Üçrəngli bayrağımızın azad torpaqlarda dalğalanması – gələcək nəsillərə böyük dövlətçilik əmanəti

Bakı:

24 °C

55 %

3 m/s

AZ RU EN

Ana səhifə / YAP xəbərləri / Üçrəngli bayrağımızın azad torpaqlarda dalğalanması – gələcək nəsillərə böyük dövlətçilik əmanəti

Üçrəngli bayrağımızın azad torpaqlarda dalğalanması – gələcək nəsillərə böyük dövlətçilik əmanəti

26.05.2026 [10:38]

Azərbaycan xalqının çoxəsrlik dövlətçilik tarixində üçrəngli bayrağımız xüsusi mənəvi və siyasi məna daşıyır. Azərbaycan Xalq Cümhuriyyətinin yadigarı olan müqəddəs bayrağımız xalqımızın milli kimliyinin, azadlıq ideallarının və müstəqillik əzminin rəmzidir. Bu gün həmin bayrağın işğaldan azad edilmiş torpaqlarımızda qürurla dalğalanması Azərbaycan tarixinin ən möhtəşəm və qürurverici hadisələrindən biri kimi yadda qalır. Bu böyük tarixi nailiyyət Prezident İlham Əliyev tərəfindən gələcək nəsillərə bəxş edilən unudulmaz dövlətçilik əmanətidir.

1918-ci ildə Azərbaycan Xalq Cümhuriyyəti tərəfindən qəbul edilən üçrəngli bayraq xalqımızın milli dəyərlərini və dövlətçilik fəlsəfəsini özündə əks etdirirdi. Mavi rəng türkçülüyü, qırmızı müasirliyi və inkişafı, yaşıl isə islam sivilizasiyasına bağlılığı ifadə edirdi. Bu bayraq Azərbaycan xalqının istiqlal arzularının, milli birliyinin və azadlıq ruhunun simvoluna çevrilmişdi. Sovet dövründə xalqımız uzun illər bu müqəddəs bayrağa həsrət qalsa da, müstəqillik arzusu heç vaxt unudulmadı.

1991-ci ildə Azərbaycanın dövlət müstəqilliyini bərpa etməsi ilə üçrəngli bayrağımız yenidən dövlət bayrağı kimi ucaldıldı. Lakin Ermənistanın hərbi təcavüzü nəticəsində torpaqlarımızın işğal olunması xalqımız üçün böyük ağrı və faciə idi. Uzun illər Azərbaycan xalqının ən böyük arzularından biri üçrəngli bayrağımızın Qarabağda və digər işğal altındakı torpaqlarda yenidən dalğalanması idi. Bu müqəddəs arzu illərlə xalqımızın qəlbində yaşadı və milli birlik ruhunu daha da gücləndirdi.

Prezident İlham Əliyev rəhbərliyi ilə Azərbaycan Ordusunun 44 günlük Vətən müharibəsində qazandığı möhtəşəm Zəfər nəticəsində ölkəmizin ərazi bütövlüyü təmin edildi və üçrəngli bayrağımız işğaldan azad olunmuş torpaqlarda ucaldıldı. Şuşada, Xankəndidə, Laçında, Kəlbəcərdə və digər azad edilmiş ərazilərdə Azərbaycan Bayrağının dalğalanması xalqımızın milli qürurunun və tarixi ədalətin bərpasının rəmzinə çevrildi. Bu hadisə yalnız hərbi qələbə deyil, həm də Azərbaycan dövlətçiliyinin və milli iradəsinin böyük zəfəri idi.

Bu gün işğaldan azad olunmuş torpaqlarda genişmiqyaslı quruculuq və bərpa işləri həyata keçirilir. Yeni yollar, məktəblər, xəstəxanalar, yaşayış kompleksləri tikilir, şəhər və kəndlər yenidən qurulur. Azərbaycanın üçrəngli bayrağı həmin torpaqlarda yalnız qələbənin deyil, həm də dirçəlişin, inkişafın və əbədi qayıdışın simvolu kimi dalğalanır. Prezident İlham Əliyevin həyata keçirdiyi siyasət nəticəsində Qarabağ və Şərqi Zəngəzur regionları yeni inkişaf mərhələsinə qədəm qoyub.

Azərbaycan Bayrağının azad torpaqlarda dalğalanması gələcək nəsillər üçün böyük mənəvi və siyasi əhəmiyyət daşıyır. Bu, xalqımızın mübarizə əzmini, dövlətinə sədaqətini və milli həmrəyliyini nümayiş etdirən tarixi nailiyyətdir. Azərbaycan xalqı bundan sonra da müstəqil dövlətini daha da gücləndirəcək, üçrəngli bayrağımız isə daim azad səmalarda qürurla dalğalanacaq.

Rauf Nəcəfəov

YAP Sədərək rayon təşkilatının məsləhətçi

Paylaş:

Baxılıb: 299 dəfə