Mavi səmanın “qanadlı əjdahaları”...

Bakı:

25 °C

55 %

3 m/s

Əlaqə

AZ RU EN

Ana səhifə / Xəbər lenti / Mavi səmanın “qanadlı əjdahaları”...

Mavi səmanın “qanadlı əjdahaları”...

07.12.2023 [11:25]

Beynəlxalq mülki aviasiya günüdür

Yeganə BAYRAMOVA

Xəyalları dünyanın özü qədər geniş və sərhədsiz olan insanlar həmişə yeni məkanlara can atıblar. Hələ texnika haqqında təsəvvürlərin ibtidai səviyyədə olduğu dövrlərdə nağıl qəhrəmanları öz xəyallarını uçan xalçalarla reallaşdırıblar. Sehrli xalçalar onları çayların, meşələrin üzərindən keçirərək bütün yer üzünü səyahətə çıxarıb. Əlbəttə, uçan xalçalarla göyün ənginliklərinə qalxmaq bir arzu idi. Ancaq niyyətin hara, mənzilin də oradır, deyiblər. Sonradan elmin inkişafı sayəsində 18-ci əsrin sonları-19-cu əsrin əvvəllərində rus, fransız, alman və Amerika mühəndisləri ilk uçan aparatların - “qanadlı əjdahalar” adlandırılan təyyarələrin müxtəlif modellərini hazırladılar. Bununla da bəşəriyyətin tarixində təyyarə erası başladı.

7 dekabr dünyada Beynəlxalq Mülki Aviasiya günü kimi qeyd olunur. Bu gün 6 dekabr 1996-cı ildə BMT Baş Assambleyası tərəfindən elan olunub. Mülki aviasiyamızın təməli yaxın keçmişimizlə bağlı deyil. Bu yolda bir əsrdən artıq tarixi mərhələ var...

Azərbaycanda ilk təyyarə uçuşları 1910-cu ildə Bakının səmasında baş tutub. Bu, rus aviatoru Utoçkinin “Farman” tipli aeroplanla Balaxanı “şossesində” 4 gün ardıcıl olaraq həyata keçirdiyi uçuş olub. Azərbaycan aviasiyasının tarixi həmin zamandan yazılıb. Maraq doğuran hadisədən sonra Azərbaycanda təyyarə uçuşlarının sayı sürətlə artmağa başlayıb və qısa zamanda Bakıda və Yevlaxda aerodromlar tikilərək istifadəyə verilib. Azərbaycanın aviasiya tarixində uzaq məsafəyə ilk uçuş 1919-cu ildə həyata keçirilib. Azərbaycan mülki aviasiyası 1920-ci ilin aprelindən sonra SSRİ aviasiyasının tərkib hissəsi kimi fəaliyyət göstərib. Bu dövrdə Azərbaycan aviasiyası bir sıra məhdudiyyətlərlə qarşılaşsa da, müəyyən irəliləyişlərə də nail olub. 1938-ci il iyunun 2-də Mülki Hava Donanması Baş İdarəsinin əmri ilə Mülki Hava Donanmasının Azərbaycan aviasiya dəstəsi yaradılıb. Mülki aviasiya ilə bağlı bu xronoloji ardıcıllıq aviasiyanın keçdiyi yolun tarixinə həkk olub.

Ulu Öndərin gerçəkləşdirdiyi quruculuq salnaməsinin ən mühüm hissələrindən biri Azərbaycan dövləti və xalqı üçün böyük əhəmiyyət kəsb edən mülki aviasiya sahəsi olub. 1970-ci illərdə Ulu Öndərin Azərbaycana rəhbərliyi dövründə Respublikada mülki aviasiyanın inkişafı üçün böyük işlər görülüb. Azərbaycan Mülki Aviasiyası onun diqqətindən heç vaxt yayınmayıb

Mülki aviasiyadan digər keçmiş müttəfiq respublikalar kimi, Azərbaycanın da payına düşən və ötən əsrin 90-cı illərinin əvvəlində istifadə olunan “TU-154”, “YAK-40”, “AN-2” təyyarələri, “Mİ-6” və “Mİ-2” helikopterləri idi.

1992-ci ildə Azərbaycan Hava Yolları Dövlət Konserni yaradılıb. Ümummilli lider Heydər Əliyevin yenidən Azərbaycanda siyasi hakimiyyətə qayıdışı mülki aviasiyamızın tarixində yeni eranın başlanğıcı idi. Belə ki, 1994-cü ildə Mülki Aviasiya Mərkəzinin bazasında Milli Aviasiya Akademiyası yaranıb. Bu gün akademiyada peşəkar kadrlar-təyyarəçilər, aviasiya mühəndisləri, uçuşların təminatı üzrə mütəxəssislər hazırlanır.

Paylaş:

Baxılıb: 547 dəfə