İtaliya və Azərbaycan strateji tərəfdaşdırlar

Bakı:

27 °C

39 %

2 m/s

Əlaqə

AZ RU EN

Ana səhifə / Arxiv / İtaliya və Azərbaycan strateji tərəfdaşdırlar

İtaliya və Azərbaycan strateji tərəfdaşdırlar

07.05.2026 [22:17]

İtaliya-Azərbaycan əməkdaşlığı çoxşaxəlidir. Energetikadan başlamış sənaye istehsalına qədər bir çox sahələri əhatə edir. Hazırda təhsil sektorunu da əhatə edən əməkdaşlıq strateji əhəmiyyət daşıyır. Bu əlaqələr yerləşdiyimiz bölgənin inkişafı üçün də önəmlidir. İtaliya həmişə Azərbaycanın Avropa İttifaqı ilə daha sıx münasibətlərin qurulmasına öz dəstəyini verir. Dövlətimizin başçısı İlham Əliyevin mayın 4-də ölkəmizdə səfərdə olan İtaliya Nazirlər Şurasının sədri Ciorcia Meloni ilə keçirdiyi təkbətək və geniş tərkibdə görüşlərində, mətbuata bəyanatlarında bütün bu məsələlər ətrafında geniş fikir mübadiləsi aparıldı.

Prezident İlham Əliyev bildirdi ki, ölkələrimiz strateji tərəfdaşdırlar, 2014-cü və 2020-ci illərdə strateji tərəfdaşlığa dair iki bəyannamə imzalanmışdır. Bizim münasibətlərimizin əsasını təşkil edən bu iki sənəd və sənədlərdə təsbit edilmiş məsələlər bu gün həyatda da öz əksini tapır. Sizin bu gün Azərbaycanda olmağınız bir daha Azərbaycan-İtaliya əlaqələrinin nə qədər dərin məzmunlu olmasından xəbər verir: “Hər kəs bilir ki, Siz bu gün Ermənistanda idiniz. Ermənistanda öz proqramınızı bitirib Azərbaycana gəlmək bizim üçün xüsusi məna daşıyır, çox böyük rəmzi məna daşıyır, eyni zamanda, Azərbaycana göstərilən hörmətin və xoş münasibətin bariz təzahürüdür”.

İtaliya bazarının həm neft, həm qaz üzrə birinci dərəcəli əhəmiyyət daşıdığını vurğulayan Prezident İlham Əliyev bildirdi ki, keçən il Azərbaycan 25 milyard kubmetr təbii qaz ixrac edib, onun 9,5 milyardı İtaliya bazarına ixrac olunmuşdur. Bu gün söhbətlər və danışıqlar əsnasında bu həcmi artırmaq üçün müzakirələr aparmışıq. Bunun üçün təbii ki, Cənub Qaz Dəhlizinin tərkib hissəsi olan TAP layihəsinin genişləndirilməsi lazımdır. Artıq müəyyən dərəcədə genişləndirilib, amma bu proses davam etdirilməlidir.

Onu da qeyd edək ki, İtaliya şirkətlərinin Azərbaycanda uğurlu fəaliyyətinin çox böyük tarixi var. Hazırda İtaliyanın 130-a yaxın şirkəti Azərbaycanda fəaliyyət göstərir. O cümlədən işğaldan azad edilmiş Qarabağda və Şərqi Zəngəzurda İtaliya şirkətləri 23 layihə həyata keçirib və həyata keçirir. Xarici ölkələrin şirkətlərinə baxdıqda bu layihələrin icrasında İtaliya yenə qabaqcıl yerlərdədir.

Ölkələrimiz arasında əlaqələrin inkişafında xüsusi önəm verilən sahələrdən biri də təhsildir. Ötən il İtaliya Respublikasının Prezidenti Sercio Mattarellanın ölkəmizə rəsmi səfəri çərçivəsində İtaliya-Azərbaycan Universitetinin ilk tədris korpuslarının açılışı oldu. Cənab İlham Əliyev həmin mərasimdə qeyd etmişdir ki, universitetin gələcəyi çox parlaq olacaq. Bu, nəinki Azərbaycanda, dünya miqyasında öz layiqli yerini tutacaq, universitetin məzunları isə Azərbaycanın inkişafına öz töhfələrini verəcəklər. Burada oxuyan və oxuyacaq tələbələr gələcəkdə Azərbaycanın inkişafına çox böyük dəstək verəcəklər. Çünki sirr deyil ki, hər bir ölkənin inkişafı onun elmi və təhsil potensialından qaynaqlanır. İnkişaf etmiş ölkələrin təcrübəsinə nəzər salsaq görərik ki, bu ölkələri inkişaf etmiş ölkələr edən məhz biliklərdir, təhsildir, texnologiyalardır. Bugünkü dünyada texnoloji inkişaf hər bir ölkənin uğurunu müəyyən edir. Təbii resurslarla zəngin olan ölkələr kimi Azərbaycan, ilk növbədə, təbii resurslardan gələn gəlirləri insan kapitalına yönəltməyə çalışmışdır. Çünki biz gələcəyə baxmalıyıq. Dövlətimizin başçısı onu da qeyd etmişdir ki, İtaliya Azərbaycanla artıq uzun illər strateji tərəfdaşlıq əsasında münasibətlər qurmuşdur. Biz, sözün əsl mənasında, strateji tərəfdaşıq. Çünki bizim əməkdaşlığımız strateji xarakter daşıyır, qısamüddətli deyil, uzunmüddətlidir. Eyni zamanda, bizim əməkdaşlıq çərçivələrinə ildən-ilə yeni istiqamətlər əlavə olunur. Energetikadan başlamış sənaye istehsalına qədər uzanan və bu gün təhsil sahəsini əhatə edən əməkdaşlıq, sözün əsl mənasında, strateji xarakter daşıyır.

İtaliya Nazirlər Şurasının sədri Ciorcia Meloni ilə mətbuata bəyanatlarında da cənab İlham Əliyev iki ölkə arasında təhsil sahəsində mövcud əlaqələrimizdən, İtaliya-Azərbaycan Universitetinin dostluğumuzun inkişafına verəcəyi töhfələrdən geniş bəhs etdi.

İtaliya Nazirlər Şurasının sədri Ciorcia Meloni ölkəsinin Azərbaycanla həyata keçirdiyi mühüm tərəfdaşlığı uzunmüddətli tərəfdaşlıq kimi gördüyünü və bundan sonra da uzunmüddətli olmasını arzuladığını diqqətə çatdırdı.

Nihad Pənahov

YAP Tovuz rayon təşkilatının sədri

Paylaş:

Baxılıb: 109 dəfə