Qurultaydan GÖZLƏNTİLƏR

Bakı:

22 °C

53 %

2 m/s

Əlaqə

AZ RU EN

Ana səhifə / Xəbər lenti / Qurultaydan GÖZLƏNTİLƏR

Qurultaydan GÖZLƏNTİLƏR

10.09.2022 [11:00]

Mətbuat Şurasında hansı yeniliklər gözlənilir?

Yeganə BAYRAMOVA

Sentyabrın 24-də Azərbaycan jurnalistlərinin növbəti qurultayı keçiriləcək. Qurultayda Mətbuat Şurasının İdarə Heyətinin yenilənəcəyi bildirilib. Şura sədri postuna da yeni simanın gələcəyi deyilir. Nizamnaməyə görə, sədr qurultayda İdarə Heyətinin üzvləri arasından seçiləcək. Artıq qurultaya hazırlıq üzrə Təşkilat Komitəsi də yaradılıb. Qurultay nümayəndələrinin seçilməsi mərhələsinə start verilib. Eyni zamanda, Mətbuat Şurasının rəhbərliyinin yenilənməsi də nəzərdə tutulur.

Yeniləşən Mətbuat Şurası daha çox işlər görəcək

Qurultayla bağlı “Yeni Azərbaycan”a danışan “525-ci qəzet”in baş redaktoru Rəşad Məcid bildirib ki, Mətbuat Şurasının üzvləri olan qurumlar Mətbuat Şurası İdarə Heyətinə namizədlər irəli sürəcəklər. Daha sonra bu namizədlər içində ən çox səs yığanlar qurultaya səsverməyə buraxılacaqlar. Onlar da Mətbuat Şurasının İdarə Heyətinin sədrini seçəcəklər: “Qurultay nümayəndələrinin iradəsiylə məsləhət gördükləri şəxs də bu vəzifəni icra edəcək. Düşünürəm ki Mətbuat Şurasında üzvlərin yarısından çoxu yeni simalar, xüsusən də gənclər olmalıdır. Bununla yanaşı, cəmiyyətdə nüfuzu, jurnalistlər arasında etibarı olan həm ictimaiyyət nümayəndələri, həm də mətbuat işçiləri yenə heyətdə olmalıdır. Daha çox müstəqil insanların orada olmasına şərait yaradılmalıdır ki, Şuranın özünütənzimləmə qurumu kimi fəaliyyətində onların rolu olsun. 2003-cü ildən Mətbuat Şurasının İdarə Heyətinin üzvüyəm. Jurnalistlər etimad göstərsə, bu dəfə də qurumun İdarə Heyətində olacağam. Şəxsin özünün namizədliyini irəli sürməsi etik deyil. Əgər namizədliyimi kimlərsə irəli sürsə, şübhəsiz ki, Mətbuat Şurasının gələcək fəaliyyəti barədə fikirlərim var”.

R.Məcid qeyd edib ki, qurumda yeni simaların varlığı onun fəaliyyətində mühüm istiqamətlər müəyyənləşdirəcək: “Ümumiyyətlə, Mətbuat Şurasının fəaliyyətini əksər insanlar müsbət qiymətləndirir. Sadəcə olaraq, son bir neçə ildə Şura zəiflətmişdi və yaxud Mətbuat Şurasına etimad azalmışdı. Qurum özünü doğrultmamışdı. Buna görə də Mətbuat Şurasının nüfuzu aşağı düşmüşdü. Amma demək olmaz ki, Mətbuat Şurası bu illərdə heç nə iş görməyib. Mətbuatın özünütənzimləməsində, bir sıra şikayətlərin məhkəmələrə qədər həll olunmasında Şuranın böyük rolu olub. Əminəm ki, yeniləşən Mətbuat Şurası daha çox iş görəcək. Hazırkı sədr Əflatun Amaşovun Mətbuat Şurasının ərsəyə gəlməsində, fəaliyyətində çox böyük xidmətləri olub. Əminəm ki, Əflatun Amaşov yenə Mətbuat Şurasının üzvü seçiləcək. Əgər özü sədr olmaq istəməsə, başqa adamın sədr seçilməsi mümkündür”.

Yeni sədr mətbuatın problemlərinə həssas yanaşmalıdır

“Şərq” qəzetinin baş redaktoru Akif Aşırlının sözlərinə görə Mətbuat Şurasına yeni seçiləcək sədr Əflatun Amaşov kimi birləşdirici rola malik olmalı və mətbuatın problemlərinə həssas yanaşmalıdır: “Əflatun Amaşov uzun müddət Azərbaycan mətbuatının inkişafına çalışıb və 19 ilə yaxın bu quruma rəhbərlik edib. Mətbuat Şurası elə bir strukturdur ki, orada daim birləşdirici, müxtəlif fikirləri ortaq məxrəcə gətirə biləcək insanın olmağı müsbət effekt verir. Bu şuranın fəaliyyətini kimlərsə müsbət, kimlərsə mənfi qiymətləndirir. Bir şeyi unutmamalıyıq ki, Mətbuat Şurası qeyri-hökumət və jurnalistlərin könüllü birlik təşkilatıdır. Azərbaycanda 50-yə yaxın jurnalist təşkilatı fəaliyyət göstərir. Fakt isə odur ki, ən böyük tənqidlərin və hədəflərin ünvanı Mətbuat Şurası olub. Amma qurumun səmərəsiz fəaliyyəti ilə bağlı fikirlərə qatılmıram”.

Akif Aşırlı qeyd edib ki, yeni sədrin də birləşdirici, daha müasir düşüncəyə sahib olması, mətbuatın problemlərinə həssas yanaşması və ciddi şəkildə bunu ictimailəşdirməsi arzuolunandır: “Düşünürəm ki, budəfəki qurultaya daha ciddi və tənqidi yanaşma müşahidə edəcəyik. Qurultaylar hər zaman demokratik və açıq müzakirələrlə keçirilib. Heç bir gərginliyə yol vermədən Azərbaycan jurnalistləri bir araya gəlməli, Mətbuat Şurasının idarə Heyətini formalaşdırmalı və yeni sədrini seçməlidir”.

Paylaş:

Baxılıb: 551 dəfə