Toivo Klaarın gerçək siması...

Bakı:

21 °C

73 %

2 m/s

Əlaqə

AZ RU EN

Ana səhifə / Analitik / Toivo Klaarın gerçək siması...

Toivo Klaarın gerçək siması...

28.03.2024 [11:00]

Aİ-nin xüsusi nümayəndəsi Azərbaycan mediasının həqiqətləri yazmasından niyə narahatdır?

Azərbaycanın öz ərazi bütövlüyünü və suverenliyini təmin etməsi Ermənistana havadarlıq edən beynəlxalq dairələri, o cümlədən erməni diasporu və lobbisini ciddi narahat edir. Bu səbəbdəndir ki, ölkəmizə qarşı qərəzli sənədlər qəbul olunur, eləcə də, Qarabağdan Ermənistana köçmüş erməni separatçılarını beynəlxalq gündəmə çıxarmaq istəyirlər. Eyni zamanda, müəyyən dairələr “artsax” mövzusunu müxtəlif platformalara daşımağa çalışırlar. Son zamanlar Qazaxın işğal altında olan 4 kəndinin Azərbaycana qaytarılması məsələsinin gündəmə gəlməsi də ölkəmizə qarşı qərəzli dairələri ciddi narahat etməyə başlayıb.

Onlardan biri də Avropa İttifaqının Cənubi Qafqaz və Gürcüstan böhranı üzrə xüsusi nümayəndəsi Toivo Klaardır. Belə ki, Azərbaycan mediasında hələ də Ermənistanın işğalı altında olan kəndlərimizin geri qaytarılması ilə bağlı prinsipial mövqe sərgiləməsi cənab Klaarı da narahat edir. Bu səbəbdən də, o özünün sosial şəbəkə hesabında medamızın sərgilədiyi mövqeyə əsassız yanaşma ortaya qoyub. Toivo Klaar iddia edib ki, guya Azərbaycan mediasında Ermənistana qarşı təhdid var. O qeyd edib ki, “Azərbaycan mətbuatında Ermənistana qarşı təhdidlər qəbuledilməzdir”:

“Sərhədin delimitasiyası ilə bağlı həqiqi danışıqlara ehtiyac var və bütün ərazi mübahisələri sülh yolu ilə və razılaşdırılmış proses vasitəsilə həll edilməlidir”.

XİN: Sözügedən kəndlər ərazi mübahisəsi məsələsi deyil

Əslində, Klaar beynəlxalq hüquq prinsiplərindən çıxış etsəydi, Azərbaycanın işğal altında olan kəndlərinin birmənalı şəkildə qaytarılmalı olduğunu bəyan etməliydi. Çünki Azərbaycan öz kəndlərini Ermənistandan tələb etməklə beynəlxalq hüqüqun təmin olunmasına çalışır. Lakin T.Klaar isə birbaşa olaraq ermənipərəst mövqe sərgiləyir. İlk vaxtlarda xüsusi nümayəndə görüntü olaraq balanslı mövqe sərgiləsə də, Azərbaycanın öz ərazi bütövlüyü ilə yanaşı suverenliyini də bərpa etməsi, Qarabağda erməni separatizminə son qoyması Aİ-nin xüsusi nümayəndəsinin gerçək simasını ortaya çıxardı. Klaarın dəfələrlə ermənilərin maraqlarına xidmət edən açıqlamaları da bunu təsdiqləyir. Üstəlik, Vardan Oskanyanın rəhbərliyi ilə “artsax üzrə beynəlxalq komitəsinin” üzvləri ilə Toivo Klaarın görüşməsi də bir sıra mətləblərdən xəbər verir. Bütün bunların fonunda onun Azərbaycan mətbuatı ilə bağlı açıqlaması qəbuledilməzdir.

Məsələ ilə bağlı Azərbaycanın Xarici İşlər Nazirliyinin (XİN) mətbuat katibi Ayxan Hacızadə “X” hesabında yazıb ki, Toivo Klaar qərəzli münasibətdən qurtula bilmir və yalnız Azərbaycan kəndlərinin qaytarılması ilə bağlı qanuni diskursu şər kimi görür, Ermənistan mətbuatında qanunsuz işğalın davam etdirilməsi üçün mübarizə çağırışlarına isə tamamilə məhəl qoymur. A.Hacızadə qeyd edib ki, sözügedən kəndlər ərazi mübahisəsi məsələsi deyil.

İcma: Toivo Klaar Ermənistanın işğalçı siyasətini ört-basdır etmək üçün çalışır

Qərbi Azərbaycan İcması da Toivo Klaarın növbəti dəfə sərgilədiyi anti-Azərbaycan mövqeyini və media azadlığına qəsd edən yanaşmasını sərt şəkildə qınayıb. Bu barədə icmanın bəyanatında bildirilib ki, Avropa İttifaqının xüsusi nümayəndəsi Ermənistandan işğal etdiyi Azərbaycan kəndlərindən çəkilməyi tələb etmək əvəzinə, həmin əraziləri “mübahisəli” adlandıraraq, faktiki olaraq Ermənistanı işğalçı siyasətini davam etdirməyə çağırıb. Bundan əlavə, Toivo Klaar Ermənistanın işğalçı siyasətini ört-basdır etmək üçün Azərbaycanın kütləvi informasiya vasitələrini senzura etməyə çalışıb. Qazax rayonunun Bağanis Ayrım kəndində Ermənistanın azərbaycanlı mülkilərə qarşı törətdiyi qətliam və həmin kənd daxil olmaqla Azərbaycanın bir sıra ərazilərinin Ermənistan tərəfindən işğal altında saxlanması ilə bağlı Azərbaycan mediasında çıxan yazılar hansısa səbəbə görə cənab Klaarı narahat edir. Belə çıxır ki, Klaar üçün problem Ermənistanın Azərbaycan ərazilərini işğal etməsi, azərbaycanlılara qarşı müharibə cinayətləri və insanlıq əleyhinə cinayətlər törətməsi yox, bu faktların mediada işıqlandırılmasıdır.

Qərbi Azərbaycan İcması Avropa İttifaqından yanlış və təhlükəli siyasətindən əl çəkməyi, regionda sülhün bərqərar olmasına mane olmamağı və Ermənistandan qovulmuş azərbaycanlıların öz evlərinə qayıdışı məsələsində ədalətli mövqe tutmağı tələb edib.

NARDAR

Paylaş:

Baxılıb: 953 dəfə