"Həqiqətin müdafiəsi və sülhün təşviqi müasir medianın əsas missiyasıdır"

Bakı:

27 °C

61 %

9 m/s

Əlaqə

AZ RU EN

Ana səhifə / Arxiv / "Həqiqətin müdafiəsi və sülhün təşviqi müasir medianın əsas missiyasıdır"

"Həqiqətin müdafiəsi və sülhün təşviqi müasir medianın əsas missiyasıdır"

15.07.2026 [12:36]

Səyyad Mirzəyev

YAP Ağdam rayon təşkilatının əməkdaşı

Azərbaycanın mədəniyyət paytaxtı Şuşa növbəti dəfə qlobal informasiya məkanının diqqət mərkəzində oldu. IV Şuşa Qlobal Media Forumu dünyanın onlarla ölkəsindən media rəhbərlərini, jurnalistləri, ekspertləri və beynəlxalq təşkilatların nümayəndələrini bir araya gətirərək müasir informasiya mühitinin aktual çağırışlarının müzakirə olunduğu nüfuzlu platformaya çevrildi. Forumda Azərbaycan Respublikasının Prezidenti İlham Əliyevin çıxışı isə həm regional, həm də beynəlxalq gündəlik baxımından xüsusi maraq doğurdu. Dövlət başçısının səsləndirdiyi fikirlər Azərbaycanın xarici siyasətinin prioritetlərini, Cənubi Qafqazda yaranmış yeni reallıqları, informasiya təhlükəsizliyi məsələlərini və medianın qlobal proseslərdə artan rolunu bir daha nümayiş etdirdi. Prezident İlham Əliyev çıxışında ilk növbədə Şuşa Qlobal Media Forumunun artıq beynəlxalq nüfuz qazandığını qeyd edərək bildirdi ki, bu platforma müxtəlif ölkələrdən gələn media nümayəndələri arasında açıq dialoqun qurulmasına, fikir mübadiləsinin aparılmasına və beynəlxalq əməkdaşlığın inkişafına xidmət edir. Cənab Prezident vurğuladı ki, forum iştirakçılarının Qarabağ və Şərqi Zəngəzurda aparılan genişmiqyaslı bərpa-quruculuq işləri ilə yaxından tanış olmaları xüsusi əhəmiyyət daşıyır. Çünki bölgədə həyata keçirilən layihələr Azərbaycanın işğaldan azad edilmiş əraziləri qısa müddətdə müasir inkişaf məkanına çevirmək əzmini nümayiş etdirir. Dövlət başçısı diqqətə çatdırdı ki, müasir dövrdə informasiya məkanı ən azı siyasi və iqtisadi münasibətlər qədər mühüm əhəmiyyət kəsb edir. İnformasiya müharibələrinin geniş vüsət aldığı bir şəraitdə həqiqətin qorunması, obyektiv məlumatın cəmiyyətə çatdırılması və dezinformasiyaya qarşı mübarizə medianın ən mühüm vəzifələrindən biridir. Prezident İlham Əliyev bildirdi ki, qərəzli yanaşmalar, saxta xəbərlər və ikili standartlar beynəlxalq münasibətlərə mənfi təsir göstərir. Buna görə də peşəkar jurnalistika yalnız hadisələri işıqlandırmaqla kifayətlənməməli, həm də həqiqətin müdafiəsində prinsipial mövqe nümayiş etdirməlidir. Cənab Prezident forum iştirakçılarının diqqətini Azərbaycanın uzun illər ərzində informasiya müharibəsi ilə üzləşdiyinə də yönəltdi. O qeyd etdi ki, ölkəmiz barədə həqiqətə uyğun olmayan məlumatların yayılması, işğal dövründə törədilmiş dağıntıların və vandalizmin uzun müddət beynəlxalq ictimaiyyətə düzgün təqdim edilməməsi informasiya siyasətində obyektivliyin nə qədər vacib olduğunu göstərir. Bu baxımdan Şuşa Qlobal Media Forumu həqiqətlərin dünya ictimaiyyətinə çatdırılması üçün mühüm platformadır.

Prezident İlham Əliyev çıxışında Azərbaycanın sülh gündəliyinə sadiq qaldığını bir daha bəyan etdi. Dövlət başçısı vurğuladı ki, Cənubi Qafqazda davamlı sülh və sabitlik üçün real imkanlar yaranıb və bu imkanlardan istifadə etmək region dövlətlərinin ümumi maraqlarına cavab verir. Onun sözlərinə görə, Azərbaycan beynəlxalq hüququn norma və prinsiplərinə əsaslanan münasibətlərin tərəfdarıdır və bölgədə əməkdaşlığın genişlənməsini dəstəkləyir. Prezident qeyd etdi ki, qarşıdurmaların deyil, iqtisadi əməkdaşlığın və qarşılıqlı etimadın inkişafı regionun gələcəyini müəyyənləşdirəcək əsas amillərdən biridir.

Dövlət başçısı çıxışında Azərbaycanın beynəlxalq enerji təhlükəsizliyində oynadığı rola da geniş toxundu. Prezident İlham Əliyev bildirdi ki, ölkəmiz uzun illərdir etibarlı tərəfdaş kimi Avropanın enerji təhlükəsizliyinə mühüm töhfə verir. Qeyd edildi ki, həyata keçirilən enerji və nəqliyyat layihələri yalnız iqtisadi əhəmiyyət daşımır, eyni zamanda dövlətlər arasında etimadın və strateji tərəfdaşlığın möhkəmlənməsinə xidmət edir. Bu siyasət Azərbaycanın beynəlxalq nüfuzunu daha da artırır. Forum zamanı Prezident İlham Əliyevin diqqət çəkdiyi əsas məsələlərdən biri də media nümayəndələrinin peşəkarlığı və məsuliyyəti idi. Cənab Prezident qeyd etdi ki, jurnalistlərin üzərinə düşən əsas vəzifə faktlara söykənən, obyektiv və qərəzsiz informasiya təqdim etməkdir. İnformasiya texnologiyalarının sürətlə inkişaf etdiyi, süni intellekt və rəqəmsal platformaların geniş yayıldığı bir dövrdə peşəkar jurnalistikanın əhəmiyyəti daha da artır. Həqiqətin müdafiəsi yalnız dövlətlərin deyil, həm də beynəlxalq media ictimaiyyətinin ortaq məsuliyyətidir. Prezident İlham Əliyevin forum çərçivəsində səsləndirdiyi fikirlər Azərbaycanın beynəlxalq dialoq və əməkdaşlıq təşəbbüslərinin davamlı xarakter daşıdığını da göstərdi. Şuşada keçirilən belə mötəbər tədbirlər ölkəmizin qlobal məsələlərin müzakirə olunduğu etibarlı platformaya çevrildiyini təsdiqləyir. Azərbaycanın müxtəlif beynəlxalq tədbirlərə uğurla ev sahibliyi etməsi ölkənin artan nüfuzunun və etibarlı tərəfdaş imicinin göstəricisidir.

Paylaş:

Baxılıb: 126 dəfə