Proses başladı...

Bakı:

29 °C

42 %

2 m/s

Əlaqə

AZ RU EN

Ana səhifə / Analitik / Proses başladı...

Proses başladı...

20.08.2025 [08:51]

Minsk Qrupu ləğv edilir

Yaxın zamanda ATƏT-nin Minsk Qrupunun ləğv olunması gözlənilir. Belə ki, Finlandiyanın Xarici İşlər Nazirliyində yaradılmış Hədəf Qrupu rəhbərinin müavini, finlandiyalı diplomat Toni Sandell “Report” İnformasiya Agentliyinin Avropa bürosuna şərhində bildirib ki, ATƏT-ə sədrlik edən Finlandiya Azərbaycan və Ermənistanın Minsk qrupunun ləğvi ilə bağlı birgə müraciətinə cavab olaraq lazımi tədbirlərə başlayıb. Onun sözlərinə görə, Avropa Təhlükəsizlik və Əməkdaşlıq Şurasının sədri kimi Finlandiya avqustun 8-də Vaşinqtonda imzalanmış sazişləri alqışlayır. Sandell qeyd edib ki, bu sazişlər Azərbaycan və Ermənistan arasında münasibətlərin normallaşmasında və regionda davamlı sülhün əldə olunmasında mühüm mərhələdir - o, bildirib ki, Finlandiya iki ölkənin birgə müraciətinin cavablandırılması prosesinə başlayıb və əlavə məlumat daha sonra veriləcək. Daha əvvəl də ATƏT-in Parisdəki mənzil-qərargahından “Report”a bildirilmişdi ki, hazırkı sədr bu barədə təşkilata üzv olan ölkələrlə məsləhətləşmələr aparmağa hazırlaşır. Qeyd edək ki, Azərbaycan və Ermənistan Minsk Qrupunun ləğvi ilə bağlı ATƏT-ə birgə müraciət edib. Avqustun 8-də iki ölkənin xarici işlər nazirləri bu sənədi Vaşinqtonda Azərbaycan, Ermənistan və ABŞ liderlərinin iştirakı ilə imzalayıblar. ATƏT-in Minsk Qrupunun ləğvi Azərbaycanın Ermənistanla sülh müqaviləsi imzalanması üçün iki mühüm şərtindən biri olub.

Bu ilin sonunda...

Məsələ ilə bağlı politoloq Rəşad Bayramov “Yeni Azərbaycan” qəzetinə şərhində qeyd edib ki, ATƏT-nin Minsk Qrupunun ləğvi ilə bağlı qərar bu ilin sonunda Helsinkidə ATƏT-nin üzv ölkələrinin XİN rəhbərlərinin görüşündə qəbul ediləcək.

“Azərbaycan və Ermənistanın birgə müraciətindən sonra artıq Minsk Qrupunun ləğvi ilə bağlı proses başlayıb. ATƏT-nin daxili qərarvermə prosedurlarına uyğun olaraq, ATƏT-ə sədrlik edən Finlandiyanın Xarici İşlər Nazirliyi Azərbaycan və Ermənistanın birgə müraciətini ATƏT-nin bütün üzv ölkələrinə göndərib. Bu prosesə birbaşa Finlandiya rəhbərlik edəcək. Bu ilin sonunda məhz bu ölkənin paytaxtı Helsinki şəhərində ATƏT-nin üzv ölkələrinin XİN rəhbərlərinin görüşü keçiriləcək. Bu görüşdə ATƏT-nin Minsk Qrupunun ləğvi ilə bağlı məsələ müzakirəyə çıxarılacaq. Hesab edirəm ki, bu proses uzun çəkməyəcək. Keçmiş münaqişə tərəflərinin müraciətini, o cümlədən Minsk Qrupuna vaxtilə həmsədrlik etmiş ABŞ və Fransanın, eləcə də Minsk Qrupunun digər üzv ölkələrinin mövqeyini nəzərə alsaq, ATƏT-nin üzv ölkələrinin Helsinkidə baş tutacaq görüşündə Minsk Qrupunun ləğvi ilə bağlı yekun qərar qəbul olunacaq. Təkcə Minsk Qrupu deyil, həmçinin keçmiş münaqişə ilə bağlı yaradılan Yüksək Səviyyəli Planlaşdırma Komitəsi və ATƏT-nin sədrinin Minsk Qrupundakı şəxsi nümayəndəliyi strukturunun ləğvi barədə də məsələ qaldırılacaq. Yekun qərar ATƏT-nin bütün üzv ölkələrinin konsensusu əsasında qəbul olunacaq”, - deyən R.Bayramov əlavə edib ki, çox maraqlı siyasi proseslər baş verir. “ATƏT-in Minsk Qrupu 1992-ci ildə Finlandiyada təsis edilib. Bu qurumun ləğvi ilə bağlı qərar da Finlandiyanın ev sahibliyi edəcəyi ATƏT-nin XİN rəhbərlərinin görüşündə qəbul ediləcək. Əgər ABŞ və Fransa Minsk Qrupunun ləğvini dəstəkləyirsə, quruma üzv olan digər ölkələr də eyni mövqedən çıxış edəcək. Nəhayət ki, uzun müddət fəaliyyətdə olduğu dövrdə münaqişə tərəfləri arasında sülh yarada bilməyən, münaqişənin həllində maraqlı olmayan, üzərinə düşən vəzifələri yerinə yetirməyən və BMT-nin Təhlükəsizlik Şurasının qətnamələrinin icrası istiqamətində heç bir addım atmayan Minsk Qrupunun ləğvi prosesinə şahidlik edirik”.

Yunis ABDULLAYEV

Paylaş:

Baxılıb: 617 dəfə