Putin mesaj verdi - Qarabağ məsələsi bitib!

Bakı:

22 °C

52 %

2 m/s

Əlaqə

AZ RU EN

Ana səhifə / Analitik / Putin mesaj verdi - Qarabağ məsələsi bitib!

Putin mesaj verdi - Qarabağ məsələsi bitib!

09.02.2022 [10:49]

Taleh

Moskvada Rusiya Prezidenti Vladimir Putin və Fransa Prezidenti Emmanuel Makron arasında 5 saatdan çox davam edən danışıqların əsas mövzusu Ukrayna ətrafındakı vəziyyət oldu. Bu səpkidə Avropadakı gərginlik və Rusiya Federasiyası üçün təhlükəsizlik təminatları da müzakirə edildi.

Bununla belə, danışıqlar zamanı dövlət başçıları Qarabağ ətrafındakı vəziyyətə də toxundular. Rusiya Prezidenti fransalı həmkarı ilə danışıqların yekunlarına dair birgə mətbuat konfransında tərəflərin sülhməramlıların Qarabağdakı fəaliyyətini yüksək qiymətləndirdiyini bildirdi. “Biz ATƏT-in Minsk qrupu həmsədrlərinin regionda mövcud humanitar və sosial-iqtisadi problemlərin həlli istiqamətində fəaliyyətinin əhəmiyyətini bir daha təsdiq etdik”, - deyə Rusiya dövlətinin başçısı bildirdi.

Azərbaycan 44 günlük müharibədə qələbə qazanmaqla münaqişəyə son qoydu. Münaqişədən sonrakı nizamlanma prosesinin bir çox məsələləri Rusiyanın vasitəçiliyi ilə keçirilən üçtərəfli görüşlər çərçivəsində həll olunub. ATƏT-in Minsk Qrupu isə uzun illər ərzində münaqişənin sülh yolu ilə həlli üçün üzərinə düşən vəzifələrin öhdəsindən gələ bilmədi. Prezident İlham Əliyevin, Fransa Prezidenti Emmanuel Makronun, Avropa İttifaqı Şurasının sədri Şarl Mişelin və Ermənistanın baş naziri Nikol Paşinyanın iştirakı ilə fevralın 4-də videoformatda keçirilən görüşdə də ATƏT-in Minsk qrupunun reanimasiyası ilə bağlı heç nə deyilmədi.

Tanınmış rusiyalı ekspert, İslam Əməkdaşlıq Təşkilatı Gənclər Forumunun Avrasiya Regional Mərkəzinin kafedrasının ekstremist ideologiyaya qarşı mübarizə üzrə müşaviri Yevgeni Mixaylovun fikrincə, indiki mərhələdə bu təşkilatın proseslərdə iştirakından danışmağa dəyməz: “Amma güman edə bilərəm ki, Rusiya və Fransa prezidentləri arasında bu mövzunun müzakirəsi təsadüfi deyil. Rusiya bununla ATƏT-in Minsk qrupunun digər həmsədrlərinə sülh prosesində iştirak imkanı yarada bilər. Fransa Ermənistana açıq və birtərəfli dəstək verməklə dəfələrlə özünü gözdən salıb. Lakin Prezident Putin təcrübəli siyasətçi və diplomat kimi Parislə necə davranmağı yaxşı bilir. O, Fransanı Azərbaycan ilə Ermənistan arasında sülh müqaviləsinin hazırlanmasında iştiraka cəlb edə bilər”.

Siyasi şərhçi İlqar Vəlizadə isə deyib ki, əvvəlki gündəm artıq öz əhəmiyyətini itirib, ona görə də münaqişədən əvvəl mövcud olan məsələləri müzakirə etməyə ehtiyac yoxdur: “Bu gün, ilk növbədə, humanitar problemlərin, yeni regional nizamın formalaşması ilə bağlı məsələlərin həlli vacibdir. Burada əsas məsələ sülh müqaviləsinin hazırlanmasıdır. Sülh müqaviləsi ATƏT-in Minsk qrupunun köməyi ilə hazırlana bilər. Bu müqavilə Avropa təhlükəsizlik sisteminin əsas prioritetlərini ehtiva etməlidir. Yekun Helsinki Aktında təsbit edilmiş və ATƏT-in sonrakı sənədlərində təsdiqlənmiş dövlətin suverenliyinin və ərazi bütövlüyünün, sərhədlərin toxunulmazlığının təsdiqi kimi”.

Nəticə etibarilə belə qənaətə gəlmək olar ki, əslində, Rusiya Prezidenti Azərbaycanın bu məsələdə mövqeyini təsdiqləyib. O, Minsk qrupunun qalan həmsədrlərinə bildirdi ki, artıq “Qarabağ münaqişəsi” yoxdur. Bu konkret mesajdır - Minsk qrupu ancaq regionda mövcud humanitar və sosial-iqtisadi problemlərin həllində iştirak edə bilər və “münaqişənin nizamlanması”ndan söhbət gedə bilməz. Bu, yanaşma Azərbaycanın mövqeyi ilə tam üst-üstə düşür. Eyni zamanda, Putin Ermənistana mesaj verdi ki, Qarabağ məsələsi artıq bitib və onu yenidən gündəmə gətirmək cəhdləri, sadəcə olaraq, vaxt itkisidir.

Paylaş:

Baxılıb: 1516 dəfə