Azərbaycan–Almaniya tərəfdaşlığı regional əməkdaşlıq və sülhə yeni töhfələr verir

Bakı:

31 °C

33 %

4 m/s

Əlaqə

AZ RU EN

Ana səhifə / Xəbər lenti / Azərbaycan–Almaniya tərəfdaşlığı regional əməkdaşlıq və sülhə yeni töhfələr verir

Azərbaycan–Almaniya tərəfdaşlığı regional əməkdaşlıq və sülhə yeni töhfələr verir

23.07.2026 [14:29]

Prezident İlham Əliyevin Almaniya Federativ Respublikasına rəsmi səfəri və keçirilən yüksək səviyyəli görüşlər bir daha nümayiş etdirdi ki, Azərbaycan Avropa ilə münasibətlərini qarşılıqlı hörmət və etibarlı tərəfdaşlıq prinsipləri əsasında ardıcıl şəkildə inkişaf etdirir. İmzalanan sənədlər və verilən mesajlar təkcə ikitərəfli əlaqələrin deyil, bütövlükdə Cənubi Qafqaz regionunda əməkdaşlıq və sabitliyin möhkəmlənməsi baxımından da mühüm əhəmiyyət daşıyır.

Azərbaycan son illərdə həyata keçirdiyi uğurlu xarici siyasət nəticəsində beynəlxalq münasibətlər sistemində etibarlı tərəfdaş kimi öz mövqeyini daha da gücləndirib. Almaniya ilə strateji dialoqun başlanması da məhz bu uğurlu siyasətin növbəti nəticəsidir. Bu əməkdaşlıq iki dövlət arasında siyasi münasibətlərin daha da dərinləşməsinə və qarşılıqlı maraqlara əsaslanan yeni təşəbbüslərin həyata keçirilməsinə geniş imkanlar açır.

Dövlət başçısının bəyanatında xüsusi yer tutan məsələlərdən biri regionda formalaşan yeni geosiyasi reallıqlar oldu. Azərbaycanın öz gücü hesabına ərazi bütövlüyünü və dövlət suverenliyini tam təmin etməsi Cənubi Qafqazda yeni əməkdaşlıq mühitinin yaranmasına səbəb olub. Bu gün ölkəmiz qarşıdurma deyil, dialoq və qarşılıqlı faydalı əməkdaşlıq siyasətini təşviq edir.

Prezident İlham Əliyev Almaniyanın Ermənistan–Azərbaycan münasibətlərinin normallaşmasına və sülh prosesinə verdiyi dəstəyi yüksək qiymətləndirdi. Uzun illər davam edən münaqişənin arxada qalması region ölkələri üçün yeni iqtisadi, humanitar və nəqliyyat imkanları yaradır. Azərbaycanın təşəbbüsü ilə formalaşan əməkdaşlıq mühiti artıq praktik nəticələr verməyə başlayıb. Tranzit daşımalarının genişlənməsi, iqtisadi əlaqələrin inkişafı və regional kommunikasiyaların açılması bunun bariz nümunəsidir.
Müasir dövrdə nəqliyyat dəhlizləri dövlətlərin strateji əhəmiyyətini müəyyən edən əsas amillərdən biridir. Azərbaycan Şərqlə Qərbi, Orta Asiya ilə Avropanı birləşdirən etibarlı logistika mərkəzi kimi öz mövqeyini ildən-ilə möhkəmləndirir. Almaniyanın bu sahədəki zəngin təcrübəsi və texnoloji imkanları gələcəkdə birgə layihələrin həyata keçirilməsi üçün geniş perspektivlər yaradır.

Səfər zamanı Avropa İttifaqı ilə münasibətlərin inkişafına dair səsləndirilən fikirlər də diqqət çəkdi. Son dövrlərdə Avropa İttifaqının ali rəhbərliyinin Azərbaycana səfərləri, enerji, nəqliyyat və iqtisadi əməkdaşlıq sahələrində əldə olunan nəticələr göstərir ki, ölkəmiz Avropanın etibarlı tərəfdaşlarından biri kimi qəbul edilir. Almaniyanın bu prosesdə oynadığı rol isə xüsusi əhəmiyyət daşıyır.

Prezident İlham Əliyevin Almaniyaya rəsmi səfəri bir daha sübut etdi ki, Azərbaycan yalnız regionun deyil, Avrasiyanın mühüm siyasi və iqtisadi mərkəzlərindən birinə çevrilməkdədir. İmzalanan sənədlər və əldə olunan razılaşmalar ölkəmizin beynəlxalq nüfuzunu daha da artıracaq, regional əməkdaşlığın genişlənməsinə, sülhün möhkəmlənməsinə və qarşılıqlı etimada əsaslanan münasibətlərin inkişafına yeni təkan verəcək.

Qasım Qasımov

Siyəzən RİHB-nın Ərazi-təşkilat və ictimai-siyasi məsələlər şöbəsinin Müharibə iştirakçıları və şəhid ailələri ilə işin təşkili sektorunun məsləhətçisi

Paylaş:

Baxılıb: 60 dəfə