Heydər Əliyev ideyaları işığında formalaşan Azərbaycan gəncliyi

Bakı:

24 °C

69 %

10 m/s

Əlaqə

AZ RU EN

Ana səhifə / Xəbər lenti / Heydər Əliyev ideyaları işığında formalaşan Azərbaycan gəncliyi

Heydər Əliyev ideyaları işığında formalaşan Azərbaycan gəncliyi

08.05.2026 [21:23]

Azərbaycan gəncliyinin sağlam düşüncəli, yüksək intellektə və milli-mənəvi dəyərlərə bağlı şəkildə formalaşması dövlətin gələcəyi baxımından mühüm əhəmiyyət daşıyır. Çünki cəmiyyətin aparıcı qüvvəsi olan gənclər ölkənin inkişafının, tərəqqisinin və beynəlxalq inteqrasiyasının əsas hərəkətverici qüvvəsidir. Məhz buna görə də gənclərə göstərilən diqqət və qayğı əslində dövlətin öz gələcəyinə yönəlmiş strateji investisiyasıdır. Bu həqiqəti dərindən anlayan və gənclərin inkişafını daim diqqət mərkəzində saxlayan görkəmli dövlət xadimi Ümummilli Lider Heydər Əliyev olmuşdur.

Ulu Öndər Heydər Əliyevin 1969–1982-ci illərdə Azərbaycana rəhbərlik etdiyi dövrdə respublikada elm və təhsil sahəsində mühüm yeniliklər həyata keçirilmiş, çoxsaylı məktəblər, gənclər mərkəzləri və hərbi təhsil müəssisələri fəaliyyətə başlamışdır. Ulu Öndərin təşəbbüsü ilə minlərlə azərbaycanlı gəncin keçmiş SSRİ-nin nüfuzlu ali təhsil ocaqlarında təhsil almasına şərait yaradılmış, onların müasir və strateji əhəmiyyətli ixtisaslara yiyələnməsi təmin edilmişdir. Həmin illərdə Sovet İttifaqının 50-dən çox şəhərində yerləşən 170 ali məktəbdə 150 ixtisas üzrə 15 mindən artıq azərbaycanlı gənc yüksək ixtisaslı mütəxəssis kimi hazırlanmışdır. Bu siyasət sonrakı dövrdə Azərbaycanın intellektual potensialının formalaşmasında mühüm rol oynamışdır.

Ümummilli Liderin 1993-cü ildə xalqın tələbi ilə yenidən hakimiyyətə qayıdışından sonra isə Azərbaycanda dövlət gənclər siyasəti daha sistemli və məqsədyönlü şəkildə inkişaf etdirilməyə başlanmışdır. 1994-cü ildə Gənclər, İdman və Turizm Nazirliyinin yaradılması, 1996-cı ildə müstəqil Azərbaycan gənclərinin ilk forumunun keçirilməsi bu siyasətin mühüm mərhələlərindən biri olmuşdur. 1997-ci ildə isə Heydər Əliyevin imzaladığı sərəncama əsasən 2 fevral tarixi “Azərbaycan Gəncləri Günü” elan edilmiş və həmin tarixdən etibarən ölkəmizdə hər il xüsusi təntənə ilə qeyd olunmağa başlanmışdır.

Bu gün Ümummilli Lider Heydər Əliyevin əsasını qoyduğu dövlət gənclər siyasəti Azərbaycan Respublikasının Prezidenti İlham Əliyev tərəfindən uğurla davam etdirilir və yeni mərhələdə daha da zənginləşdirilir. Dövlət başçısının rəhbərliyi ilə gənclərin təhsilinin, dünyagörüşünün və vətənpərvərlik ruhunun inkişafına xüsusi diqqət yetirilir, onların beynəlxalq arenada ölkəmizi layiqincə təmsil etməsi üçün geniş imkanlar yaradılır. Azərbaycan gəncliyi bu diqqət və qayğının nəticəsi olaraq dövlətə və milli dəyərlərə sadiq, yüksək bilik və bacarıqlara malik bir qüvvə kimi formalaşmışdır.

2020-ci ildə əldə olunan şanlı Zəfər də Azərbaycan gəncliyinin vətənpərvərliyinin, milli ruhunun və dövlətə bağlılığının bariz nümunəsi oldu. Müzəffər Ali Baş Komandan İlham Əliyevin rəhbərliyi altında Vətən müharibəsində qəhrəman Azərbaycan gəncləri böyük şücaət göstərərək torpaqlarımızı düşməndən xilas etdilər və adlarını xalqımızın şanlı tarixinə qızıl hərflərlə yazdırdılar. Bu Zəfər bir daha sübut etdi ki, Heydər Əliyevin təməlini qoyduğu gənclər siyasəti ölkəmizin gələcəyinin formalaşmasında və dövlətçiliyin möhkəmləndirilməsində mühüm rol oynayır.

Kənan Qubadzadə,
Gənclər Mərkəzi İctimai Birliyinin sədri

Paylaş:

Baxılıb: 662 dəfə