İşğalçı ölkənin acınacaqlı mənzərəsi: insanlar təşviş içində, Paşinyan hökuməti isə çıxılmaz vəziyyətdə...

Bakı:

17 °C

72 %

4 m/s

AZ RU EN

Ana səhifə / Dünya / İşğalçı ölkənin acınacaqlı mənzərəsi: insanlar təşviş içində, Paşinyan hökuməti isə çıxılmaz vəziyyətdə...

İşğalçı ölkənin acınacaqlı mənzərəsi: insanlar təşviş içində, Paşinyan hökuməti isə çıxılmaz vəziyyətdə...

08.04.2020 [15:08]

Ermənistan mətbuatı tənəzzül və böhranın hökm sürdüyü bu ölkədə növbəti etiraz dalğasının və vətəndaş qarşıdurmasının qaçılmaz olduğunu yazır

Hakimiyyət dəyişikliyinin ikinci ili tamam olan Ermənistanda ümumi ictimai-siyasi və sosial-iqtisadi vəziyyətin getdikcə daha da pisləşməsi müşahidə olunmaqdadır. Belə ki, bütün dünyada geniş yayılan yeni növ koronavirus infeksiyası işğalçı ölkədən də yan keçməyib. İnfeksiyanın hazırkı və ehtimal olunan fəsadları həm heç bir maliyyə-iqtisadi resursa malik olmayan Paşinyan hökumətini, həm də əhalini təşvişə salmaqdadır. Müşahidəçilərin ümumi qənaətinə görə, hələ koronavirus təhlükəsindən əvvəl gözlənilən sosial-iqtisadi tənəzzülün qaçılmaz olduğu ortadadır.
Beləliklə, koronavirus pandemiyası onsuz da acınacaqlı durumda olan işğalçı Ermənistanda növbəti etiraz dalğasının baş qaldırmasını, vətəndaş qarşıdurmasını labüd edib. Məsələn, “1in” saytına müsahibə verən politoloq Levon Şirinyan deyib ki, insanlar sözün həqiqi mənasında əziyyət çəkirlər, əhalinin rifahı sıfır səviyyəsindədir.
Ermənistanın iqtisadi tənəzzüllə üzləşdiyi bu ağır günlərdə Nikol Paşinyanın davranışı da ciddi tənqid olunur. “İrates” qəzeti yaranmış vəziyyətdə, hətta hakim komandanın üzvlərinin də bir-birinə dərin təəccüblə baxdıqlarını yazır. “Bütün mehmanxana və xəstəxana binalarının çarpayı yerləşdirmək üçün çadır şəhərciklərinə çevrildiyi bir vaxtda N.Paşinyan öz ailəsi ilə Göyçə gölünün sahilində “həftəsonu” keçirir”,- deyə vurğulanan məqalədə Paşinyanın ailəsindən başqa artıq heç kimə, xüsusən də komandasına qayğı göstərmədiyi, çünki orada ciddi metamorfozların baş verdiyi diqqətə çatdırılıb.

Yeni növ koronavirus infeksiyasına yoluxma hallarının həddən çox qeydə alınması hökumətə qarşı narazılığı artırır

Yeni növ koronavirus infeksiyasının Ermənistanda geniş yayılması da Paşinyan hökumətinin ciddi tənqid atəşinə tutulmasına səbəb olub. Daha dəqiq desək, qonşu dövlətlərə nisbətən Ermənistanda bu infeksiyasiyaya yoluxma hallarının həddən çox qeydə alınması həm əhalini təşvişə salır, həm də yarıtmaz fəaliyyət göstərən Paşinyan hökumətinə qarşı narazılığı artırır. Məsələn, “Armenianreport.com”da tənqidi yazı ilə çıxış edən Qalust Qriqoryan hökuməti İranla sərhədləri gec bağlamaqda ittiham edir və Ermənistanı qonşularla müqayisə edərək vəziyyətin acınacaqlı olduğunu bildirir. Müəllifin sözlərinə görə, qonşular təxirəsalınmaz tədbirlər gördüyü müddət ərzində Paşinyan hökuməti açıq-aşkar bu təhlükəni inkar etmək şüarları ilə referenduma hazırlaşırdı: “Sonda layiq olduğumuz vəziyyətə düşdük. İndi iqtisadiyyat çökür, dram səssizcə devalvasiya edir, xaricdən pul köçürmələri azalır, işsizlik artır”.

