Ermənistanda siyasi qarşıdurma: gərginlik artır, ziddiyyətlər dərinləşir

Bakı:

26 °C

41 %

5 m/s

Əlaqə

AZ RU EN

Ana səhifə / Dünya / Ermənistanda siyasi qarşıdurma: gərginlik artır, ziddiyyətlər dərinləşir

Ermənistanda siyasi qarşıdurma: gərginlik artır, ziddiyyətlər dərinləşir

19.01.2021 [09:05]

Paşinyanın əleyhdarları bölgələrə üz tutur, hakimiyyət isə müxalifətin regionlarda təşkil etdiyi aksiyaların qarşısını almaq üçün müxtəlif vasitələrə əl atır
Məlum olduğu kimi, Azərbaycanın qarşısında acı məğlubiyyətlə üzləşən Ermənistanda iki ay əvvəl başlayan xaos vəziyyəti bu günə qədər davam edir. Kapitulyasiya aktına imza atmağa məcbur olan Paşinyan bu müddət ərzində az qala hökumət üzvlərinin yarısından çoxunu itirsə də, müxalifətin istefa tələbinə məhəl qoymur. Halbuki ölkə daxilində bütün səviyyələrdə baş nazirə qarşı istefa tələbi irəli sürülür. Eyni zamanda, erməni diasporu da məğlubiyyətin simvoluna çevrilən Paşinyanın hakimiyyətdən uzaqlaşdırılmasında yerli ermənilərlə həmfikirdir. Ermənistan mətbuatının yazdığına görə, hətta ölkə xaricində parlamentin formalaşdırılması barədə təkliflər də irəli sürülür.
Bununla yanaşı, dekabrın 22-dən ölkədə vətəndaş itaətsizliyi aksiyaları elan edən müxalifət istefaya nail olmaq üçün taktikanı dəyişir. Belə ki, “Vətənin xilası naminə hərəkat” müxalifət liderlərinin regionlara səfərlərini təşkil edərək, ayrı-ayrı vilayətlərdə sakinlərlə görüş və aksiyalar keçirir.
Hakimiyyət isə müxalifətin regionlarda təşkil etdiyi aksiyaların qarşısını almaq üçün müxtəlif vasitələrə əl atır. Məsələn, “Past” qəzeti yazır ki, Şirak vilayətinin mərkəzi Gümrü şəhərində vətəndaşlarla görüş-mitinq keçirmək istəyən müxalifətin baş nazir postuna vahid namizədi Vazgen Manukyana qarşı aksiya təşkil edilib. Nəşrin məlumatına görə, aksiya Ermənistan parlamentinin hakim “Mənim addımım” fraksiyasından olan deputatı Andranik Koçaryan və hərbi polis idarəsinin rəisi Aşot Zakaryanın köməyi ilə təşkil edilib. Aksiyada iştirakçıların sayının çox olmasını təmin etmək üçün Gümrünün bəzi cinayətkar dairələri də prosesə cəlb edilib. Qəzet yazır ki, eyni cinayətkar dairələr vasitəsilə Paşinyana qarşı çıxan fəal vətəndaşlar V.Manukyanla görüşdə iştiraka görə təhdid ediliblər. Lakin buna baxmayaraq, görüşdə iştirakçı çox olub.
“News.am” yazdığına görə, V.Manukyanın Loru vilayətinə səfərinin qarşısını almaq üçün də bir qrup sakinə onun yolunu kəsmək tapşırılıb. Buna baxmayaraq, vilayət mərkəzi Vanadzorda müxalifətin görüşü baş tutub. Sakinlər qarşısında çıxış edən V.Manukyan Ermənistanın məğlubiyyətinin səbəbləri barədə fikirlərini bölüşüb. Onun sözlərinə görə, işğalçı ordu müharibəyə hazır olmayıb: “Bu səbəbdən itkilərimiz çox olub. Ordumuzu itirdik, onun yalnız qalıqları qalıb. Bir milyard dollar dəyərində silah itirdik və böyük iqtisadi itkilər var”.
Yeri gəlmişkən, xatırladaq ki, bu günlərdə Rusiyanın RBK telekanalına və “Sputnik-Ermənistan”a verdiyi müsahibələrdə Ermənistanın biabırçı məğlubiyyətinin səbəblərinə toxunan müxalifətin vahid namizədi V.Manukyan revanşizm hislərinin növbəti dəfə Ermənistanı geri salacağını deyib: “Müharibə istisna edilməlidir. Bu səbəbdən indiki məqamda revanşizm hisləri ilə yaşamaq yersizdir və revanş haqqında düşünməyin mənası yoxdur”.
“Armenia Today” isə yazır ki, müxalifətin böhrandan çıxmaq üçün təqdim etdiyi “yol xəritəsi”ndə də revanş haqqında heç bir müddəa yoxdur. Bu sənədə əsasən, müxalifət indiki baş nazirin və hökumətinin dərhal istefasına nail olmağı, yalnız öz sahələrini bilən mütəxəssislərdən ibarət müvəqqəti keçid hökumətinin qurulmasını və hər ötən gün daha da təhlükəli hal alan sosial-iqtisadi fəlakətə qarşı təcili tədbirlərin görülməsini hədəfləyir.
Beləliklə, qeyd etdiyimiz kimi, Paşinyanın əleyhdarları bölgələr üz tutur, hakimiyyət isə müxalifətin regionlarda təşkil etdiyi aksiyaların qarşısını almaq üçün müxtəlif vasitələrə əl atır. Məğlub Ermənistandakı bu mənzərəni dəyərləndirən ekspertlərin fikrincə, ölkədəki xaotik durum yeni mərhələyə qədəm qoyur.
Qaşqay ZİYƏDDİNOĞLU

Paylaş:

Baxılıb: 936 dəfə