Forpostun geopolitik fiaskosu, yaxud bütün yollar iflasa aparır

Bakı:

12 °C

87 %

3 m/s

Əlaqə

AZ RU EN

Ana səhifə / Dünya / Forpostun geopolitik fiaskosu, yaxud bütün yollar iflasa aparır

Forpostun geopolitik fiaskosu, yaxud bütün yollar iflasa aparır

22.08.2020 [00:17]

Total tənəzzül ilə qarşı-qarşıya olan işğalçı Ermənistan xarici siyasətdə də böhran və silsilə uğursuzluqlarla üzləşib

Bütün sahələrdə tənəzzül meyilləri və total böhran vəziyyəti ilə qarşı-qarşıya olan işğalçı Ermənistan beynəlxalq arenada da silsilə uğursuzluqlarla üzləşir. Ümumiyyətlə, inkaredilməz reallıqdır ki, işğalçı siyasət yeridən Ermənistan beynəlxalq münasibətlər sistemində forpost kimi tanınır, müstəqil daxili və xarici siyasət kursu həyata keçirmir. Elə dünya siyasətində baş verən son hadisələr də manevr imkanları tükənən Ermənistanın nəinki müstəqil dövlət olmadığını, hətta hazırkı dönəmdə, sadəcə, asılı vəziyyətdə olan “geosiyasi vassal” səciyyəsi daşıdığını bir daha təsdiqlədi.

Geosiyasi autsayderə çevrilmiş Ermənistanın regionda təcrid vəziyyəti dərinləşir

Vurğulamaq lazımdır ki, son vaxtlar erməni ekspertləri, həmçinin işğalçı ölkənin mediası tərəfindən xüsusi olaraq diqqətə çatdırılır ki, bu ölkənin beynəlxalq arenada atdığı addımlar heç bir perspektiv vəd etmir. Əksinə, Paşinyan hakimiyyətinin gözləntilərinin sonu geopolitik iflasla nəticələnəcək. Vurğulanır ki, Ermənistanın xarici siyasəti tamamilə iflasa uğrayıb, manevr imkanları qalmayıb. Hətta erməni diasporunun maliyyəsi ilə dərc olunan nəşrlərdə də yazılır ki, mövcud hakimiyyətin xarici siyasəti nizamlı və müəyyən deyil, Ermənistanın nəinki regional layihələr çərçivəsində, eləcə də beynəlxalq aləmdə təcrid vəziyyətinə düşüb, xarici siyasətdə mövcud böhran dərinləşir. Dolayısıyla, Ermənistan hakimiyyəti son zamanlar regional miqyasda cərəyan edən proseslər kontekstində geopolitik imkanlar əldə edəcəyini, müəyyən dividendlər qazanacağını düşünsə də, bütün yollar siyasi “tupik”ə, yaxud iflasa aparır. Bütövlükdə, işğalçı ölkə hazırda elə bir situasiya qarşısındadır ki, nəinki hər hansı bir uğurdan, heç nisbi müstəqillikdən və ya müsbət gözləntindən danışmağa dəyməz.

Yeni siyasi kataklizmlərə doğru...

Əlbəttə, Ermənistanın regional və beynəlxalq miqyasda təcrid vəziyyətinə düşməsi bu ölkə daxilində mövcud olan böhranın dərinləşməsini şərtləndirir. Sirr deyil ki, işğalçı siyasət həyata keçirən, xaricdən gələn ianələrə bel bağlayan və total tənəzzülün müşahidə olunduğu Ermənistan ciddi siyasi, iqtisadi və demoqrafik böhranla qarşı-qarşıyadır. Dərin iqtisadi tənəzzül və xaos insanların həyat şəraitini olduqca çətinləşdirdiyi üçün ekspertlər işğalçı ölkədə narazılıqların daha da artacağını, etiraz aksiyalarının miqyasının genişlənəcəyini bildirirlər. Ermənistanın sosial problemləri aradan qaldırmaq üçün kifayət qədər güc və potensiala malik olmaması nəticəsində yaranan problemlər hakimiyyətlə xalq arasında ciddi qarşıdurmaya zəmin yaradır. Bütün bunları xüsusi vurğulayan bir çox ekspertin qənaətinə görə, müstəqil siyasət yeritməyən Ermənistanın gələcəyi sual altındadır.

Nurlan QƏLƏNDƏRLİ

Paylaş:

Baxılıb: 627 dəfə