Qlobal enerji gündəliyində Azərbaycanın artan rolu

Bakı:

28 °C

74 %

4 m/s

Əlaqə

AZ RU EN

Ana səhifə / YAP xəbərləri / Qlobal enerji gündəliyində Azərbaycanın artan rolu

Qlobal enerji gündəliyində Azərbaycanın artan rolu

04.06.2026 [14:39]

Müasir beynəlxalq münasibətlər sistemində enerji amili təkcə iqtisadi inkişaf vasitəsi deyil, həm də dövlətlərin xarici siyasət imkanlarını müəyyənləşdirən mühüm faktorlardan biridir. Son otuz il ərzində Azərbaycan bu sahədə uğurlu model formalaşdıraraq enerji resurslarını yalnız iqtisadi gəlir mənbəyi kimi deyil, eyni zamanda beynəlxalq əməkdaşlığın və diplomatik nüfuzun genişləndirilməsi aləti kimi istifadə etməyə nail olub. Prezident İlham Əliyevin Bakı Enerji Həftəsinin açılış mərasimində səsləndirdiyi fikirlər də bu siyasətin uğurlu nəticələrini əks etdirir.

Bu gün Bakı Enerji Həftəsi qlobal enerji gündəliyinin ən nüfuzlu platformalarından biri hesab olunur. Vaxtilə regional xarakter daşıyan sərgi kimi fəaliyyətə başlayan təşəbbüs illər ərzində dünyanın enerji sektorunda qərar qəbul edən əsas aktorlarını bir araya gətirən beynəlxalq tədbirə çevrilib. Tədbirə dünyanın aparıcı dövlət rəhbərlərinin xüsusi diqqət göstərməsi də bunun göstəricisidir. ABŞ Prezidenti Donald Trampın, Türkiyə Prezidenti Rəcəb Tayyib Ərdoğanın və Böyük Britaniyanın Baş naziri Kir Starmerin Bakı Enerji Həftəsinə ünvanladıqları məktublar Azərbaycanın beynəlxalq enerji siyasətində qazandığı nüfuzun bariz ifadəsi kimi qiymətləndirilə bilər.

Dövlət başçısının çıxışında səsləndirilən əsas mesajlardan biri enerji siyasətinə münasibətdə realizm və praqmatizmin vacibliyi ilə bağlı idi. Son illərdə dünyada enerji keçidi ilə bağlı aparılan müzakirələr fonunda neft və qaz hasil edən ölkələrə qarşı müəyyən stereotiplər formalaşdırılmağa çalışılırdı. Halbuki, qlobal iqtisadiyyatın mövcud reallıqları göstərir ki, dünya hələ uzun müddət ənənəvi enerji resurslarından istifadə etməyə davam edəcək. Prezident İlham Əliyevin vurğuladığı kimi, enerji təhlükəsizliyi ilə yaşıl gündəlik arasında balansın qorunması gələcəyin əsas çağırışlarından biridir.

Azərbaycanın mövqeyi də məhz bu prinsipə əsaslanır. Ölkəmiz hesab edir ki, dövlətlər sahib olduqları təbii sərvətlərə görə deyil, həmin sərvətlərdən əldə olunan gəlirləri necə idarə etdiklərinə görə qiymətləndirilməlidirlər. Azərbaycanın son otuz ildə keçdiyi inkişaf yolu bu yanaşmanın uğurlu olduğunu təsdiqləyir. Neft və qaz layihələrindən əldə edilən gəlirlər infrastrukturun yenilənməsinə, sosial proqramların maliyyələşdirilməsinə, təhsil və səhiyyə sisteminin inkişafına, eyni zamanda yaşıl enerji sektoruna investisiyaların artırılmasına yönəldilib.

Məhz bu siyasətin nəticəsidir ki, Azərbaycan bu gün təkcə enerji istehsalçısı deyil, həm də beynəlxalq investor kimi çıxış edir. Vaxtilə xarici sərmayələrin cəlb edilməsinə ehtiyac duyan ölkə artıq öz kapitalını müxtəlif regionlara ixrac edir. Dövlət Neft Şirkəti – SOCAR-ın Yaxın Şərqdə, Afrikada və Mərkəzi Asiyada həyata keçirdiyi layihələr Azərbaycanın iqtisadi təsir imkanlarının genişləndiyini göstərir. Bu proses həm də ölkənin beynəlxalq biznes mühitində etibarlı tərəfdaş statusunu möhkəmləndirir.

Azərbaycanın enerji diplomatiyasının uğurunun əsas səbəblərindən biri milli maraqlarla beynəlxalq əməkdaşlıq arasında düzgün balansın qorunmasıdır. Ölkə xarici investorlar üçün əlverişli mühit yaratmaqla yanaşı, strateji resursların milli inkişafın xidmətinə yönəldilməsini də təmin edib. Bu model nəticəsində həm investorlar, həm də Azərbaycan dövləti qarşılıqlı fayda əldə edib və uzunmüddətli tərəfdaşlıq münasibətləri formalaşıb.

Bakı Enerji Həftəsində səsləndirilən fikirlər bir daha göstərdi ki, Azərbaycanın enerji siyasəti yalnız hasilat və ixrac məsələləri ilə məhdudlaşmır. Bu siyasət beynəlxalq etimadın formalaşdırılması, yeni əməkdaşlıq platformalarının yaradılması və qlobal enerji gündəliyində fəal iştirak kimi strateji məqsədlərə xidmət edir. Məhz buna görə də Azərbaycan bu gün regional enerji mərkəzindən daha artıq məna daşıyan, beynəlxalq enerji diplomatiyasının təsirli iştirakçılarından biri kimi qəbul olunur.

Natiq Quluzadə

YAP Zəngilan rayon təşkilatının sədri

Paylaş:

Baxılıb: 310 dəfə