Qardaşlıq münasibətlərinin təcəssümü

Bakı:

23 °C

48 %

3 m/s

Əlaqə

AZ RU EN

Ana səhifə / YAP xəbərləri / Qardaşlıq münasibətlərinin təcəssümü

Qardaşlıq münasibətlərinin təcəssümü

25.08.2023 [11:50]

Azərbaycan və Özbəkistan arasında münasibətlərin qədim tarixi var. Təbii ki, iki ölkə arasında münasibətlərin mövcudluğunun bir sıra səbəbləri vardır. Bu səbəblərə xalqlarımızın eyni soy-kökə, ortaq mədəniyyətə malik olmaları, həmçinin xalqımızın ümummilli lideri Heydər Əliyevin Özbəkistan rəhbərləri olmuş Şərəf Rəşidov və İslam Kərimov ilə olan dostluq münasibətləri də daxildir. Bir sözlə, bütün bunlar iki ölkə arasında münasibətlərin bugünkü inkişafının təməlini təşkil edir. Hazırda isə, Azərbaycan-Özbəkistan əlaqələrinin yüksək səviyyəyə çatmasında Prezident İlham Əliyevin və Prezident Şavkat Mirziyoyevin şəxsi münasibətləri də həlledici rol oynayır. Təsadüfi deyil ki, hər iki prezident dövlət səfərləri və rəsmi səfərlərdən əlavə müxtəlif beynəlxalq tədbirlər çərçivəsində də tez-tez görüşürlər.

Azərbaycan-Özbəkistan əlaqələrinin inkişafı baxımından 2022-ci il xüsusilə məhsuldar olub. Məhz həmin il dövlətimizin başçısının Özbəkistana üç dəfə səfər etməsi Azərbaycan Prezidentinin qardaş ölkə ilə əməkdaşlığın inkişafına böyük önəm verməsinin göstəricisidir. Ötən il iyunun 21-22-də Özbəkistana dövlət səfəri həyata keçirən Azərbaycan Prezidenti sentyabrın 15-16-da Şanxay Əməkdaşlıq Təşkilatına üzv ölkələrin Səmərqənddə keçirilmiş Sammitində fəxri qonaq qismində iştirak edib. Həmçinin Prezident İlham Əliyev Türk Dövlətləri Təşkilatının IX Zirvə görüşündə iştirak etmək üçün noyabrın 10-11-də Özbəkistanda səfərdə olub. Dövlətimizin başçısının bütün bu səfərləri zamanı əldə edilmiş razılaşmalar Mərkəzi Asiyanın aparıcı ölkələrindən olan Özbəkistanla əlaqələrimizin yeni mərhələdə əsas konturlarını müəyyənləşdirib.

Prezident cənab İlham Əliyevin uzaqgörən siyasətinin nəticəsi olaraq ölkəmizdə bir sıra mühüm nəqliyyat-logistika infrastrukturu yaradılıb və Azərbaycan beynəlxalq nəqliyyat şəbəkələrinə inteqrasiya olunub. Bütün bunlar Azərbaycan vasitəsilə Mərkəzi Asiya ölkələrindən, o cümlədən Özbəkistandan yükdaşımaların həcminin daha da artmasına təkan verəcək. Prezident cənab İlham Əliyevin ötən ilin iyununda Özbəkistana dövlət səfəri zamanı imzalanan “Azərbaycan Respublikası Hökuməti ilə Özbəkistan Respublikası Hökuməti arasında beynəlxalq avtomobil əlaqələri haqqında Saziş” bu baxımdan mühüm əhəmiyyət kəsb edir.

22 avqust tarixində Özbəkistan Respublikasının Prezidenti Şavkat Mirziyoyevin Azərbaycana rəsmi səfəri zamanı da bu və digər bir çox məsələlərlə bağlı müzakirələr aparılıb, gələcək perspektivlər bir daha nəzərdən keçirilib. Səfərlə əlaqədar Prezidentlərin mətbuata bəyanatlarında Prezident cənab İlham Əliyev müzakirə olunan məsələlərdən bəhs edərkən qeyd etdi ki, nəqliyyat-logistika sahəsində yük axınının artmasını və bu istiqamətdə əməkdaşlıq potensialının genişlənməsini müşahidə edirik.

Mətbuata bəyanatında Prezident cənab İlham Əliyev Özbəkistanın Qarabağın bərpası işinə verdiyi töhfədən də danışdı. Ölkə başçısı bildirdi ki, Özbəkistan Respublikasının Prezidenti Şavkat Mirziyoyevin şəxsi təşəbbüsü ilə işğaldan tam azad olunmuş Füzulidə məktəb inşa olunub və bu amil qardaşlıq, həmrəylik və dəstək jestidir. İnşa olunmuş məktəb özbək xalqının dahi oğlu Mirzə Uluqbəyin adını daşıyır və bu, təkcə təhsil ocağı deyil, eləcə də bizim dost və qardaşlığımızın daha bir mərkəzi olacaq.

Azərbaycan və Özbəkistanın dostluq və qardaşlığının daha bir göstəricisi isə iki ölkə arasında bu vaxtadək 160-dan çox sənədin, o cümlədən Strateji tərəfdaşlığın dərinləşdirilməsi və hərtərəfli əməkdaşlığın inkişafına dair Bəyannamənin imzalanmasıdır. Bütün bunlar isə ölkələrimiz arasında əməkdaşlıq üçün möhkəm hüquqi baza yaradıb.

Əlişah Rəcəbov

YAP Ağdaş rayon təşkilatının sədri

Paylaş:

Baxılıb: 564 dəfə