Sofiyada Novruz bayramı silsilə tədbirlərlə qeyd edilib

Bakı:

13 °C

94 %

2 m/s

Əlaqə

AZ RU EN

Ana səhifə / Xəbər lenti / Sofiyada Novruz bayramı silsilə tədbirlərlə qeyd edilib

Sofiyada Novruz bayramı silsilə tədbirlərlə qeyd edilib

29.03.2025 [13:27]

Müqəddəs Kliment Oxridski adına Sofiya Universitetinin nəzdində fəaliyyət göstərən Azərbaycan Dili və Mədəniyyəti Mərkəzi Novruz bayramına həsr edilmiş silsilə tədbirlər təşkil edib.

AZƏRTAC xəbər verir ki, bahar fəslinə, Novruz bayramına və bolqarların Baba Marta bayramına həsr edilmiş “Yaz paralelləri: Azərbaycan-Bolqarıstan” adlı rəsm və kompozisiyalar sərgisi Sofiya Universitetinin foyesində təntənə ilə açılıb. Layihə Bakı Slavyan Universitetinin Məktəb-Lisey Kompleksinin dəstəyi ilə həyata keçirilib. Sərgidə hər iki bayramla bağlı Məktəb-Lisey Kompleksinin şagirdlərinin və Mərkəzə göndərilən müxtəlif Azərbaycan universitetlərinin tələbələrinin rəsmləri, Sofiya Universitetinin türkologiya ixtisasında oxuyan tələbələrin, bolqar şagirdlərinin, uşaq bağçasından uşaqların və diaspora nümayəndələrinin əl işləri və kompozisiyaları nümayiş olunub.

Azərbaycanın Bolqarıstandakı konsulu Çingiz Qəribli, Türkiyə Respublikasının Bolqarıstan Respublikasındakı səfirliyinin təhsil müşaviri Mehmet Selim Varınca, Türkologiya və altayşünaslıq kafedrasının müdiri prof. Milena Yordanova, prof. Dimitr Veselinov, media nümayəndələri və digər qonaqlar milli bayram formatında keçirilən tədbirin qonaqları olublar.

Tədbiri giriş sözü ilə açan Azərbaycan Dili və Mədəniyyəti Mərkəzinin müdiri Sofiya Şıqayeva-Mitreska hər bir xalqın yazın gəlişini qeyd etməyin özünəməxsus tərzi və ənənələrinə malik olduğunu qeyd edərək Azərbaycan xalqının ən gözəl bayramlarından olan Novruz bayramından və bolqarların yaz bayramı Baba Marta bayramından qısa məlumat verib.

Klassik və müasir filologiya fakültəsinin dekanı, professor Qerqana Petkova qonaqları hər iki bayramla təbrik edərək, mərkəzin Sofiya Universitetinin ən böyük fakültəsinin bir hissəsi olduğunu, burada dünyanın bütün dillərinin öyrənildiyini, eləcə də türk dilləri üzrə, o cümlədən Azərbaycan dili üzrə kadrların hazırlandığını qeyd edib. O, bu cür mədəniyyət tədbirlərin keçirilməsinin hər iki xalqın qarşılıqlı anlaşması üçün çox vacib olduğunu vurğulayaraq universitetin tələbələri üçün isə öyrəndikləri dili və ölkəni Bolqarıstanda tanıtmaq üçün əlavə bir fürsət olduğunu qeyd etdi.

Azərbaycan Respublikasının Bolqarıstan Respublikasındakı konsulu Çingiz Qəribli həm Azərbaycanın, həm də Bolqarıstanın multikulturalizm və tolerantlıq dəyərlərinə malik olduqlarını və bu tədbirin mədəniyyətləri daha yaxından tanımağa imkan yaratdığını qeyd edib.

Bundan sonra tələbələr konsert proqramı ilə çıxış ediblər.

Paylaş:

Baxılıb: 404 dəfə