Sülh, enerji və əməkdaşlıq çağırışı

Bakı:

21 °C

43 %

3 m/s

Əlaqə

AZ RU EN

Ana səhifə / Arxiv / Sülh, enerji və əməkdaşlıq çağırışı

Sülh, enerji və əməkdaşlıq çağırışı

07.05.2026 [12:09]

2026-cı il mayın 4-də Ermənistanın paytaxtı İrəvan şəhərində “Avropa Siyasi Birliyi”nin 8-ci Zirvə toplantısı keçirilib. Tədbirdə müxtəlif ölkələrin dövlət və hökumət başçıları iştirak edib, regional təhlükəsizlik, iqtisadi əməkdaşlıq, enerji siyasəti və geosiyasi proseslər geniş müzakirə olunub.

Azərbaycan Respublikasının Prezidenti İlham Əliyev Zirvə toplantısında videobağlantı formatında çıxış edərək ölkəmizin mövqeyini beynəlxalq ictimaiyyətə çatdırıb. Dövlət başçısının çıxışı həm regional reallıqların təqdimatı, həm də Azərbaycanın gələcəyə yönəlmiş strateji baxışlarının ifadəsi baxımından mühüm əhəmiyyət kəsb edib.

Prezident İlham Əliyev çıxışında Cənubi Qafqaz regionunda sülh və sabitliyin təmin olunmasının vacibliyini vurğulayıb. O, Azərbaycanın müharibədən sonrakı dövrdə bölgədə davamlı sülhün qurulması istiqamətində atdığı addımlardan bəhs edib və qarşılıqlı hörmətə əsaslanan münasibətlərin formalaşdırılmasının əhəmiyyətini qeyd edib. Dövlət başçısı bildirib ki, regionda uzunmüddətli sabitlik yalnız beynəlxalq hüququn norma və prinsiplərinə riayət olunması ilə mümkündür.

Çıxışın əsas istiqamətlərindən biri də enerji məsələləri olub. Prezident Azərbaycanın Avropanın enerji təhlükəsizliyində oynadığı rolu xüsusi qeyd edərək ölkəmizin etibarlı tərəfdaş kimi mövqeyini bir daha diqqətə çatdırıb. O, Azərbaycanın enerji resurslarının şaxələndirilmiş marşrutlarla Avropa bazarlarına çatdırılmasının həm region, həm də Avropa üçün strateji əhəmiyyət daşıdığını vurğulayıb.

Prezident İlham Əliyev Azərbaycanın həyata keçirdiyi iri infrastruktur layihələri, xüsusilə nəqliyyat və logistika sahəsində əldə olunan nailiyyətlər barədə də danışıb. Orta Dəhliz kimi tanınan beynəlxalq nəqliyyat marşrutunun əhəmiyyətinə toxunan dövlət başçısı bu layihənin Avropa ilə Asiya arasında əlaqələrin gücləndirilməsində mühüm rol oynadığını bildirib.

Çıxışda Azərbaycanın beynəlxalq arenada artan nüfuzuna da diqqət çəkilib. Prezident İlham Əliyev qeyd edib ki, ölkəmiz balanslaşdırılmış xarici siyasət yürüdərək müxtəlif beynəlxalq platformalarda fəal iştirak edir və qlobal problemlərin həllinə töhfə verir. Bu baxımdan “Avropa Siyasi Birliyi” kimi platformalar əməkdaşlıq imkanlarının genişləndirilməsi üçün mühüm əhəmiyyət daşıyır.

Zirvə toplantısında Prezident İlham Əliyevin videomüraciəti Azərbaycanın mövqeyinin aydın və prinsipial şəkildə təqdim olunması ilə seçildi. Bu çıxış bir daha göstərdi ki, Azərbaycan regional sülhün təmin olunması, enerji təhlükəsizliyi və iqtisadi əməkdaşlıq sahələrində mühüm rol oynayan aktor olaraq beynəlxalq münasibətlər sistemində öz yerini möhkəmləndirməkdə davam edir.

Sahib Şükürov

YAP Göyçay rayon təşkilatının sədri

Paylaş:

Baxılıb: 52 dəfə