Məğlub Ermənistanda etirazlar səngimir

Bakı:

20 °C

77 %

3 m/s

Əlaqə

AZ RU EN

Ana səhifə / Dünya / Məğlub Ermənistanda etirazlar səngimir

Məğlub Ermənistanda etirazlar səngimir

20.01.2021 [09:44]

İqtidar-müxalifət qarşıdurması revanşist çağırışlar, qarşılıqlı ittihamlar və təzadlı çıxışlarla müşayiət olunur
Məlum olduğu kimi, biabırçı kapitulyasiya aktına imza atan təcavüzkar Ermənistanda ötən ilin noyabrından başlayan siyasi böhran davam etməkdədir. Belə ki, iki aydan çoxdur ölkəni bürüyən kütləvi etiraz aksiyaları yeni ildən yeni taktika və formalarla özünü büruzə verir. Eyni zamanda, müharibədən ciddi itkilərlə çıxan ölkədə sosial-iqtisadi böhran da getdikcə dərinləşir.
Yerli medianın məlumatına görə, son günlərdə paytaxt Yerevanda Paşinyanın istefası tələbi ilə keçirilən kütləvi aksiyalarla yanaşı, hərbi xidmətə çağırılanların valideynlərinin yürüş və piketləri də baş tutub. “Armenia Today” yazır ki, baş nazirlə görüşsələr də, valideynlərin qaldırdıqları məsələlər öz həllini tapmayıb.
Yeri gəlmişkən, qeyd edək ki, “Vətənin xilası naminə hərəkat”ın liderlərinin regionlara səfərləri də davam edir. Belə ki, hərəkat bir sıra vilayətlərdə görüşlər və vətəndaş itaətsizliyi aksiyaları keçirib. Erməni mediası yazır ki, hakimiyyətin bütün cəhdlərinə baxmayaraq, müxalifətin regionlarda təşkil etdiyi aksiyaların qarşısını almaq mümkün olmur. Eyni zamanda, ölkədə bütün səviyyələrdə səslənən istefa sədalarına cavab olaraq hakimiyyətin növbədənkənar parlament seçkiləri barədə təklifinin müsbət qarşılanmaması cəmiyyətdə hökumətə qarşı inamın mövcud olmadığını göstərir. Parlamentin vitse-spikeri Lena Nazaryanın Paşinyanın növbədənkənar seçki təklifinə təzadlı münasibəti də təəccüblə qarşılanıb. Belə ki, “Sputnik Ermənistan”a verdiyi açıqlamada L.Nazaryan deyib ki, indiki şəraitdə növbədənkənar seçkilərin keçirilməsi yeni böhrana səbəb ola bilər. Onun sözlərinə görə, parlamentdəki müxalifət partiyaları mandat almayacaqlarını bildikləri üçün indi seçki keçirilməsinə müsbət yanaşmırlar: “Əgər “Maariflənən Ermənistan” və “Çiçəklənən Ermənistan” növbədənkənar seçkilərin əleyhinədirsə, parlamentdənkənar siyasi qüvvələr nəticələrin saxtalaşdırılacağını və hər seçki qutusunun yanında qan töküləcəyini bəyan edirsə, bu şərtlər altında necə seçki təşkil etmək olar?”.
Onu da qeyd edək ki, vitse-spiker L.Nazaryanın Ermənistanda revanşizm hislərinin növbəti dəfə yersiz olduğu barədə bəyanat verməsi də daxildə birmənalı qarşılanmayıb. Belə ki, vitse-spiker azad edilən ərazilərin hərbi yolla qaytarılması ideyalarını reqressiv və zərərli hesab edib: “Ermənistanın bütün qonşuları ilə uzunmüddətli və daimi sülh əldə etməsinə çalışmalıyıq. Müharibə olmamalı, bütün məsələlər sülh yolu ilə, danışıqlar yolu ilə həll edilməlidir”.
Qeyd edək ki, bu çıxışdan sonra revanşist qüvvələr tərəfindən L.Nazaryana ciddi hücumlar olub.
Müxalifətin ittihamlarına gəlincə, “Armenia Today” isə yazır ki, “Vətənin xilası naminə hərəkat”ın liderlərindən biri, “Daşnaksutyun” ali şurasının nümayəndəsi İşxan Saqatelyan deyib ki, hakimiyyət orqanlarının indiki fəaliyyəti ölkəni birbaşa təhdid edir, çünki onlar ordudan iqtisadiyyata qədər məqsədyönlü şəkildə dövlətçiliyin əsaslarını məhv edirlər.
Bu arada, Ermənistanda sosial-iqtisadi vəziyyətin acınacaqlı olmasını media orqanlarında yer alan rəqəmlər də təsdiq edir. Bu faktlardan biri 2020-ci ildə Ermənistanda 22 mindən çox təşkilat və müəssisənin fəaliyyətini dayandırmasıdır. Xatırladaq ki, bir qədər əvvəl iqtisadiyyat naziri Vahan Kerobyan da ötən il idxal, ixrac və istehlak sahələrində təxminən 20 faiz azalma olduğunu etiraf edib.
Göründüyü kimi, siyasi, sosial-iqtisadi sahələrdə böhranın hökm sürdüyü məğlub Ermənistanda hakimiyyətə qarşı etirazlar səngimək bilmir. Hakimiyyətdə təmsil olunanlarla opponentləri arasında qarşılıqlı ittihamlar da davam edir. İqtidar-müxalifət qarşıdurmasının revanşist çağırışlar, qarşılıqlı ittihamlar və təzadlı çıxışlarla müşayiət olunması məğlub ölkədə böhranın daha da dərinləşəcəyindən xəbər verir.
Qaşqay ZİYƏDDİNOĞLU

Paylaş:

Baxılıb: 930 dəfə