YAP Nəsimi rayon təşkilatında 20 Yanvar faciəsinə həsr olunan tədbir keçirilib

Bakı:

18 °C

63 %

1 m/s

Əlaqə

AZ RU EN

Ana səhifə / YAP xəbərləri / YAP Nəsimi rayon təşkilatında 20 Yanvar faciəsinə həsr olunan tədbir keçirilib

YAP Nəsimi rayon təşkilatında 20 Yanvar faciəsinə həsr olunan tədbir keçirilib

17.01.2015 [11:06]

Dünən Yeni Azərbaycan Partiyası (YAP) Nəsimi rayon təşkilatında 1990-cı ilin Qanlı Yanvar hadisələri zamanı həlak olmuş bir qrup şəhidlərin ailə üzvləri və əlillərin iştrakı ilə görüş keçirilib. Tədbirdə YAP Nəsimi rayon təşkilatının sədri, Milli Məclisin üzvü Məlahət İbrahimqızı, Nəsimi rayon İcra Hakimiyyəti aparatının məsul işçiləri, eləcə də, rayon ictimaiyyətinin nümayəndələri də iştirak ediblər. Tədbiri giriş sözü ilə açan YAP Nəsimi rayon təşkilatının sədri, millət vəkili Məlahət İbrahimqızı qeyd edib ki, 20 Yanvar faciəsi Azərbaycan xalqının qəhrəmanlıq tarixinin şanlı səhifələrindən biridir. Odur ki, üstündən 25 il ötməsinə baxmayaraq, 20 Yanvar faciəsi zamanı şəhid olmuş insanların əziz xatirəsi istər respublikamızda, istərsə də ölkəmizdən kənarda yaşayan soydaşlarımız tərəfindən daim uca tutulur, hörmətlə anılır.
“Əgər biz qəhrəmanlıq tariximizin səhifələrini vərəqləsək, görərik ki, 20 Yanvar Azərbaycanın qəhrəmanlıq tarixində ən yüksəkdə, ən ucada dayanır. Bu elə bir tarixdir ki, məhz həmin gün Azərbaycan xalqı uzun illərdən bəri əsarətdə olduğu Sovet İmperiyasına qarşı əliyalın, inamlı mübarizəyə qalxdı, özünün müstəqillik tarixinin birinci mərhələsinə qədəm qoydu. Hesab edirəm ki, 20 Yanvar faciəsi olmasaydı, bəlkə də, Azərbaycan xalqının müstəqilliyə qovuşması müşkül olardı” - deyən natiq, salonda əyləşənlərin əksəriyyətinin bu faciənin canlı iştirakçısı olduğunu vurğulayıb.
Azərbaycanın zəngin karbohidrogen ehtiyatlarına malik olduğunu xatırladan millət vəkili, məhz bu səbəbdən də o illərdə bir çox xarici dövlətlərin bizim milli sərvətlərimizə göz dikdiyini, respublikamızın müstəqillik əldə etməsinə qarşı olduğunu deyib. Onun sözlərinə görə, məhz Dağlıq Qarabağ uğrunda başlanan müharibə də bu çirkin niyyətlərin məntiqi davamı idi. “İmperialist güclər Azərbaycan xalqının belə əzmkar, mübariz xalq olduğunu bilmirdilər. Azərbaycanlıların belə cəsarətli, şücaətli olduqlarını təsəvvürlərinə belə gətirmirdilər. Əgər 20 Yanvar faciəsi olmasaydı, bunu, bəlkə də, hələ uzun müddət bilməyəcəkdilər. Məhz Qanlı 20 Yanvar faciəsindən sonra, dünyanın müxtəlif beyin mərkəzlərində Azərbaycana qarşı hazırlanan məkrli niyyətlər alt-üst oldu. Onlar xalqımızın əzmkarlığı və qəhrəmanlığını görüb təşvişə düşdülər, geri çəkilməli oldular. Bu qəhrəmanlıq salnaməsini isə sizin doğmalarınız, bu salonda oturan igid oğullarımız öz qanları, canları və ruhları ilə yazmış oldular”, - deyə M.İbrahimqızı vurğulayıb.
Yeni Azərbaycan Partiyasının ölkədə hakimiyyətə gəldikdən sonra 20 Yanvar faciəsi qurbanlarının xatirəsini daim əziz tutduqlarını xatırladan rayon təşkilatının sədri, həmçinin, əlavə edib ki, şəhid ailələri, eləcə də, o qanlı hadisələrdə öz sağlamlıqlarını itirən əlillərə də daim diqqət və qayğı göstərilib. Onların sosial-məişət problemlərinin həlli daim diqqət mərkəzində saxlanılıb.
Tədbirdə çıxış edən YAP Nəsimi rayon təşkilatının sədr müavini Şakir Musayev 25 il əvvəl o dəhşətli gecədə həkimlərimizin mübariz əməllərindən danışıb. “Aparılan analizlər sübut etdi ki, Sovet qoşunları dinc əhaliyə qarşı qadağan olunmuş güllələrdən istifadə etməklə atəş açıblar. Bu zəhərli güllələr insanın sinir sisteminə təsir edir, onu əlilə çevirir və bir müddət sonra isə həyatını tamamilə məhv edir. Əgər həmin gecə paytaxt küçələrində növbə çəkən təcili tibbi yardım maşınları yaralıları vaxtında xəstəxanalara çatdırmasa idilər, həkimlərimiz vaxtında öz səylərini göstərməsə idilər, bəlkə də, 20 Yanvar gecəsi ölənlərin sayı daha da artıq olardı. Məhz həkimlərimizin fədakarlığı sayəsində şəhidlərimizin sayı az oldu”, - deyə o vurğulayıb.
Tədbirdə, həmçinin, “20 Yanvar” Cəmiyyətinin Nəsimi rayon şöbəsinin rəhbəri Tofiq Allahverdiyev və başqaları çıxış edərək 20 Yanvar faciəsindən, dövlətin şəhid ailələrinə və azadlıq uğrunda sağlamlığını itirən vətəndaşlara diqqət və qayğısından danışıblar.
Səlim Loğmanoğlu

Paylaş:

Baxılıb: 863 dəfə