Qaradağda Ümummilli Liderin anadan olmasının 103-cü ildönümü ilə əlaqədar silsilə tədbirlər davam edir

Bakı:

27 °C

40 %

7 m/s

AZ RU EN

Ana səhifə / YAP xəbərləri / Qaradağda Ümummilli Liderin anadan olmasının 103-cü ildönümü ilə əlaqədar silsilə tədbirlər davam edir

Qaradağda Ümummilli Liderin anadan olmasının 103-cü ildönümü ilə əlaqədar silsilə tədbirlər davam edir

04.05.2026 [13:25]

Qaradağ rayonunda Ümummilli Lider Heydər Əliyevin anadan olmasının 103-cü ildönümü ilə əlaqədar YAP Qaradağ rayon təşkilatının və Bakı şəhər Gənclər və İdman İdarəsi Qaradağ rayon sektoru ilə birgə təşkil etdiyi silsilə tədbirlər keçirilir.

Mayın 1-də “Təhsil” İdman Mərkəzinin 11 nömrəli Uşaq Gənclər İdman Məktəbində şahmat və stolüstü tennis növləri üzrə rayon turnirinin açılış mərasimi keçirilib.

Əvvəlcə Azərbaycan Respublikasının Dövlət Himni idmançı məktəblilərin ifasında canlı olaraq səsləndirilib. Ümummilli Lider Heydər Əliyevin və Vətən uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Açılış mərasimində çıxış edən məktəbin direktoru Natiq Ələkbərov Ulu Öndər Heydər Əliyevin müstəqil Azərbaycan dövlətinin formalaşmasında və inkişafında göstərdiyi misilsiz xidmətlərdən danışıb. Qeyd edib ki, Ümummilli Lider bütün sahələrlə yanaşı, bədən tərbiyəsi və idmanın inkişafına, gənc nəslin sağlam böyüməsinə də əvəzsiz töhfələr verib.

Çıxış edən YAP Qaradağ rayon təşkilatı sədrinin müavini Faiq Qurbanov bildirib ki, Ümummilli Lider Heydər Əliyevin anadan olmasının 103-cü ildönümü ilə bağlı təşkil edilən silsilə tədbirlər gənc nəslin vətənpərvərlik ruhunda tərbiyəsində, sağlam böyüməsində mühüm rol oynayır. O qeyd edib ki, müasir müstəqil Azərbaycanın memarı olan Ulu Öndərin dövlətçilik irsi xalqımızın yaddaşında daim yaşayacaqdır. Ulu Öndər Heydər Əliyevin əsasını qoyduğu gənclər siyasətinin Prezident İlham Əliyev tərəfindən uğurla davam etdirildiyini qeyd edən Faiq Qurbanov vurğulayıb ki, keçirilən idman yarışları həm Ümummilli Liderin dövlətçilik irsinin təbliği, həm sağlam həyat tərzinin təşviqi, həm də gənclərin fiziki inkişafı baxımından əhəmiyyətlidir.

Bakı Şəhər Gənclər və İdman İdarəsinin rayon üzrə sektor müdiri Elçin Abbasov çıxış edərək Ulu Öndərin əsasını qoyduğu idman siyasətinin bu gün Prezident İlham Əliyev tərəfindən uğurla davam etdirildiyini bildirib. O, gəncləri bədən tərbiyəsi və idmanla daha fəal məşğul olmağa dəvət edib.

Daha sonra yarışın qaydaları izah olunub.

Qaradağ rayonunun Sahil qəsəbəsində təşkil edilən turnirin mayın 5-də başa çatacağı gözlənilir.

Qeyd edək ki, qalib idmançılara mükafatlar mayın 8-də Lökbatan qəsəbəsində yerləşən Heydər Əliyev Parkında keçiriləcək ümumrayon tədbirində təqdim olunacaq.

Paylaş:

Baxılıb: 241 dəfə