Su ehtiyatları azalır: İçməli su problemi yarana bilər?

Bakı:

24 °C

73 %

5 m/s

Əlaqə

AZ RU EN

Ana səhifə / Xəbər lenti / Su ehtiyatları azalır: İçməli su problemi yarana bilər?

Su ehtiyatları azalır: İçməli su problemi yarana bilər?

03.11.2022 [10:59]

Azərbaycanda su ehtiyatları azalmaq üzrədir. Bu barədə ekologiya və təbii sərvətlər naziri Muxtar Babayev “Azərbaycanda Yaşıl Transformasiya üzrə Dayanıqlı İnkişaf Məqsədləri” mövzusunda konfransda deyib.

Onun sözlərinə görə, dünya əhalisinin böyük hissəsi su qıtlığından əziyyət çəkir və gələcəkdə bu problemin daha da kəskinləşəcəyi gözlənilir. Ölkəmizdə də iqlim dəyişmələrinin təsiri nəticəsində su ehtiyatlarının azalması tendensiyası müşahidə olunur.

Nazir qeyd edib ki, su ehtiyatlarının səmərəli istifadəsi, itkilərin azaldılması, yeni su mənbələrinin yaradılması, idarəetmənin elektronlaşdırılması və digər istiqamətlərdə genişmiqyaslı tədbirlər həyata keçirilir: “Su ehtiyatlarından səmərəli istifadə ilə bağlı geniş maarifləndirmə işləri aparılır. Sosial-iqtisadi inkişafla əlaqədar ətraf mühitin artan təsirlərdən mühafizəsi və ekoloji vəziyyətin yaxşılaşdırılmasında bütün maraqlı tərəflər iştirak etməlidir. Özəl sektor və vətəndaş cəmiyyəti institutları ilə səmərəli əməkdaşlıq qurulmalıdır. Ətraf mühitin deqradasiyasına səbəb ola biləcək fəaliyyətlərin qarşısının alınması istiqamətində tədbirlər daha da gücləndirilməlidir. Yaşıl iqtisadiyyata keçid mərhələsində suya qənaət, xammaldan təkrar istifadə, kənd təsərrüfatında ekoloji təmiz istehsal prinsipləri, sənayedə ətraf mühitə dost texnologiyaların tətbiqi, su hövzələrinin, bioloji müxtəlifliyin və meşələrin qorunması kimi məsələlərdə daha məsuliyyətlə hərəkət etməli, beynəlxalq əməkdaşlığı gücləndirməli, ekoloji problemlərin həllinə gətirib çıxara biləcək bütün imkanlardan istifadə etməliyik.

2030-cu ilə qədər dayanıqlı inkişaf gündəliyi kontekstində görüləcək bu tədbirlər təkcə Azərbaycanın deyil, bütün dünyada, regionda dayanıqlı inkişafa təkan verəcək. Bu fəaliyyətin həyata keçirilməsində BMT nəzdindəki təşkilat və proqramlardan daha geniş əməkdaşlıq imkanları olacaq”.

“Azərsu” ASC-nin Mətbuat xidmətinin rəhbəri Anar Cəbrayıllının “Yeni Azərbaycan”a açıqlamasına görə, qlobal iqlim dəyişmələrinin içməli su mənbələrinə müəyyən təsirləri var. Qurum rəsmisi bildirib ki, bu gün şəhərlərimizdəki bəzi qəsəbələri təmin edən su mənbələrində məhsuldarlığın azalmasını müşahidə edirik: “Məsələn, Şamaxı, Ağsu, Tovuz şəhərlərinin mənbəyində su ehtiyatlarının azalması nəticəsində məhsuldarlıq aşağı düşüb. Ona görə də “Azərsu” ASC-nin tədbirlər planına uyğun olaraq, ötən illərdə adıçəkilən şəhərlərdə alternativ su mənbələri yaradılıb və əhalinin istifadəsinə verilib. Eyni zamanda istismar etdiyimiz bəzi subartezian quyularında su səviyyəsinin azalması və məhsuldarlığın aşağı düşdüyünü hiss edirik. Su ehtiyatlarının azalması fonunda vaxtilə bəzi kəndlər və qəsəbələrin təbii su mənbələri olan bulaqların quruması ilə bağlı bizə vətəndaşlardan müraciətlər gəlir. Siyəzən, Lerik, Yardımlı, Şabran, Tovuz, Oğuz, Quba və Xaçmaz rayonlarının bəzi kəndlərində vaxtilə mövcud olan bulaqların quruması və məhsuldarlığın azalması nəticəsində vətəndaşlar “Azərsu”ya müraciət ediblər. Onlar dədə-babalarının istifadə etdikləri bulaqlarda məhsuldarlığın azaldığını, hətta yay aylarında qurumaq üzrə olduğunu bildiriblər. Ona görə də quruma müraciət edərək xahiş ediblər ki, həmin kəndlərlə bağlı müvafiq layihələr icra edək.

Ümumi durum belədir ki, bu gün su ehtiyatlarının azalması əhalinin içməli su təchizatına elə də ciddi təsir göstərməyib. Çünki hazırda Azərbaycanda ümumi şirin su ehtiyatlarının təxminən 2 faiz civarı içməli suya yönəldilir. Taxtakörpü su anbarı, Xanbulançay su mənbəyi, həmçinin mənbə kimi istifadə etdiyimiz Mingəçevir su anbarı əhalinin içməli su təminatına dayanıqlı şəkildə töhfələr verir”.

Yeganə BAYRAMOVA

Paylaş:

Baxılıb: 1016 dəfə