Heydər Əliyev – xalqın xilaskar lideri

Bakı:

21 °C

74 %

5 m/s

Əlaqə

AZ RU EN

Ana səhifə / YAP xəbərləri / Heydər Əliyev – xalqın xilaskar lideri

Heydər Əliyev – xalqın xilaskar lideri

11.06.2026 [11:40]

Tarixdə elə şəxsiyyətlər olur ki, onların fəaliyyəti bütöv bir xalqın taleyi ilə qovuşur. Azərbaycan xalqının Ümummilli Lideri Heydər Əliyev məhz belə dövlət xadimlərindən biridir. Onun siyasi fəaliyyəti yalnız müəyyən bir dövrlə məhdudlaşmır, müasir Azərbaycan dövlətçiliyinin formalaşması və möhkəmlənməsi ilə birbaşa bağlıdır.

1987-ci ildə Heydər Əliyevin Sovet İttifaqı rəhbərliyinin siyasətinə etiraz edərək vəzifələrindən istefa verməsindən qısa müddət sonra Azərbaycana qarşı ərazi iddialarının irəli sürülməsi təsadüfi hadisə kimi qiymətləndirilmir. Sonrakı illərdə baş verən hadisələr göstərdi ki, ölkənin taleyi güclü liderlik amili ilə sıx bağlıdır. Ulu Öndər Heydər Əliyevi siyasi fenomen kimi fərqləndirən əsas xüsusiyyətlərdən biri onun xalqın etimadını qazanması idi. 1993-cü ildə baş verən hadisələr zamanı Azərbaycan cəmiyyətində belə bir ümumi qənaət formalaşmışdı ki, ölkəni ağır vəziyyətdən çıxarmağa qadir yeganə şəxs məhz Heydər Əliyevdir. Bu inam dahi liderin tarixi missiyasının əsas dayaqlarından birinə çevrildi.

Ümummilli Liderin fəaliyyətində xüsusi yer tutan məqamlardan biri vətəndaş həmrəyliyinə verdiyi önəm idi. O hesab edirdi ki, ictimai-siyasi sabitlik olmadan heç bir inkişaf proqramı uğur qazana bilməz. “Mənim həyatım da, fəaliyyətim də yalnız və yalnız Azərbaycanın müstəqilliyinin qorunub saxlanmasına, ölkəmizin bu ağır vəziyyətdən qalxmasına həsr olunacaqdır” fikri də məhz bu məsuliyyət hissinin ifadəsi idi.

Ulu Öndər Heydər Əliyevin peşəkar dövlət xadimi kimi uğurunun əsasını bütün sahələri əhatə edən dərin biliklər, uzaqgörənlik, qətiyyət və diplomatik məharət təşkil edirdi. O, mürəkkəb geosiyasi şəraitdə Azərbaycanın milli maraqlarını qorumağı, dövlətçilik ənənələrini möhkəmləndirməyi və gələcək inkişaf üçün strateji hədəflər müəyyənləşdirməyi bacardı. Buna görə də dahi liderin adı tariximizə həm xilaskar, həm də müstəqil Azərbaycanın memarı kimi daxil olub.

Qeyd edək ki, 1992-ci ildə Yeni Azərbaycan Partiyasının yaradılması da Heydər Əliyevin siyasi irsinin mühüm hissəsidir. Qısa müddətdə ölkənin aparıcı siyasi qüvvəsinə çevrilən bu təşkilat sonrakı dövrlərdə dövlət idarəçiliyində mühüm rol oynadı.

Ulu Öndərin ən böyük arzularından biri Azərbaycanın ərazi bütövlüyünün bərpası idi. Şuşa, Laçın və digər işğal altında olan torpaqların azad ediləcəyinə dair ifadə etdiyi inam sonradan reallığa çevrildi. Prezident, Müzəffər Ali Baş Komandan İlham Əliyevin rəhbərliyi ilə əldə edilən tarixi Zəfər Heydər Əliyev siyasi kursunun davamlılığını və strateji uzaqgörənliyini təsdiqlədi. Bu gün dövlətimizin başçısı azad edilmiş torpaqlarda infrastruktur layihələrinin təməlini qoyur, Şuşada, Xankəndidə Novruz tonqalı alovlandırır, Böyük Qayıdışın reallaşdırılması istiqamətində təxirəsalınmaz tədbirlər həyata keçirir. Xalqımız əmindir ki, Prezident İlham Əliyevin rəhbərliyi ilə daha uca zirvələr fəth ediləcək, düşmənin yerlə-yeksan etdiyi Qarabağ dünyanın ən gözəl guşələrindən birinə çevriləcək.

Bu gün müstəqil, güclü və beynəlxalq aləmdə nüfuzlu Azərbaycan Ulu Öndər Heydər Əliyevin müəyyən etdiyi inkişaf konsepsiyasının nəticəsi kimi qiymətləndirilir. Onun adı xalqın yaddaşında dövlətçilik ideyasının, milli birliyin və müstəqilliyin simvolu kimi yaşayır və yaşayacaq.

Rüstəm Nağıyev,

YAP Gədəbəy rayon təşkilatının sədri

Paylaş:

Baxılıb: 152 dəfə