İkinci raund...

Bakı:

24 °C

58 %

3 m/s

Əlaqə

AZ RU EN

Ana səhifə / Dünya / İkinci raund...

İkinci raund...

20.03.2025 [09:16]

ABŞ-Rusiya görüşü bu dəfə Ciddədə baş tutacaq

Bazar günü Səudiyyə Ərəbistanının Ciddə şəhərində ABŞ ilə Rusiya arasında növbəti görüşün keçirilməsi gözlənilir. ABŞ Prezidentinin xüsusi nümayəndəsi Stiv Vitkoff “Fox News” telekanalına bildirib ki, Ciddədəki görüşdə Amerika tərəfini ABŞ-ın milli təhlükəsizlik üzrə müşaviri Mayk Vals və dövlət katibi Marko Rubio təmsil edəcək. Xatırladaq ki, fevralın 18-də Ər-Riyad şəhərində ABŞ-Rusiya danışıqlarının ilk raundu keçirilmişdi. Qərb KİV-nin məlumatına görə, bu görüşdə ABŞ-Rusiya münasibətlərinin bərqərar olunması, Ukrayna münaqişəsinin nizamlanması və beynəlxalq münasibətlərdə hazırkı vəziyyətlə bağlı ətraflı fikir mübadiləsi aparılmışdı.

Qeyd edək ki, martın 18-də Donald Tramp ilə Vladimir Putin arasında telefon danışığı baş tutub. Rus KİV-ləri Kremlin rəsmi məlumatlarına əsasən qeyd edirlər ki, hər iki ölkənin rəhbəri söhbət əsnasında bir sıra regional və beynəlxalq məsələləri müzakirə ediblər.

Hər iki dövlət maraqlıdır...

Məsələ ilə bağlı politoloq Tural İsmayılov “Yeni Azərbaycan” qəzetinə şərhində qeyd edib ki, Ciddədəki ABŞ-Rusiya görüşü mühüm əhəmiyyət daşıya bilər: “Hazırda həm ABŞ, həm də Rusiya Ukrayna məsələsində müəyyən mənada eyni mövqe sərgiləyirlər. Yəni hər iki dövlət müharibənin bitməsində maraqlıdır və hər hansı çərçivə sazişinə bənzər sənədin imzalanmasının tərəfdarıdırlar. Ciddə görüşündə hansı məsələlərin müzakirə olunmasına gəlincə, qeyd edim ki, Tramp ilə Putin arasında baş tutan son telefon danışığında müzakirə predmeti olan məsələlərin və əldə olunan razılaşmaların detalları bu görüşdə ətraflı müzakirə olunacaq. Bununla bağlı mühüm məqamlar var, hətta hər iki dövlət bu istiqamətdə iradə nümayiş etdirir”.

Aİ prosesdən kənarda qalır

“Maraqlı məqam bundan ibarətdir ki, Avropa İttifaqının aparıcı üzv ölkələri, həmçinin Britaniya Tramp administrasiyasının Ukrayna münaqişəsinə yanaşmasından razı deyillər. Biz görürük ki, Aİ Trampın Ukrayna ilə bağlı mövqeyini şübhə altına alır. Hesab edirəm ki, bunun özü çox ciddi problemlər yaradır. Yəni Ukraynadakı müharibənin bitməsinə əngəl yarana bilər,” - deyə T.İsmayılov vurğulayıb.

Ukraynanın ərazi bütövlüyü arxa plana keçir

Politoloqun sözlərinə görə, istənilən halda Rusiya ilə Ukrayna arasında atəşkəs sazişi imzalanacaq: “Hazırkı proseslər fonunda əsas məqam budur ki, Ukraynanın ərazi bütövlüyü arxa plana keçir və böyük güclər daha çox bu ölkədə öz geosiyasi və geoiqtisadi maraqlarını təmin etməyə çalışacaqlar. ABŞ tərəfindən Rusiyaya elə bir anlaşma təklif edilib ki, bu, birmənalı şəkildə Ukraynanın milli maraqlarına cavab vermir”.

Y.ABDULLAYEV

Paylaş:

Baxılıb: 611 dəfə