26 Avqust – Laçın Şəhəri Günü

Bakı:

26 °C

83 %

10 m/s

Əlaqə

AZ RU EN

Ana səhifə / YAP xəbərləri / 26 Avqust – Laçın Şəhəri Günü

26 Avqust – Laçın Şəhəri Günü

26.08.2026 [15:45]

Laçın... Bu adın özündə bir tarix, bir nisgil, bir qürur və böyük bir qayıdış dastanı yaşayır. Uca dağları, saf bulaqları, yaşıl meşələri ilə könüllərdə özünə əbədi yuva salan Laçın illər boyu doğma yurd həsrəti ilə yaşayan insanların arzularında yaşadı. Bu gün isə həmin arzu gerçəyə çevrilib – Laçın azaddır, Laçın dirçəlir, Laçın öz sakinlərini yenidən bağrına basır.

Azərbaycan Respublikasının Prezidenti İlham Əliyevin 31 iyul 2023-cü il tarixli Sərəncamı ilə Azərbaycanın işğaldan azad edilmiş ərazilərində şəhər günləri təsis edilib. Həmin Sərəncama əsasən, 26 avqust Laçın şəhəri günü kimi müəyyən olunub.

26 avqust Laçının tarixində qızıl hərflərlə yazılmış günlərdən biridir. 2022-ci il avqustun 26-da Azərbaycan Ordusunun bölmələrinin Laçın şəhərinə daxil olması ilə şəhərin həsrət dolu illərinə son qoyuldu. Bu xəbər illərlə doğma yurdunun yolunu gözləyən laçınlıların qəlbində sözlə ifadə olunması çətin olan bir sevinc yaratdı. İllər boyu ürəklərdə yaşadılan “Laçına qayıdacağıq!” arzusu nəhayət gerçəyə çevrildi.

Laçının azadlığı sadəcə bir şəhərin azad edilməsi deyildi. Bu, ata-baba torpaqlarına qayıdışın, tarixi ədalətin bərpasının, milli iradənin və böyük Zəfərin növbəti parlaq səhifəsi idi. Laçının hər daşı, hər qayası, hər bulağı sanki illər sonra öz doğmalarını salamlayırdı.

Bu torpaqlara qayıdışın arxasında böyük bir qəhrəmanlıq və fədakarlıq dayanır. Vətən uğrunda canından keçən şəhidlərimizin müqəddəs xatirəsi Laçının azad səmasında daim yaşayaq. Bu gün Laçının üzərində dalğalanan üçrəngli bayrağımız şəhidlərimizin ruhuna verilmiş ən böyük salam, onların müqəddəs əmanətinə sədaqətin rəmzidir.

İşğaldan azad olunmuş Laçında bu gün genişmiqyaslı quruculuq və bərpa işləri həyata keçirilir. Yeni yollar çəkilir, müasir yaşayış məhəllələri salınır, sosial obyektlər inşa edilir, şəhərin tarixi və mədəni simasının qorunması istiqamətində mühüm işlər görülür. Bir zamanlar səssizliyə bürünmüş küçələrdə yenidən insan səsləri eşidilir. Uşaqların gülüşü, ailələrin sevinci və həyatın adi axarı Laçının yenidən nəfəs aldığını göstərir.

Laçın bu gün yalnız yenidən qurulan şəhər deyil, həm də Böyük Qayıdışın rəmzlərindən biridir. Doğma torpaqlarına qayıdan insanların gözlərindəki sevinc, illərlə həsrətini çəkdikləri evlərinə yenidən qədəm qoymaları hər bir azərbaycanlının qəlbində duyğulu hisslər yaradır. Çünki yurd yalnız yaşanılan yer deyil – yurd insanın uşaqlığı, xatirələri, ata ocağı, doğmalarının izi və ürəyinin bir parçasıdır.

Laçının təbiəti də onun özünəməxsus gözəlliyini tamamlayır. Əzəmətli dağlar, gur bulaqlar, sıx meşələr və saf hava bu diyarın Allah tərəfindən bəxş edilmiş təbii sərvətləridir. Laçının hər guşəsi xalqımızın yaddaşında xüsusi bir xatirə daşıyır. Bu torpaqlara baxdıqca insan anlayır ki, Vətən sevgisi bəzən sözlə deyil, torpağın qoxusu ilə, bir bulağın səsi ilə, doğma dağların silueti ilə hiss olunur.

Bu gün Laçında qurulan hər ev, salınan hər küçə, açılan hər məktəb həm də gələcəyə ünvanlanan bir ümiddir. Laçın yenidən yaşayır və onun yeni tarixini öz doğma sakinləri yazır. Dünən həsrət olan bu torpaqlarda bu gün ümid, sevinc və quruculuq var.

26 avqust – Laçın şəhəri günü xalqımız üçün azadlığın, qayıdışın və yenidən doğuluşun rəmzidir. Bu əlamətdar tarix bizə bir daha göstərir ki, doğma yurda bağlılıq illərlə davam edən ayrılıqla belə sönmür. Əksinə, həsrət illəri Vətən sevgisini daha da alovlandırır.

Laçın bu gün azaddır. Onun səmasında Azərbaycan bayrağı dalğalanır, küçələrində həyat canlanır, doğma yurduna qayıdan insanların ayaq səsləri eşidilir. Laçın artıq həsrətin deyil, qayıdışın adıdır. Laçın artıq ayrılığın deyil, azadlığın simvoludur.

Qoy Laçının dağlarından yüksələn külək şəhidlərimizin ruhuna dualar aparsın, qoy bu torpaqlarda doğulan hər bir uşaq azad və firavan Laçında böyüsün. Qoy Laçının hər daşı, hər bulağı, hər küçəsi gələcək nəsillərə bu torpağın necə böyük bir sevgi ilə qorunduğunu və necə böyük bir əzmlə yenidən qurulduğunu danışsın.

26 Avqust – Laçın Şəhəri Günü mübarək!

Azad Laçın, mübarək! Sənin azadlığın Vətənimizin qüruru, qayıdışın isə xalqımızın ən kövrək və ən gözəl sevincidir.

Gülnar Əlizadə
YAP Şahbuz rayon Təhsil Şöbəsinin ərazi partiya təşkilatının sədri, Şahbuz rayon Təhsil Şöbəsinin aparıcı məsləhətçisi

Paylaş:

Baxılıb: 204 dəfə