiyə almışdır. Lakin onun ən böyük missiyası insanların dünyasını nurlandırmaq - onların görmə qabiliyyətini bərpa etmək və oftalmologiya elmində inqilabi yeniliklər etmək oldu.

Onun elmi fəaliyyəti sadəcə nəzəriyyə ilə məhdudlaşmırdı. Keçən əsrin ortalarında Azərbaycanda geniş yayılmış traxoma xəstəliyinə qarşı mübarizədə Zərifə xanımın rolu əvəzsizdir. O, ən ucqar rayonlara gedərək xəstəliyin kökünü kəsmək üçün fədakarlıq göstərmiş, minlərlə insanın yenidən dünyaya işıqlı gözlərlə baxmasına vəsilə olmuşdur.

Zərifə xanım Əliyeva təkcə Azərbaycanda deyil, keçmiş SSRİ məkanında və dünya elmi dairələrində yüksək nüfuz sahibi idi. O, oftalmologiyanın ən çətin sahələrindən biri olan peşə oftalmologiyası üzrə fundamental tədqiqatlar aparmışdır. Bu sahədəki misilsiz xidmətlərinə görə o, SSRİ Tibb Elmləri Akademiyasının ən nüfuzlu mükafatına - M.İ.Averbax adına mükafata layiq görülən ilk qadın alim kimi tarixə düşmüşdür.

Akademik Zərifə xanım Əliyeva həm də Azərbaycanın müasir dövlətçilik tarixinin qurucusu, Ulu Öndər Heydər Əliyevin ən yaxın silahdaşı və mənəvi dayağı idi. O, dahi rəhbərin çətin və məsuliyyətli yolunda ona hər zaman dəstək olmuş, ailə ocağının müqəddəsliyini qorumuşdur.

Bu gün biz Zərifə xanımı həm də Cənab Prezident İlham Əliyevin anası, ona yüksək mənəvi keyfiyyətləri aşılayan bir müəllim kimi xatırlayırıq. Onun xeyirxahlığı, alicənablığı və insanlara olan sevgisi bu gün Birinci vitse-prezident Mehriban xanım Əliyevanın fəaliyyətində, xeyriyyəçilik ənənələrində yaşayır.

Zərifə xanım Əliyeva 1985-ci ilin aprelində əbədiyyətə qovuşsa da, onun zəngin irsi və nurlu obrazı zaman keçdikcə daha da ucalır. Onun adına olan Milli Oftalmologiya Mərkəzi, küçələr, parklar və təhsil ocaqları bu böyük xanımın xalqımızın qəlbində nə qədər dərin iz qoyduğunun bariz nümunəsidir.

Bu gün biz onun əziz xatirəsini ehtiramla yad edərkən, bir daha əmin oluruq ki, xalqa nur və xeyirxahlıq bəxş edən ömürlər heç vaxt unudulmur. Ruhun şad olsun, böyük insan!

Ülkər Əliyeva

YAP Naxçıvan şəhər təşkilatının fəalı

Paylaş:

Baxılıb: 410 dəfə