Xaricdən yardım alınmasa, ölkə əsl fəlakətlə üz-üzə qalacaq

Ermənistan mətbuatının yazdığına görə, bütün son hesabatlar göstərir ki, mövcud hökumət koronavirus infeksiyası ilə mübarizə üçün nə edəcəyini bilmir – həkimlər, tibb bacıları, xəstəxanalarda yerlər, tənəffüs aparatları, maskalar çatışmır və həyati vacib olan heç nə yoxdur. Mütəxəssislərin yekdil rəyi odur ki, bu şəraitdə indiki hökumət xaricdən yardım almasa, Ermənistan əsl fəlakətlə üz-üzə qalacaq.
“İrates” qəzeti isə yazır ki, yeni koronavirus infeksiyası ilə bağlı Ermənistanda ortaya qoyulan statistika real mənzərəni əks etdirmir. Nəşrin məlumatına görə, Ermənistan hakimiyyəti koronavirusu aşkarlamaq üçün ölkəyə keyfiyyətsiz, ucuz testlər gətirib, onların əksəriyyəti də nəticəni düzgün göstərmir.

“Fitch Ratings” beynəlxalq reytinq agentliyinin Ermənistanla bağlı proqnozu ürəkaçan deyil

Tənəzzül dövrü keçirən Ermənistan iqtisadiyyatına bir zərəbə də “Fitch Ratings” beynəlxalq reytinq agentliyindən gəlib. “Aysor.am” saytı yazır ki, Ermənistanın uzunmüddətli defolt reytinqinin proqnozu “BB” səviyyəsində təsdiq edilərək “stabil”dən “mənfi” səviyyəsinə endirilib. Agentliyin saytında yerləşdirilmiş məlumatda deyilir ki, koronavirus şoku iqtisadi asılılığa malik olan Ermənistan iqtisadiyyatına mənfi təsir göstərir.

Koronavirus pandemiyası Paşinyan hökumətini bitirir

Yerli mətbuat Ermənistanda az-çox fəaliyyət göstərən müəssisələrin də işləmədiyi, sərhədlərin uzunmüddətli bağlı olduğu bir vəziyyətdə ölkədə tam xaos yarana biləcəyindən ehtiyatlanan hökumətin gələn həftədən fövqəladə vəziyyət rejimini yumşaltmaq istədiyini yazır. Baş nazirin sosial şəbəkə vasitəsilə əhaliyə sonuncu müraciətində də bu ehtimaldan bəhs etməsi və ermənilərə normal həyata qayıtmaq barədə ümidlər verməsi onun fövqəladə vəziyyət rejimindən imtina etmək cəhdi kimi qiymətləndirilir.
N.Paşinyanın siyasi rəqibləri isə hazırda baş verənlərin səbəbini xalqın iki il əvvəlki səhvində görür. Ermənistandakı bəzi ekspertlər ardıcıl olaraq yanlış addmlar ataraq bütün dünya qarşısında gülünc vəziyyətə düşən indiki hökumətin hələ də hakimiyyətdə qalmasına təəccüblərini gizlətmirlər. İndiki böhrandan sonra cəmiyyətin hansısa köklü dəyişikliklərə ümidləri də puça çıxdığı üçün koronavirus pandemiyasının Paşinyan hökumətini bitirəcəyi ehtimal olunur.

Qaşqay ZİYƏDDİNOĞLU

Paylaş:

Baxılıb: 653 dəfə