Ermənistanda Sarkisyan rejiminə qarşı üsyan gözlənilir

Bakı:

15 °C

67 %

6 m/s

Əlaqə

AZ RU EN

Ana səhifə / Dünya / Ermənistanda Sarkisyan rejiminə qarşı üsyan gözlənilir

Ermənistanda Sarkisyan rejiminə qarşı üsyan gözlənilir

17.01.2018 [10:10]

Erməni ekspertlərin qənaətinə görə, hakim cinayətkar rejimə qarşı mübarizə yalnız və yalnız ümumxalq itaətsizliyi aksiyalarının bərpası ilə mümkündür
İşğalçı Ermənistanda sosial-iqtisadi böhranla yanaşı, siyasi böhran da getdikcə dərinləşməkdədir. Eyni zamanda, işğalçı ölkədə iqtisadi böhran fonunda hərbi sahədə hökm sürən özbaşınalıqlar əhalinin narazılığını daha da artırır. Erməni KİV-nin məlumatına əsasən rüşvət, korrupsiya, sui-qəsd, ölüm hallarının çoxalması Ermənistan ordusunda adi hala çevrilib. Belə ki, bir il ərzində hərbi hissələrdə 113 rüşvət faktı qeydə alınıb. Qeyri-döyüş şəraitində ölənlərin sayı 59 nəfər olub. Onlardan 23-ü intihar, digərləri isə qəza və ya sui-qəsddir. Belə halların artmasının əsas səbəbi isə hərbi sahədə hökm sürən hərc-mərclikdir.
Bunun qarşısını almaq üçün vətəndaşları üsyana çağıran “Yerkir Sirani” partiyasının lideri Zarui Postancyan, mövcud siyasi sistemin ölkəni məhvə doğru apardığını bildirib. Keçmiş deputat qeyd edib ki, hakim cinayətkar rejimə qarşı mübarizə yalnız və yalnız ümumxalq itaətsizliyi aksiyalarının bərpası ilə mümkündür. Vətəndaşlar ayağa qalxaraq hökumətə etiraz etməlidirlər. Əks təqdirdə, Ermənistanda hökm sürən acınacaqlı vəziyyət həllini tapmayacaq. Əksinə, büdcənin boşalması fonunda artan dövlət borcları, miqrasiya sosial-iqtisadi partlayışla nəticələnəcək.
Elə Ermənistan Milli Konqresinin sədr müavini Aram Manukyan da ümumxalq itaətsizliyi aksiyalarının bərpasının tərəfdarıdır. O vurğulayıb ki, Ermənistan işğalçılıq siyasətindən əl çəkməlidir. Ölkədə hökm sürən böhranın günahkarı hazırkı hakimiyyətdir. Hökumət sülh yolunu seçməsə ölkəni məhvə aparacaq.
Öz növbəsində “Yelk” partiyası da bu vəziyyətdən çıxmağın tək yolunu Ermənıstanı təcrid vəziyyətinə salan Sarkisyan rejimini devirməkdə görür. Məsələn, siyasi təşkilatın rəhbəri, deputat Nikol Paşinyan bildirib ki, hazırda hökuməti cinayətkar qrup idarə edir. Bu dəstənin yürütdüyü işğalçılıq siyasəti hər ötən gün erməni ailələr üçün faciəyə çevrilir. Azərbaycana məxsus Dağlıq Qarabağa göndərilən Ermənistan vətəndaşı olan gənclər ya dözməyib intihar edir, ya da öz hərbçi yoldaşlarının gülləsinə tuş gəlirlər. Bu faktlar əksər hallarda Sarkisyan hakimiyyəti tərəfindən gizlədilir. Lakin cəmiyyət Ermənistan ordusunun əsgərlərinin ciddi psixoloji gərginlik içərisində olduğunu yaxşı bilir.
Yeri gəlmişkən, Ermənistanın işğalçılıq siyasətinin bu ölkəni məhvə apardığını rusiyalı ekspertlər də vurğulayıblar. Belə ki, “Vesti-Kafkaza.ru” informasiya portalı da Ermənistanın işğalçılıq siyasətindən yazıb. “Dağlıq Qarabağ münaqişəsi Ermənistan üçün sosial-iqtisadi dalandır” başlıqlı məqalədə işğalçı ölkənin düşdüyü vəziyyət rus politoloqları tərəfindən qiymətləndirilir. Rusiya Siyasi Araşdırmalar İnstitutunun rəhbəri Sergey Markov deyib ki, Dağlıq Qarabağ münaqişəsinin həll olunması Ermənistanın iqtisadi problemlərinin aradan qaldırılmasında əsas rol oynaya bilər. “Əgər münaqişə olmasaydı, o zaman respublika hər iki tərəfdən blokadaya alınmayacaqdı. Blokada olmadığı halda Ermənistan iqtisadiyyatı şübhəsiz ki, daha yaxşı inkişaf edəcəkdi”, - deyə Sergey Markov bildirib. Politoloq hesab edir ki, Ermənistan blokada şəraitində öz-özünə inkişaf edə bilməz. Ölkə iqtisadiyyatındakı problemlərin 90 faizi məhz işğalçılıq siyasəti ilə əlaqədardır.
Lomonosov adına Moskva Dövlət Universitetinin dosenti Aleksey Fenenko da qeyd edib ki, Dağlıq Qarabağ Ermənistan iqtisadiyyatı üçün bir dalandır: “Əvvəla, Ermənistanın əlverişsiz coğrafi mövqeyi var. Dənizə, hətta bir nəqliyyat marşrutu ola biləcək çaya belə çıxışı yoxdur. Dünya ticarət marşrutlarından uzaqdadır. Həm də Ermənistan xarici bazara elə də böyük təkliflər verə bilmir. Bu ölkənin ətrafında olan kənd təsərrüfatı bazarları çoxdan tutulub. Rəqabətə davamlı məhsullar isə ümumiyyətlə Ermənistanda yoxdur. Hesab edirəm ki, iqtisadi problemlərin həlli Ermənistan rəhbərliyindən siyasi iradə tələb edir. Yəni Dağlıq Qarabağ münaqişəsi həllini tapmalıdır”.
Nardar BAYRAMLI

Paylaş:

Baxılıb: 1149 dəfə