Demoqrafik problemin həlli yolları araşdırılır

Bakı:

2 °C

80 %

11 m/s

Əlaqə

AZ RU EN

Ana səhifə / Daxili siyasət / Demoqrafik problemin həlli yolları araşdırılır

Demoqrafik problemin həlli yolları araşdırılır

28.11.2013 [09:31]

Noyabrın 27-də Ailə, Qadın və Uşaq Problemləri üzrə Dövlət Komitəsinin (AQUPDK) və BMT-nin Əhali Fondunun (UNFPA) birgə təşkilatçılığı ilə “Doğulan uşaqların cinsə görə nisbətinin pozulmasının səbəbləri: mövcud vəziyyətin təhlili və problemin həlli yolları” mövzusunda tədbir keçirilib.
AzərTAc xəbər verir ki, tədbirdə çıxış edən AQUPDK-nın sədri Hicran Hüseynova hazırda dünyanın bir sıra ölkələrində doğulan uşaqların cinsə görə nisbətinin pozulmasının aktual problemlərdən biri olduğunu bildirib.
Komitə sədri məlumat verib ki, hamiləliyin süni şəkildə pozulması faktı inkişaf etmiş ölkələrdə il ərzində 28 milyon, inkişaf etməkdə olan ölkələrdə isə bu müddətdə 182 milyondur. Azərbaycan da bu problemdən kənarda qalmayıb. Ana bətnində oğlan uşaqlarının saxlanılması, qız uşaqlarının isə məhv edilməsi cəmiyyətdə gender balansının, eləcə də genefondun pozulmasına gətirib çıxara bilər.
Statistikaya görə, ölkəmizdə əhalinin ümumi sayı son 20 ildə 2 milyon 2 min 500 nəfər artaraq 9 milyon 442 min 500 nəfərə çatıb. 1993-cü ildə əhalinin 48,9 faizi kişi, 51,1 faizi isə qadın olub. Son 20 ildə kişilərin sayı sürətlə artıb və əhali arasında cins nisbəti demək olar ki bərabərləşib. Başqa sözlə, 2013-cü ildə əhalinin 49,7 faizini kişilər, 50,3 faizi isə qadınlar təşkil edir.
BMT-nin Azərbaycandakı rezident əlaqələndiricisi Antonius Broek bildirib ki, uşaqların cinsə görə nisbətinin pozulması cəmiyyətdə mənfi fəsadların yaranması ilə nəticələnə bilər. Sosial, iqtisadi, mədəni və siyasi zəmində qadınlara qarşı ayrı-seçkilik halları davam edir və bu, insan hüquqlarının pozulması vəziyyətini daha kəskinləşdirir. Ona görə də dünyanın hər yerində, o cümlədən Cənubi Qafqaz bölgəsində uşaqların cinsə görə nisbətinin pozulması məsələsi ilə mübarizə aparılmalıdır. UNFPA-nın Türkiyə, Azərbaycan, Ermənistan və Gürcüstan üzrə ölkə direktoru Zahidul Huque bu problemlə bağlı regional miqyasda araşdırmaların aparıldığını diqqətə çatdıraraq deyib ki, indiki demoqrafik vəziyyət artıq genefond üçün real təhlükədir.
Z.Huque problemin həlli ilə bağlı milli, regional və beynəlxalq səviyyədə birgə səylərin göstərilməsinin vacibliyini bildirib.
Milli Məclisin İnsan hüquqları komitəsinin sədri Rəbiyyət Aslanova Azərbaycanda bu istiqamətdə yaradılmış milli qanunvericilik bazası barədə məlumat verib.
Tədbirdə çıxış edən “Kaspi” qəzetinin təsisçisi Sona Vəliyeva bildirib ki, uşaqların cinsi nisbətinin pozulması hazırda cəmiyyəti düşündürən məsələlər sırasında dayanır. Problemin aradan qaldırılması istiqamətində maarifləndirmə işlərinin geniş şəkildə aparılması və səhiyyə xidmətlərinin inkişaf etdirilməsi vacibdir. Bu məsələlərin həllində kütləvi informasiya vasitələrinin rolu danılmazdır.
Milli Məclisin deputatlarının, dövlət qurumlarının və ictimaiyyətin nümayəndələrinin iştirak etdikləri tədbirdə mövzu ətrafında geniş müzakirələr aparılıb.

Paylaş:

Baxılıb: 1665 dəfə