Ana dili – milli ruhumuzun və kimliyimizin əbədi yaşadanı

Bakı:

28 °C

48 %

7 m/s

Əlaqə

AZ RU EN

Ana səhifə / Xəbər lenti / Ana dili – milli ruhumuzun və kimliyimizin əbədi yaşadanı

Ana dili – milli ruhumuzun və kimliyimizin əbədi yaşadanı

31.07.2026 [09:43]

Dünyada hər bir xalqı tanıdan, onu başqalarından fərqləndirən müqəddəs dəyərlər var. Bu dəyərlər arasında ana dili xüsusi yer tutur. Ana dili xalqın tarixi yaddaşı, milli ruhu, mənəvi irsi və gələcəyə ünvanlanan ən qiymətli xəzinəsidir. Azərbaycan xalqı da minilliklər boyu öz dilini qoruyaraq, onu zənginləşdirərək bu günümüzə çatdırmışdır. Məhz buna görə də hər il avqustun 1-də qeyd olunan Azərbaycan əlifbası və Azərbaycan dili Günü hər bir azərbaycanlı üçün qürur və iftixar mənbəyidir.

Azərbaycan dili təkcə danışdığımız dil deyil. Bu dil Dədə Qorqudun hikmətidir, Nizaminin müdrikliyidir, Füzulinin sevgisidir, Vaqifin müdrik kəlamıdır, Cəlil Məmmədquluzadənin maarifçiliyidir, Üzeyir Hacıbəylinin musiqisidir. Əsrlər boyu xalqımızın sevincini də, kədərini də, qəhrəmanlığını da, mübarizəsini də məhz bu dil yaşadıb.

Tarix boyu Azərbaycan xalqı müxtəlif sınaqlarla qarşılaşıb. Müharibələr, işğallar, siyasi təzyiqlər xalqımızın iradəsini sarsıda bilməyib. Bunun əsas səbəblərindən biri də ana dilimizin yaşaması olub. Çünki xalq öz dilini qoruduqca milli varlığını da qoruyur.

Ulu Öndər Heydər Əliyevin "Xalqı xalq edən, milləti millət edən onun ana dilidir" fikri bu gün də öz aktuallığını qoruyur. Bu sözlər sadəcə bir ifadə deyil, dövlətçilik fəlsəfəsidir. Dilini sevən insan vətənini də sevir, tarixini də öyrənir, milli dəyərlərinə də sahib çıxır.

Azərbaycan dili əsrlər boyu zənginləşərək bu gün dünyanın ən ahəngdar və ifadə imkanları geniş olan dillərindən birinə çevrilmişdir. Dilimizin gözəlliyi onun poetikliyində, melodik ahəngində, zəngin söz ehtiyatında və incə məna çalarlarında özünü göstərir. Xarici qonaqların belə Azərbaycan dilini dinləyərkən onun ahənginə heyran qalmaları təsadüfi deyil.

Ulu Öndər Heydər Əliyev ana dilinin qorunmasını milli təhlükəsizlik məsələsi kimi qiymətləndirirdi. Onun rəhbərliyi ilə həyata keçirilən dil siyasəti nəticəsində Azərbaycan dili dövlət dili statusunu qazandı, hüquqi əsasları möhkəmləndirildi və cəmiyyət həyatının bütün sahələrində tətbiq olunmağa başladı. Bu siyasət yalnız bir dövr üçün deyil, gələcək nəsillər üçün də möhkəm təməl yaratdı.

Bu gün Prezident İlham Əliyev həmin siyasi xətti uğurla davam etdirərək Azərbaycan dilinin inkişafına xüsusi diqqət göstərir. Dövlət başçısının çıxışlarında ana dilimizin saflığının qorunması, yad sözlərin lüzumsuz işlədilməsinin qarşısının alınması, ədəbi dil normalarına əməl olunması daim ön plana çəkilir. Prezident İlham Əliyevin qeyd etdiyi kimi, Azərbaycan dili o qədər zəngindir ki, onun ifadə imkanlarını başqa dillərin sözləri ilə əvəz etməyə heç bir ehtiyac yoxdur.

