YAP-ın məqsədi Azərbaycanı daha qüdrətli görməkdir

Bakı:

10 °C

87 %

6 m/s

Əlaqə

AZ RU EN

Ana səhifə / YAP xəbərləri / YAP-ın məqsədi Azərbaycanı daha qüdrətli görməkdir

YAP-ın məqsədi Azərbaycanı daha qüdrətli görməkdir

24.10.2010 [11:25]

41 saylı Sumqayıt birinci seçki dairəsində Yeni Azərbaycan Partiyasının millət vəkilliyinə namizədi Leyla Abdullayevanın 30-cu məhəllə, 2/15 saylı binada yaşayan seçicilərlə görüşü olub
Noyabrın 7-də Azərbaycanda keçiriləcək növbəti parlament seçkiləri ilə bağlı təbliğat-təşviqat kampaniyası davam edir. Məlum olduğu kimi, bu kampaniya çərçivəsində millət vəkilliyinə namizədlər seçiciləri ilə görüşlər keçirir, öz platformaları barədə onlara ətraflı məlumat verirlər. Belə görüşlərdən biri də Sumqayıtda baş tutub. 41 saylı Sumqayıt birinci seçki dairəsindən Yeni Azərbaycan Partiyasının (YAP) millət vəkilliyinə namizədi Leyla Arif qızı Abdullayevanın 30-cu məhəllə, 2/15 saylı binada yaşayan seçicilərlə görüşü olub. Namizədin vəkillərinin də iştirak etdiyi tədbiri giriş sözü ilə açan YAP Sumqayıt şəhər təşkilatının sədri Asif İmaməliyev ölkəmizin növbəti siyasi proses ərəfəsində olduğunu deyib. Əhalinin bundan əvvəlki seçkilərdə olduğu kimi, bu dəfə də hakim Yeni Azərbaycan Partiyasının namizədlərinə səs verəcəklərinə əmin olduğunu deyən A.İmaməliyev sumqayıtlıların da bu prosesdə fəallıq göstərəcəklərini bildirib: “Mən inanıram ki, hər zaman dövlətçiliyə bağlılıqları ilə seçilən Sumqayıt seçiciləri bu dəfə də inkişafa - yəni, Yeni Azərbaycan Partiyasının namizədlərinə səs verəcəklər”.
Daha sonra, Asif İmaməliyev millət vəkilliyinə namizəd haqqında seçicilərə ətraflı məlumat verib: “Leyla Abdullayeva 2005-ci ildən 18 saylı orta məktəbin direktoru vəzifəsində çalışır. 1993-cü ildən Yeni Azərbaycan Partiyasının üzvüdür, partiyanın Sumqayıt şəhər təşkilatının Şura üzvü kimi daim təşkilatın işində yaxından iştirak edib”.
Tədbirdə çıxış edən namizədin vəkilləri Leyla Abdullayevanın qalib gələcəyi təqdirdə fəal və işgüzar bir millət vəkili olacağına əminliklərini ifadə ediblər.
çıxış edən Leyla Abdullayeva deyib ki, ümummilli liderimiz Heydər Əliyev tərəfindən əsası qoyulan Azərbaycan dövlətinin sosial inkişaf, iqtisadi tərəqqi, beynəlxalq aləmə inteqrasiya siyasəti Azərbaycanı böyük inkişaf yoluna çıxarıb: “Nəticədə, Azərbaycan bu gün regionun ən inkişaf etməkdə olan ölkəsinə çevrilib. Azərbaycanın qazandığı nailiyyətlər, əldə olunan uğurlar günü-gündən artır. Əhalinin həyat şəraiti yaxşılaşır, sosial problemlər həll edilir, şəhərlərimizdə geniş abadlıq-quruculuq işləri aparılır. Siyasi, iqtisadi, hüquqi, sosial islahatlar davam etdirilir, Azərbaycanın hərbi qüdrəti artır. Bu cür dinamik, quruculuq dövründə Milli Məclisin üzvlüyünə namizədliyimin Yeni Azərbaycan Partiyası tərəfindən irəli sürülməsi bu işlərdə daha yaxından iştirak etməyimə, xalqımızın, dövlətimizin başçısının yaxın köməkçisi olmağa və sumqayıtlıların etimadını doğrultmağa şərait yaradır”.
Leyla Abdullayeva əlavə edib ki, son illərdə ölkəmizdə aparılan siyasətin nəticəsində bütün sahələrdə böyük inkişaf müşahidə olunur. Bu inkişafdan Sumqayıt şəhərinə də pay düşdüyünü söyləyən namizəd dövlətimizin başçısının hər zaman Sumqayıta qayğı ilə yanaşdığını önə çəkib.
Tədbirin sonunda seçicilər çıxış edərək hakim partiyanın namizədinə səs verəcəklərini bəyan ediblər.
Nadir AZƏRİ

Paylaş:

Baxılıb: 1344 dəfə