Bakı Ali Neft Məktəbi YAP-la birgə 15 İyun - Milli Qurtuluş Gününə həsr olunan tədbir keçirib

Bakı:

24 °C

78 %

6 m/s

AZ RU EN

Ana səhifə / YAP xəbərləri / Bakı Ali Neft Məktəbi YAP-la birgə 15 İyun - Milli Qurtuluş Gününə həsr olunan tədbir keçirib

Bakı Ali Neft Məktəbi YAP-la birgə 15 İyun - Milli Qurtuluş Gününə həsr olunan tədbir keçirib

12.06.2021 [09:40]

Bakı Ali Neft Məktəbində (BANM) Yeni Azərbaycan Partiyasının (YAP) Sədr müavini - Mərkəzi Aparatın rəhbəri Tahir Budaqovun iştirakı ilə Azərbaycan xalqının taleyində böyük əhəmiyyət daşıyan 15 İyun - Milli Qurtuluş Gününə həsr olunan “Milli qurtuluşdan tarixi Zəfərə” adlı tədbir keçirilib. Karantin qaydalarına uyğun şəkildə təşkil edilən canlı görüş paralel olaraq onlayn formatda da yayımlanıb. Görüşə onlayn olaraq 900-dək iştirakçı qatılıb.
AZƏRTAC xəbər verir ki, YAP-ın Sədr müavini - Mərkəzi Aparatın rəhbəri Tahir Budaqov ilk olaraq ali məktəbdə yaradılan tədris şəraiti, maddi-texniki baza, sosial infrastruktur və tədqiqat mühiti ilə yaxından tanış olub. Bakı Ali Neft Məktəbinin rektoru Elmar Qasımov tədris üçün yaradılan şərait, infrastruktur, gələcək planlar barədə qonağa ətraflı məlumat verib.
Ulu Öndərin büstü önünə gül düzülüb, ali məktəbin tədris otaqlarına, tədqiqat laboratoriyalarına, İnnovasiya Mərkəzinə, neft tarixinə dair nadir eksponatların yer aldığı muzeyə baxış keçirilib.
Tədbirdə çıxış edən Tahir Budaqov diqqətə çatdırıb ki, tariximizdə Milli Qurtuluş Günü böyük ictimai, siyasi və tarixi əhəmiyyətə malikdir. Ümummilli Liderimiz Heydər Əliyevin 1993-cü il iyunun 15-də hakimiyyətə qayıtması xalqımızın çoxəsrlik tarixinə taleyüklü siyasi hadisə kimi daxil olub.
“Azərbaycan xalqının Ümummilli Lideri Heydər Əliyev öz xilaskarlıq missiyası ilə ölkəmizin müstəqilliyini qorudu, respublikada tüğyan edən ictimai-siyasi böhranı aradan qaldırdı və inkişafın təməlini qoydu. Bu gün milli qurtuluş ideologiyasının təntənəsi müstəqil respublikamızın davamlı inkişafında özünü büruzə verir, regionda və dünyada Azərbaycanın nüfuzu daha da artır. Bu gün Azərbaycanda müstəqil dövlətçilik ənənələri formalaşdırılmışdır və şübhəsiz ki, bu mühüm nailiyyətin əldə edilməsində Ulu Öndər Heydər Əliyevin fədakar xidmətlərinin müstəsna əhəmiyyəti vardır”, - deyə Tahir Budaqov qeyd edib.
O vurğulayıb ki, “Dəmir yumruq” əməliyyatı ilə qazanılan tarixi zəfərin əsasında Müzəffər Ali Baş Komandan, Prezident İlham Əliyevin liderlik keyfiyyətləri, Azərbaycanın siyasi, iqtisadi, mədəni, hərbi sahələrdə, eyni zamanda, xarici siyasətdə uğurları və xalq-iqtidar birliyi dayanır.
Bakı Ali Neft Məktəbinin rektoru Elmar Qasımov da öz növbəsində Ümummilli Lider Heydər Əliyevin 1993-cü il iyunun 15-də Azərbaycanda hakimiyyətə qayıdışını dövlətçilik tariximizin şanlı səhifəsi adlandırıb.
“Qazanılan bütün nailiyyətlərin əsasında Ümummilli Lider tərəfindən müəyyənləşdirilən siyasi kurs və Prezident İlham Əliyevin bu siyasi kursu uğurla davam etdirməsi faktı dayanır. Prezident İlham Əliyevin bu siyasəti uğurla həyata keçirməsi nəticəsində Azərbaycan dünyanın dinamik inkişaf edən, modernləşən, beynəlxalq miqyasda nüfuzu gündən-günə artan dövlətə çevrilib, ötən dövr ərzində möhtəşəm iqtisadi uğurlara imza atılıb”, - rektor əlavə edib.
Tahir Budaqova Bakı Ali Neft Məktəbinin “Fəxri qonaq” plaketi təqdim olunub.
Sonda Tahir Budaqov Bakı Ali Neft Məktəbinin tələbələrinin çoxsaylı suallarını cavablandırıb.

Paylaş:

Baxılıb: 794 dəfə