Qloballaşma dövrü xalqlar qarşısında yeni çağırışlar yaradır. Müasir informasiya texnologiyaları, sosial şəbəkələr və sürətli kommunikasiya bəzən dillərin təbii inkişafına mənfi təsir göstərir. Təəssüf ki, gündəlik danışıqda və internet mühitində yad sözlərin həddindən artıq işlədilməsi, dil normalarının pozulması halları da müşahidə olunur. Belə şəraitdə ana dilini qorumaq təkcə dilçilərin və müəllimlərin deyil, bütün cəmiyyətin vətəndaşlıq borcuna çevrilir.

Ailə bu müqəddəs missiyanın ilk ünvanıdır. Uşağın eşitdiyi ilk söz ana laylasıdır. İlk öyrəndiyi sözlər onun gələcək nitqinin, düşüncə tərzinin və milli kimliyinin formalaşmasına təsir göstərir. Valideynlərin öz övladları ilə saf və düzgün Azərbaycan dilində danışması gələcəyimizə qoyulan ən böyük sərmayədir.

Məktəblər isə bu prosesin davamıdır. Müəllimlərin ana dilinə sevgi aşılaması, şagirdlərdə mütaliə vərdişlərinin formalaşdırılması, klassik və müasir Azərbaycan ədəbiyyatının təbliği gənc nəslin milli ruhda yetişməsinə xidmət edir. Çünki kitab oxuyan, ana dilinin zənginliyini mənimsəyən gənc milli dəyərlərinə daha möhkəm bağlı olur.

Medianın və sosial şəbəkələrin də məsuliyyəti böyükdür. Televiziya, radio, qəzetlər və internet resursları cəmiyyət üçün nümunə rolunu oynayır. Ədəbi dil normalarına riayət olunması, düzgün nitq mədəniyyətinin təbliği və Azərbaycan dilinin gözəlliyinin qorunması informasiya məkanında çalışan hər kəsin vətəndaşlıq borcudur.

Azərbaycan dili bu gün təkcə ölkəmizdə deyil, dünyanın müxtəlif guşələrində yaşayan milyonlarla soydaşımızı bir-birinə bağlayan mənəvi körpüdür. Xaricdə yaşayan azərbaycanlı ailələrin övladlarına ana dilini öyrətməsi milli həmrəyliyimizin qorunması baxımından mühüm əhəmiyyət daşıyır. Çünki insan harada yaşamasından asılı olmayaraq, doğma dilində danışdıqca Vətənlə bağlarını da yaşadır.

Bu gün hər bir azərbaycanlı ana dilimizin qorunması naminə öz üzərinə düşən məsuliyyəti dərk etməlidir. Dilimizi zənginləşdirən sözlərdən istifadə etmək, onu sevərək öyrənmək, düzgün yazmaq və danışmaq milli kimliyimizə göstərilən hörmətin ifadəsidir. Ana dilini qoruyan xalq öz gələcəyini də qoruyur.

Azərbaycan əlifbası və Azərbaycan dili Günü hər birimiz üçün təkcə bayram deyil, həm də məsuliyyət günüdür. Bu əlamətdar tarix bizə bir daha xatırladır ki, ana dilimiz dövlətimizin dayağı, milli varlığımızın rəmzi və gələcəyimizin təminatıdır. Bu müqəddəs sərvəti qorumaq, inkişaf etdirmək və gələcək nəsillərə olduğu kimi ötürmək hər birimizin mənəvi borcudur. Çünki dilini sevən xalq heç vaxt öz milli kimliyini itirməz və tarix səhnəsində daim ləyaqətlə yaşayır.

Ziyadə Dadaşova

Siyəzən Rayon Mədəniyyət Mərkəzinin direktoru

Paylaş:

Baxılıb: 103 dəfə