Sülh müqaviləsini razılaşdırmaq üçün...

Bakı:

21 °C

83 %

2 m/s

Əlaqə

AZ RU EN

Ana səhifə / Xəbər lenti / Sülh müqaviləsini razılaşdırmaq üçün...

Sülh müqaviləsini razılaşdırmaq üçün...

25.10.2023 [16:14]

Danışıqlar regional əməkdaşlığı gücləndirməyə xidmət edir

G.QABİLQIZI

Oktyabrın 24-də Azərbaycanın xarici işlər naziri Ceyhun Bayramov Rusiya xarici işlər nazirinin Azərbaycan-Ermənistan münasibətlərinin normallaşdırılması üzrə xüsusi nümayəndəsi İqor Xovayevi qəbul edib.

Ceyhun Bayramov bu görüşdə bir sıra əhəmiyyətli məqamlara toxunaraq bildirib ki, öhdəliklərə zidd olaraq son 3 il ərzində Azərbaycan ərazisindən çıxarılmayan qanunsuz erməni silahlı qüvvələrinə qarşı həyata keçirilmiş antiterror tədbirləri nəticəsində Azərbaycanın öz suveren ərazilərinə nəzarəti tam olaraq təmin etməsindən sonra, Azərbaycanla Ermənistan arasında sülh müqaviləsinin qısa müddətdə razılaşdırılması üçün real şanslar var.

Görüşdə Qarabağın erməni sakinlərinin Azərbaycanın qanunvericiliyi çərçivəsində ölkəmizin ərazisində Azərbaycan vətəndaşı kimi yaşaması üçün bütün imkanların yaradıldığı, bunun üçün reinteqrasiya məqsədilə müvafiq portalın fəaliyyət göstərdiyi qeyd edilib. Eləcə də Azərbaycan və Ermənistan arasında sülh prosesinin perspektivləri, regionda mövcud vəziyyət və son inkişaflar, eləcə də Tehranda “3+3” regional platforması çərçivəsində keçirilmiş görüşün nəticələri müzakirə edilib. Görüş zamanı, qarşılıqlı maraq doğuran digər məsələlər ətrafında da fikir mübadiləsi aparılıb.

Həmin gün Azərbaycanın xarici işlər naziri Ceyhun Bayramov və Rusiya Federasiyasının xarici işlər naziri Sergey Lavrov arasında telefon danışığı da baş tutub.

Azərbaycan Xarici İşlər Nazirliyindən verilən məlumata görə, telefon danışığı zamanı nazirlər Azərbaycanla Rusiya arasında ikitərəfli və çoxtərəfli əməkdaşlıq gündəliyi, Azərbaycan-Ermənistan sülh prosesinin perspektivləri, bölgədəki cari vəziyyət, “3+3” regional platformasının Tehranda keçirilmiş nazirlər iclasının nəticələri, Xəzəryanı ölkələrin Xarici İşlər Nazirləri Şurasının cari ilin dekabr ayında Moskvada keçirilməsi nəzərdə tutulan iclasının gündəliyində duran məsələlər barədə fikir mübadiləsi aparıblar. Eləcə də Azərbaycan və Ermənistan arasında davamlı sülhün bərqərar edilməsi istiqamətində real şansların olduğu, bölgədə yaranmış tarixi imkanın əldən verilməməsinin vacibliyi vurğulanıb.

Politoloq İlyas Hüseynov mövzu ilə bağlı “Yeni Azərbaycan”a açıqlamasında bildirib ki, Azərbaycan və Rusiya arasında olan münasibətlər 22 fevral 2022-ci il tarixində imzalanan müttəfiqlik qarşılıqlı fəaliyyəti haqqında bəyannamədən irəli gələn vəzifələri özündə birləşdirir: “Burada ərazi bütövlüyü, təhlükəsizlik, suverenlik, terrorçuluqla mübarizə və regional əməkdaşlığın gücləndirilməsi əsas prioritet kimi qəbul olunur. Düşünürəm ki, müxtəlif təmaslar, danışıqlar da məhz elə regional əməkdaşlığın daha da gücləndirilməsi naminədir. Tehranda “3+3” formatında keçirilən görüş də bunu deməyə əsas verir. Region dövlətləri öz gələcəyini, öz təhlükəsizlik sahəsini özləri müəyyənləşdirməlidirlər və bu artıq konkret bir aksiomaya çevrilmiş vəziyyətdədir. Çünki kənar oyunçular, kənar maraqları olan dövlətlər bu regiona öz niyyətləri ilə gəlirlər və bu da heç vaxt sülhə xidmət etmir. Çətin və spesifik regionda yerləşməyimiz səbəbindən əsas məqsədimiz bütün riskləri və təhdidləri neytrallaşdırmaq, onların qarşısını almaq və tədbirlər görməkdən ibarətdir. Azərbaycan öz təhlükəsizliyini təmin etmək, bütün qarşıya çıxan problemləri aradan qaldırmaq üçün müvafiq tədbirləri bundan sonra da gücləndirəcəkdir”.

Paylaş:

Baxılıb: 597 dəfə