“Qərbi Azərbaycan” efirdədir...

Bakı:

20 °C

88 %

5 m/s

Əlaqə

AZ RU EN

Ana səhifə / Xəbər lenti / “Qərbi Azərbaycan” efirdədir...

“Qərbi Azərbaycan” efirdədir...

02.08.2023 [11:28]

Həqiqətlərimiz fərqli formatda çatdırılacaq

Qərbi Azərbaycan İcması Azərbaycanın nüfuzunun və mövqeyinin real görüntüsünü yaratmaqla beynəlxalq səviyyədə addımlar atmaqdadır. İcma Qərbi Azərbaycanda soydaşlarımızın başına gələn müsibətlərin dünyaya çatdırılmasında mühüm xidmətlər göstərir. İcmanın Azərbaycan-Ermənistan sülh danışıqlarının normallaşmasına, soydaşlarımızın Qərbi Azərbaycana qayıdış hüququnun tanınmasına qarşı qonşu ölkədə və beynəlxalq aləmdə pozucu hərəkətlərlə bağlı bəyanatları da onun fəaliyyətinə aydınlıq, konkretlik gətirir, mübarizənin kəsərliyini artırır.

Dünəndən etibarən isə İcmanın nəzdində yeni “Qərbi Azərbaycan TV” internet televiziyası fəaliyyətə başlayıb. İlkin olaraq həftədə 4 dəfə saat 17:00-da iki saatlıq efirdə olacaq kanalın Azərbaycan və rus dillərində buraxılışları nəzərdə tutulub. İcmadan bildirilib ki, gələcəkdə ingilis dilində də efirin olması planlaşdırılır.

Qərbi Azərbaycan İcmasının mətbuat katibi Ülviyyə Zülfiqar “Yeni Azərbaycan”a açıqlamasında bildirib ki, son 2 əsrdə Qərbi Azərbaycandakı tarixi torpaqlarımızda soydaşlarımıza qarşı sayı-hesabı olmayan etnik təmizləmə, deportasiya, soyqırımı siyasəti həyata keçirilib. Onun sözlərinə görə, təkcə 10 milyonluq Azərbaycan xalqı olaraq yox, 50 milyonluq dünya azərbaycanlıları olaraq hamımızın bir nömrəli vəzifəsi Azərbaycanın suveren ərazilərinin, ərazi bütövlüyünün təmin olunması idi: “Başlıca hədəf Qarabağ, Şərqi Zəngəzur torpaqlarının erməni işğalından azad olunması idi. 2020-ci il 27 sentyabrda başlanan əks-hücum əməliyyatı zamanı müzəffər Ali Baş Komandanımızın rəhbərliyi altında son 2 əsrdə ilk dəfə olaraq işğal olunmuş torpaqlarımızı düşməndən azad edə bildik. Böyük bir Zəfər qazandıq.

Artıq bizim qarşımızda tarixi torpaqlarımıza, Qərbi Azərbaycana qayıtmaq uğrunda mübarizə aparmaq üçün gerçək perspektiv yarandı. Qərbi Azərbaycan İcması kimi yenidən təşkilatlanaraq fəaliyyətimizi siyasi-diplomatik yöndə davam etdirməyə qərar verdik. Ötən il 24 dekabrda Prezident İlham Əliyev Qərbi Azərbaycan İcmasının yeni inzibati binasına gəldi. Dövlət başçısının burada proqram xarakterli çıxışında, qarşımızda yeni vəzifələr, tapşırıqlar qoyması artıq bizim fəaliyyətimizi tamam yeni bir mərhələyə yönəltdi. İndi isə faəliyyətimizi yeni bir sferada da davam etdiririk. “Qərbi Azərbaycan TV”-nin fəaliyyətə başlaması bunun əyani sübutudur. Məlumdur ki, Qərbi Azərbaycan İcması bu günə qədər həqiqətlərimizi dünyaya çatdırmaq üçün mütərəqqi addımlar atıb. Sevindirici haldır ki, bu həqiqətlərimizi fərqli tribunadan, internet televiziyamız vasitəsilə çatdıracağıq”.

Ü.Zülfiqar qeyd edib ki, TV-də bir-birindən maraqlı süjetlər, Qərbi Azərbaycan mədəniyyətinə dair verilişlər, soydaşlarımızın ağrı-acısını əks etdirən insan hekayələri yayımlanacaq: “İzləyicilərin son 200 ildə soydaşlarımızın, tarixi-mədəni abidələrimizin, toponimlərimizin üzləşdiyi haqsızlıq, eləcə də qarşıda dayanan geri qayıdış məqsədi və məramına dair zəngin efir izləmək imkanı olacaq”.

Qərbi Azərbaycan İcmasının üzvü, deputat Anar Məmmədov bildirib ki, İcma Azərbaycanla bağlı həqiqətləri dünyaya bəyan etməklə uğurlu addımlar atmaqdadır: “Artıq həmin addımlardan biri də “Qərbi Azərbayan TV” internet televiziyasının fəaliyyətə başlaması oldu. Yaxın zamanlarda televiziyanın ingilis dilində yayımlanması da planlaşdırılır. Bu isə ermənilərin törətdiyi cinayətlərin beynəlxalq müstəvidə şərh olunması baxımından mühüm əhəmiyyət kəsb edir. Bütün bunlar öz məqsədimizə çatmaq uğrunda inamlı mübarizəmizi gücləndirir və İcmamızı öz hədəfinə sürətlə yaxınlaşdırır. Qərbi Azərbaycan həqiqətləri artıq ciddi beynəlxalq dəstək qazanır. Ümid edirəm ki, internet televiziyası da İcma kimi mühüm və mütərəqqi addımlar ataraq haqq səsimizi dünyaya çatdıracaq”.

Yeganə BAYRAMOVA

Paylaş:

Baxılıb: 749 dəfə