Biznes qurmaq...

Bakı:

26 °C

52 %

2 m/s

Əlaqə

AZ RU EN

Ana səhifə / Xəbər lenti / Biznes qurmaq...

Biznes qurmaq...

15.06.2023 [11:43]

Riskli, həm də gəlirli sahə

Qönçə QULİYEVA

Müasir dövrün tələbləri günü-gündən dəyişir. Bu isə əmək bazarına birbaşa təsir edir. Əmək bazarının tələblərini dəyişməsi insanların əksəriyyətini sıravi işçi kimi çalışmaqdan uzaqlaşdırır. Bu səbəblə insanlar düzənli maaşdan imtina edir və öz şəxsi biznesini qurmağa başlayırlar. Hətta biznes kiçik gəlirli olsa belə...

İş qurmaq və öz işinin müdiri olmaq xüsusən də yeni nəslin ən böyük arzularından biridir. Keçmişlə müqayisədə 21-ci əsrdə biznes qurmaq sözün əsl mənasında “trend”ə çevrilib. Araşdırmalar göstərir ki, 1980-ci ildən sonra doğulan nəslin əvvəlki nəsillə müqayisədə biznes qurmaq cəhdləri daha çoxdur. Yeni nəsil maaşlı işin öz performanslarını və bacarıqlarını azaltdığı fikrindədir. Bu səbəbdən son vaxtlar kiçik və orta biznesin sayında artım müşahidə edilir.

Biznes iqtisadiyyatın təməl daşıdır. Kiçik və orta sahibkarlıq nə qədər güclü olarsa, iqtisadiyyat da bir o qədər güclü və böhranlara qarşı davamlı olar. Biznes fəaliyyətinin davamlı olması ölkənin iqtisadiyyatının inkişaf etməsində ən önəmli faktordur. Kiçik və orta sahibkarlarlıqla məşğul olmaq istəyənlər, bu işə yeni başlayanlar biznesdə uğur qazanmaq üçün nə etməlidirlər? - Sualımızı iqtisadçı ekspert Xalid Kərimli cavabladı.

X.Kərimli bildirdi ki, Sahibkarlıqla məşğul olmaq istəyənlər öz bilik və bacarıqlarına uyğun biznes seçməlidirlər: “ Təbii ki, yeni biznes fəaliyyəti ilə məşğul olmaq istəyənlər adətən az kapital tələb edən işlərə üz tuturlar. Bizneslə məşğul olmaq üçün ya fiziki, ya da hüquqi şəxs kimi VÖEN almaq lazımdır. Adətən ilk dəfə bizneslə məşğul olanlar rəqabətin çox olduğu sahələri seçmirlər. Bizneslə məşğul olmazdan öncə uğurlu sahibkar olmağın yollarını öyrənmək lazımdır. Sahibkar təşəbbüskar, yenilikçi xüsusiyyətlərinə malik olmalıdır. Bizneslə məşğul olarkən digərlərindən fərqli üsullarla təqdim etmək uğur qazanmağa kömək edəcəkdir. Əgər təkrarlanan fəaliyyət olarsa, daha güclü bizneslərlə rəqabət aparmaq çətin olacaq. Yəni, siz araşdırmalı və ödənilməyən tələbatı tapmalı və ya insanlarda tələbat yaratmalısınız. Biznes üçün önəmli olan məqamlardan biri də, təşkilatçılıq qabiliyyətidir. Bilməliyik ki, biznesdə qazanc olduğu kimi risklər də mövcuddur. Yəni, riskə hazırlıqlı olmaq lazımdır. Bundan başqa, bazarı düzgün proqnozlaşdırmaq, biznesi düzgün planlaşdırmaq, işin düzgün təşkil edilməsi diqqət edilməli nüanslardır. Cəmiyyətimizdə sahibkarlıq elit təbəqə hesab edilir. Çünki sahibkar həm işverən, həm də vergi ödəyəndir. İnsanlar psixoloji olaraq müstəqil olmağa üstünlük verdiklərinə görə biznes fəaliyyətini seçirlər. Biznes fəaliyyətində daha çox pul qazanmaq imkanları mövcuddur. Risk edib pul itirmək olsa da, düzgün qurulmuş biznesə uğur gətirəcəkdir”.

Biznes qurmaq çətin, riskli və əziyyətli işdir. Lakin bines fəaliyyətinin iqtisadiyyata təsir gücünə malik olduğunu nəzərə alaraq, dövlətimiz sahibkarlara daim diqqətlə yanaşır. Sahibkarların problemlərinin həlli üçün çalışır, hətta yeni biznes qurmaq istəyənlərə kömək edir və sahibkarlar üçün güzəştli şərtlərlə kredit təklif edir. Bundan başqa, Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən həyata keçirilən özünüməşğulluq proqramı vasitəsilə bizneslə məşğul olmaq istəyənlərə yardım edilir. DMA-nın mətbuat katibi Əsmər Nəcməddinqızı “Yeni Azərbaycan” qəzetinə məşğulluq proqramı barədə məlumat verib: “ Öz biznesini qurmaq istəyən şəxslərə dəstək olduğumuz istiqamət özünə məşğulluq proqramıdır.Vətəndaş əgər özü işini qurmaq istəyirsə, DMA-ə müraciət edir. Proqram çərçivəsində məşğuluq imkanları qiymətləndirilir. Qeydiyyatdan keçir və karyera məsləhətçiləri iş qurmaq istəyən vətəndaşlarla danışıqlar aparır. Vətəndaş özünüməşğulluq proqramı üçün uyğun namizəddirsə, həmin proqram üzrə qeydiyyata alınır. Daha sonra vətəndaşın şəraitinə baxış keçirilir, təlimlərdə iştirak edir və qiymətləndirilməyə cəlb olunur. Bundan sonrakı mərhələdə vətəndaş biznesi üzrə avadanlıqlarla təmin olunur. Vətəndaşın işi bir il ərzində nəzarətdə saxlanılır və yoxlanılır. Bu yoxlanış ona görə aparılır ki, vətəndaşın avadanlıqlardan düzgün istifadəsi təmin edilsin. Bir ildən sonra avadanlıqlar vətəndaşın mülkiyyətinə verilir ”.

Paylaş:

Baxılıb: 716 dəfə